അമ്പിളി ദേവി അമ്മയായി; ഇരട്ടി സന്തോഷം പങ്കുവച്ച് ആദിത്യൻ ജയൻ

അമ്പിളി ദേവി– ആദിത്യൻ ജയൻ ദമ്പതികൾക്ക് ആൺകുഞ്ഞ് പിറന്നു. ആദിത്യൻ ജയൻ സമൂഹമാധ്യമത്തിലൂടെയാണ് സന്തോഷവാർത്ത ആരാധകരോടു പങ്കുവച്ചത്. വല്യച്ഛന്റെ മാസവും അമ്മയുടെ നക്ഷത്രവുമാണ് കുഞ്ഞിന്. പ്രാർഥിച്ചവർക്കും സഹായിച്ചവർക്കും നന്ദിയുണ്ടെന്നും ആദിത്യൻ കുറിച്ചു. 

‘‘ഞങ്ങൾക്ക് ഒരു ആൺകുഞ്ഞു ജനിച്ചു. അമ്പിളി സുഖമായി ഇരിക്കുന്നു. എന്റെ വല്യച്ഛന്റെ മാസമാണ് നവംബർ. അമ്മയുടെ നക്ഷത്രം. ഈശ്വരനോടും പ്രാര്‍ഥിച്ചവരോടും സഹായിച്ചവരോടും നന്ദി നന്ദി നന്ദി’’, അമ്പിളി ദേവിക്കൊപ്പമുളള ചിത്രവും കുഞ്ഞിന്റെ കാലുകളുടെ ചിത്രവും സമൂഹമാധ്യമത്തിൽ പോസ്റ്റ് ചെയ്തിട്ടുണ്ട്.

കുഞ്ഞിനു വേണ്ടിയുള്ള കാത്തിരിപ്പിനിടെ ഓരോ ചെറിയ വിശേഷങ്ങളും ആദിത്യനും അമ്പിളിയും പങ്കുവയ്ക്കാറുണ്ട്. അമ്പിളി ദേവി ഗുരുതരമായ അവസ്ഥയിലാണെന്ന രീതിയിൽ ചില ഓൺലൈനുകൾ നടത്തിയ വ്യാജപ്രചരണത്തിനെതിരെ ആദിത്യൻ ജയൻ അടുത്തിടെ രംഗത്തെത്തിയിരുന്നു.

ജയന്റെ സഹോദരൻ സോമൻ നായരുടെ മകനാണ് ആദിത്യൻ. 2019 ജനുവരി 25ന് ആയിരുന്നു അമ്പിളി ദേവിയുടെയും ആദിത്യന്റെയും വിവാഹം. കൊല്ലം കൊറ്റന്‍ കുളങ്ങര ദേവീക്ഷേത്രത്തിലായിരുന്നു ചടങ്ങുകൾ.

English Summary : Ambili Devi Blessed with baby boy