മുടി കൊഴിച്ചിൽ തടയാൻ നെല്ലിക്കയുടെ കരുത്ത് ; വീട്ടിലുണ്ടാക്കാം ഹെയർ മാസ്ക്
Mail This Article
മുടി കൊഴിച്ചിൽ തടയാൻ നെല്ലിക്ക ഉപയോഗിച്ച് തയാറാക്കാവുന്ന മൂന്ന് ഹെയർ മാസ്ക്കുകൾ പരിചയപ്പെടാം.
∙ നെല്ലിക്ക– ചീവയ്ക്ക ഹെയർ മാസ്ക്
മൂന്നോ നാലോ പച്ചനെല്ലിക്ക, ചീവയ്ക്ക ഇവയെടുക്കുക. രണ്ടിന്റെയും ഉള്ളിലെ കുരു കളഞ്ഞതിനു ശേഷം ഒരു രാത്രി വെള്ളത്തിലിട്ടു വയ്ക്കുക. ശേഷം ഇവ രണ്ടും കൂടി അരച്ചെടുത്ത് തലയോട്ടിയിൽ പുരട്ടുക. രണ്ട് മണിക്കൂറിനു ശേഷം കഴുകുക. ഷാംപൂ ഉപയോഗിക്കാതിരിക്കാൻ പ്രത്യേകം ശ്രദ്ധിക്കണം.
∙ നെല്ലിക്ക – തൈര് ഹെയർ മാസ്ക്
മുടികൊഴിച്ചിലിന്റെ ഒരു പ്രധാന കാരണക്കാരൻ ശിരോചർമത്തിലെ താരനാണ്. രണ്ട് നെല്ലിക്കയും അൽപം തൈരുമുണ്ടെങ്കിൽ താരനിൽ നിന്ന് രക്ഷനേടാം. രണ്ട് നെല്ലിക്ക കുരുകളഞ്ഞ് അരച്ചെടുക്കുക. ഇതിൽ അൽപം തൈരു ചേർത്ത് തലയോട്ടിയിൽ പുരട്ടുക. അരമണിക്കൂറിനു ശേഷം കഴുകിക്കളയുക. താരനകറ്റാനും മുടികൊഴിച്ചിലകറ്റാനും ഈ ഹെയർപാക്ക് ഏറെ ഫലപ്രദമാണ്.
∙ നെല്ലിക്ക കറിവേപ്പില ഹെയർ മാസ്ക്
നെല്ലിക്ക പോലെ തന്നെ മുടിയുടെ ആരോഗ്യത്തിന് അത്യുത്തമമാണ് കറിവേപ്പിലയും. അയൺ, കാൽസ്യം, ഫോസ്ഫറസ്, ആന്റി ഓക്സിഡന്റ്സ്, വിറ്റമിൻ ബി 6, വിറ്റമിന് സി, പ്രോട്ടീൻസ്, ബീറ്റ കരോട്ടിൻ, ഫൈബർ, അമിനോ ആസിഡ്, കാർബോ ഹൈഡ്രേറ്റ്സ് എന്നിവയുടെ കലവറയാണ് കറിവേപ്പില. ഇതിന്റെ പോഷക ഗുണങ്ങളും നെല്ലിക്കയുടെ ഗുണങ്ങളും ചേർന്നാൽ മുടിയുടെ ഒട്ടുമിക്ക ആരോഗ്യ പ്രശ്നങ്ങൾക്കും പരിഹാരമാകും. ഒന്നുരണ്ട് നെല്ലിക്ക കുരുകളഞ്ഞ ശേഷം അഞ്ചാറുതണ്ട് കറിവേപ്പിലയും ചേർത്ത് നന്നായി അരച്ചെടുക്കുക. ഈ മിശ്രിതം തലയോട്ടിയിൽ നന്നായി തേച്ചുപിടിപ്പിക്കുക. ഉണങ്ങിയതിനു ശേഷം വീര്യം കുറഞ്ഞ ഏതെങ്കിലും ഷാംപൂ ഉപയോഗിച്ച് മുടി കഴുകാം.
English Summary : amla hair packs to prevent Hair loss and Dandruff