ഇത് പഴ്സ് ആയിരുന്നോ?; അമ്പരന്ന് സോഷ്യൽ ലോകം

ഒരു കോയിൻ പഴസ് സമൂഹമാധ്യമങ്ങളിൽ തരംഗമായിരിക്കുകയാണ്. കണ്ടവരെല്ലാം മൂക്കത്തു വിരൽ വച്ച് ഇങ്ങനെയും പഴ്സുണ്ടാക്കാമോ എന്നു ചോദിക്കുന്ന അവസ്ഥയിലെത്തി കാര്യങ്ങൾ. മനുഷ്യന്റെ വായയുടെ ആകൃതിയിലാണ് ഈ പഴ്സ് ഉണ്ടാക്കിയിരിക്കുന്നത്. ചുണ്ടുകൾ വിടർത്തി വേണം നാണയങ്ങൾ അകത്തിടേണ്ടത്. ഇതിനുശേഷം അമർത്തി അടയ്ക്കണം.

ജപ്പാൻകാരനായ ഒരു ഡിജെ  രണ്ടു മാസം കൊണ്ടാണ് ഈ പഴ്സ് ഉണ്ടാക്കിയത്. എന്ത് വസ്തു ഉപയോഗിച്ചാണ് പഴ്സ് നിർമിച്ചതെന്നു വെളിപ്പെടുത്താന്‍ തയാറാകാതിരുന്ന ഇദ്ദേഹം ഇതു വിൽക്കാൻ ഉദ്ദേശിക്കുന്നില്ലെന്നും വ്യക്തമാക്കി.

ട്വിറ്ററിൽ പങ്കുവച്ച വിഡിയോ 13.8 മില്യൻ പേർ ഇതുവരെ കണ്ടു. സമ്മിശ്ര അഭിപ്രായങ്ങളാണു പഴ്സിനു ലഭിക്കുന്നത്. കഴിവിനെ അംഗീകരിക്കുന്നുവെങ്കിലും  മനുഷ്യന്റെ വായിലേക്ക് ചില്ലറ തുട്ടുകളിടുന്നത് അരോചകമായി തോന്നുന്നുവെന്നാണ് കൂടുതൽ കമന്റുകളും.