അകാലനരയാണോ പ്രശ്നം ? പൂട്ടിടാൻ പ്രകൃതിയിലുണ്ട് വഴികൾ
Mail This Article
ഏതു പ്രായത്തിലുള്ളവരും നേരിടുന്ന ഒരു പ്രശ്നമായി അകാല നര മാറിയിരിക്കുകയാണ്. ‘മുടി നരച്ചാലെന്താ’ എന്നു പറഞ്ഞ് ചിലപ്പോഴൊക്കെ നിസാരവത്കരിക്കുമെങ്കിലും അകാലത്തിലുള്ള നര പലർക്കും അസ്വസ്ഥത സൃഷ്ടിക്കുന്നുണ്ട്. ആ പ്രശ്നം നിങ്ങളെ അലട്ടുന്നുണ്ടോ? എങ്കിൽ പ്രകൃതിദത്തമായ ചില സൂത്രങ്ങൾ ഉപയോഗിച്ച് അകാലനരയെ നേരിടാം.
സവാള സൂത്രം
സവാള നീരെടുത്ത് വെളിച്ചെണ്ണയുമായി ചേർത്ത് മിശ്രിതമുണ്ടാക്കുക. ഇത് മുടിയിൽ നന്നായി തേച്ച് പിടിപ്പിക്കുക. സവാളയിലുള്ള കറ്റാലിസ് മുടിയുടെ സ്വാഭാവിക നിറം തിരിച്ചുകിട്ടാൻ സഹായിക്കും. ഇതിലുള്ള വിറ്റാമിൻ സി യും ഫോലിക് ആസിഡും മുടി നരയ്ക്കുന്നത് തടയും.
നെല്ലിക്ക ജ്യൂസായാലോ
ഔഷധ ഗുണങ്ങളാൽ സമ്പുഷ്ടമാണ് നെല്ലിക്ക. വിറ്റാമിൻ സിയുടെയും ആന്റി ഓക്സിഡന്റുകളുടെയും കലവറ. നെല്ലിക്കയുടെ നീര് കുടിക്കുന്നത് മുടി വളരാന് സഹായിക്കുന്നു. അകാല നരയുടെ കാരണങ്ങളിലൊന്നായ ശരീര ഊഷ്മാവിലെ വ്യതിയാനം നിയന്ത്രിക്കാനും നെല്ലിക്കാ നീര് കുടിക്കുന്നതിലൂടെ സാധിക്കുന്നു.
കടുപ്പത്തിലൊരു ചായ
കടും ചായയിൽ മുടി കഴുകുന്നത് സ്വാഭാവിക തിളക്കവും നിറവും നിലനിർത്താൻ സഹായിക്കും. ഷാംപൂ ഉപയോഗിച്ചശേഷം കടും ചായയിൽ മുടി കഴുകാം. ചായയിലുള്ള കഫീൻ പദാർത്ഥങ്ങൾക്ക് മുടി കൊഴിച്ചിലിനു കാരണമാകുന്ന ഹോർമോണുകളെ തടഞ്ഞുനിർത്താനും കഴിവുണ്ട്.
ഇഞ്ചി മാഹാത്മ്യം
തൊലികളഞ്ഞ ഇഞ്ചി പേസ്റ്റ് രൂപത്തിലാക്കി മുടിയിൽ തേച്ചുപിടിപ്പിക്കുക. ധാരാളം വിറ്റാമിനുകളും മഗ്നീഷ്യവും അടങ്ങിയിട്ടുള്ള ഇഞ്ചി പൊട്ടിയ മുടിയിഴകളെ നന്നാക്കാനും അകാലനരയെ തടയാനും സഹായിക്കുന്നു.