കൊല്ലം സുധിയുടെ വിയോഗത്തിൽ അനുശോചനവുമായി നസീർ സംക്രാന്തി. വാർത്ത അറിഞ്ഞപ്പോൾ ഞെട്ടലുണ്ടായെന്നും പെട്ടെന്ന് പിരിഞ്ഞ് പോകുമെന്ന് കരുതിയില്ലെന്നും നസീർ പറഞ്ഞു. സുബി മരിച്ചിട്ട് ഒരുപാട് ദിവസമായില്ല. അതിനിടയിലാണ് അടുത്തതും. നല്ലൊരു സുഹൃത്തിനെ കൂടിയാണ് നഷ്ടമായത്. വർഷങ്ങളായി ഞങ്ങൾ ഒരുമിച്ച് പ്രോഗ്രാമുകൾ ചെയ്യുന്നുണ്ട് – നസീർ പറഞ്ഞു.
സെറ്റിൽ എപ്പോഴും സംസാരിച്ച് കൊണ്ടിരിക്കുന്ന വ്യക്തിയാണ് സുധി. എപ്പോഴും ചിരിച്ചു കൊണ്ടിരിക്കും. സ്ക്രീനിൽ കാണുന്ന പോലെ ചിരിച്ച മുഖമാണ് എപ്പോഴും. എന്ത് വേഷങ്ങൾ ചെയ്യാൻ പറഞ്ഞാലും കൃത്യതയോടെ ചെയ്യുന്ന കലാകാരനാണ് സുധിയെന്നും നസീർ സംക്രാന്തി പറഞ്ഞു.
സുധിയുടെ വിയോഗത്തിൽ ഏറെ ദുഃഖത്തിലാണ് അവതാരകയായ ലക്ഷ്മി നക്ഷത്ര. ‘എത്ര വേദന ഉള്ളിലുണ്ടായാലും സുധിച്ചേട്ടന്‍ ഞങ്ങളെ എന്നും ചിരിപ്പിച്ചിട്ടേയുള്ളു. അദ്ദേഹം ഇപ്പോള്‍ ഏത് ലോകത്തായാലും ആ ചിരി മാഞ്ഞുപോകാതിരിക്കട്ടെ. ഇത്ര വേഗം കൊണ്ടുപോകേണ്ടതില്ലായിരുന്നു’– ലക്ഷ്മി പറഞ്ഞു.
