വിസ്മയിപ്പിക്കാൻ ഇത്തവണയും പ്രിയങ്ക ചോപ്ര; മെറ്റ്​ഗാല 2023 ൽ കാത്തിരിക്കുന്നതെന്ത്?

മെറ്റ് ​ഗാല 2023 വേദിയിൽ താരസുന്ദരി പ്രിയങ്ക ചോപ്രയുമുണ്ടാകുമെന്ന് റിപ്പോർട്ടുകൾ. മാധ്യമപ്രവർത്തകനായ മാർക് മാൽക്കിനാണ് പ്രിയങ്കയുടെ സാന്നിധ്യം സ്ഥിരീകരിച്ച് ട്വീറ്റ് ചെയ്തത്. പുതിയ സിനിമ സിറ്റാഡലിന്റെ പ്രചാരണ പരിപാടിയ്ക്കിടയിലാണ് മെറ്റ്​ഗാലയ്ക്ക് ഉണ്ടാകുമോ എന്ന് പ്രിയങ്കയോട് ചോദിച്ചത്. ഉണ്ടാകും എന്നായിരുന്നു മറുപടിയെന്നും മാർക് കുറിച്ചു.

മെറ്റ്​ഗാലയിലെ നിറസാന്നിധ്യമാണ് പ്രിയങ്ക ചോപ്ര. മുൻവർഷങ്ങളിലെ താരത്തിന്റെ ലുക്കുകൾ ശ്രദ്ധ നേടിയിരുന്നു. ഇത്തവണ പ്രത്യേക ഫീച്ചറുകളുള്ള കോസ്റ്റ്യൂം ആയിരിക്കുമെന്ന് പ്രിയങ്ക സൂചിപ്പിച്ചതായി മാർക് പറയുന്നു. ഭർത്താവും പോപ് ​ഗായകനുമായ നിക് ജോനസും മെറ്റ്ഗാലയ്ക്ക് എത്താറുണ്ട്. ഇത്തവണയും ഇരുവരും ഒന്നിച്ചെത്തുമെന്നാണ് ആരാധകർ കരുതുന്നത്. 

Read more: റാംപിൽ മലൈക മാജിക്; ഷോസ്റ്റോപ്പറായി തിളങ്ങി താരസുന്ദരി

ഫാഷൻ ലോകത്തെ ഉത്സവം എന്നാണ് മെറ്റ് ​ഗാല അറിയപ്പെടുന്നത്. ലോകപ്രസിദ്ധ ഡിസൈർമാർ ഒരുക്കുന്ന വസ്ത്രങ്ങൾ ധരിച്ച് സെലിബ്രിറ്റികൾ റെഡ് കാർപറ്റ് കീഴടക്കുന്ന കാഴ്ച ഫാഷൻ ലോകത്ത് വിസ്മയം തീർത്തിട്ടുണ്ട്. ആലിയ ഭട്ടിന്റെ ‌‍മെറ്റ്​ഗാല അരങ്ങേറ്റത്തിന്റെ ആവേശവും ബോളിവുഡ് ആരാധകർക്കുണ്ട്. ദീപിക പദു​കോൺ, ഇഷ അംബാനി, നടാഷ പൂനാവാല, സുധ റെഡ്ഢി എന്നിവരാണ് മുമ്പ് മെറ്റ്​ഗാലയിൽ പങ്കെടുത്ത ഇന്ത്യൻ സെലിബ്രിറ്റികൾ.

ന്യൂയേർക്കിലെ മെട്രോപോളിറ്റൻ മ്യൂസിയത്തിൽ മേയ് 1ന് ആണ് ഷോ അരങ്ങേറുക. കോസ്റ്റ്യൂം ഇൻസ്റ്റിറ്റ്യൂട്ടിന് ഫണ്ട് സ്വരൂപിക്കാനായി 1948ലാണ് മെറ്റ് ഗാല ആരംഭിച്ചത്. ഇതു വലിയ ശ്രദ്ധ നേടുകയും തുടർന്നുള്ള വർഷങ്ങളിൽ ​പങ്കാളിത്തം വർധിക്കുകയും ചെയ്തു. ഇപ്പോൾ 50,000 ഡോളറാണ് മെറ്റ​ഗാലയിലേക്കുള്ള പ്രവേശന ഫീസ്. കഴിഞ്ഞ വർഷത്തെ അപേക്ഷിച്ച് ഫീസ് കുത്തനെ ഉയർത്തിയത് വിമർശനം നേരിട്ടിരുന്നു. എങ്കിലും ഇതൊന്നും മെറ്റ്​ഗാലയുടെ പകിട്ട് കുറയ്ക്കില്ലെന്നാണ് ആരാധകരുടെ പ്രതീക്ഷ. 

Content Summary: Met Gala 2023: Priyanka Chopra confirms return to the fashion event