ഇനി കാണില്ലേ ? വിടപറഞ്ഞ് ദമ്പതികൾ; കൊറോണക്കാലത്തെ നൊമ്പരക്കാഴ്ചകൾ

കൊറോണ ഭയത്തിലാണ് ചൈന. ഓരോ ദിവസവും ഭയപ്പെടുത്തുന്നതും വേദനിപ്പിക്കുന്നതുമായ ദൃശ്യങ്ങളാണ് ചൈനയിൽ നിന്ന് പുറത്തു വരുന്നത്. ഇപ്പോഴിതാ കൊറോണ ബാധിച്ച വൃദ്ധദമ്പതികൾ യാത്ര പറയുന്ന ദൃശ്യങ്ങൾ സമൂഹമാധ്യമങ്ങളിൽ നൊമ്പരക്കാഴ്ചയാകുന്നു.

ആശുപത്രിയിലെ അത്യാഹിത വിഭാഗത്തിലാണ് ഈ ദമ്പതികൾ ഉള്ളത്. 80 വയസ്സിനു മുകളിൽ പ്രായമുണ്ട് ഇവർക്ക്. ഇനിയൊരിക്കലും കാണാനാകില്ല എന്ന ഭയത്താൽ ഇവർ യാത്ര പറയുന്നു എന്നാണ് വിഡിയോയ്ക്കൊപ്പമുള്ള കുറിപ്പിൽ പറയുന്നത്. രണ്ട് കട്ടിലുകളിൽ കിടന്ന് കൈകോർത്തു പിടിച്ചാണ് യാത്ര പറച്ചിൽ. പരസ്പരം സംസാരിക്കാനും ശ്രമിക്കുന്നുണ്ട്. 

ഈ യാത്ര പറച്ചിൽ നെഞ്ച് പൊള്ളിക്കുന്നു എന്നാണ് പലരും പറയുന്നത്. ഈ വിഡിയോ വേദനിപ്പിക്കുമ്പോഴും അവർക്കിടയിലെ സ്നേഹം സന്തോഷിപ്പിക്കുന്നു എന്നും കമന്റുകളുണ്ട്. കൊറോണയെ പ്രണയം കൊണ്ടു തോൽപ്പിച്ച് ഇവർ ഒന്നിച്ച് വീട്ടിലേക്ക് മടങ്ങുമെന്ന പ്രതീക്ഷയും നിരവധിപ്പേർ പങ്കുവയ്ക്കുന്നുണ്ട്.

English Summary : Elderly couple with coronavirus says goodbye in hospital