റഷ്യ, മോസ്കോ... വിശേഷങ്ങൾ 500ലേറെ വിഡിയോകളിലൂടെ മലയാളിക്ക് കാണിച്ചു തന്ന വ്ലോഗർ ഡോ.കക്കാട് കിരൺ ആനന്ദ് നമ്പൂതിരിയാണ് ഇക്കുറി ഗുരുവായൂർ ക്ഷേത്രം മേൽശാന്തി. വേദവും തന്ത്രവും പൂജാവിധികളും സംഗീതവും സാഹിത്യവും ആയുർവേദവും വഴങ്ങുന്ന ഈ 34 കാരൻ നവമാധ്യമങ്ങളിലും താരമാണ്. തനിക്ക് പ്രിയപ്പെട്ട സംഗീതവും യാത്രയും ടെക്നോളജിയുമായി ഘടിപ്പിച്ചാണ് അദ്ദേഹം സമൂഹ മാധ്യമങ്ങളിൽ ശ്രദ്ധേയനായത്. 6 വർഷക്കാലം ഭാര്യ മാനസിക്ക് ഒപ്പം മോസ്കോയിൽ ജീവിച്ച കിരൺ ആനന്ദ് നമ്പൂതിരി റഷ്യയുടെ പരിചിതമല്ലാത്ത ഇടങ്ങളെയും വിശേഷങ്ങളെയും യുട്യൂബ് ചാനലിലൂടെ മലയാളിക്ക് പരിചയപ്പെടുത്തി. പാട്ടും സംഗീതവും യാത്രയും ഇഷ്ടപ്പെടുന്ന ഈ ദമ്പതികളുടെ യുട്യൂബ് ചാനലിന് പേര് HARTT DUOS. Health, Art, Travell and Tech എന്നതിന്റെ ചുരുക്കപ്പേരാണിത്. 20,000ത്തോളം സബ്സ്ക്രൈബേഴ്സ് ഉണ്ട്.
