‘ഫെയ്സ്ബുക് സുന്ദരി’ പൊലീസ് പിടിയിൽ ; ഇതാണ് യഥാർഥ നിഷ ജിൻഡൽ

വിദ്വേഷം ജനിപ്പിക്കുന്ന പോസ്റ്റുകൾ പ്രചരിപ്പിച്ച ‘നിഷ ജിൻഡൽ’ എന്ന ഫെയ്സ്ബുക് പേജിനു പൂട്ടിട്ട് ഛത്തീസ്ഗ‍ഡ് പൊലീസ്. ഈ പേജ് പ്രവർത്തിപ്പിച്ചിരുന്ന റായ്പുർ സ്വദേശി രവി പൂജാറിനെ വെള്ളിയാഴ്ചയാണ് പൊലീസ് അറസ്റ്റ് ചെയ്തത്. 

1000 പേരാണ് ഈ പേജ് പിന്തുടർന്നിരുന്നത്. സാമുദായിക സംഘർഷത്തിലേക്കു നയിച്ചേക്കാവുന്ന പോസ്റ്റുകൾ പ്രത്യക്ഷപ്പെടാൻ തുടങ്ങിയതോടെ പേജിന്റെ ഉടമയെ തേടി പൊലീസ് അന്വേഷണം ആരംഭിച്ചു. ഈ അന്വേഷണം രവി പൂജാറിൽ ചെന്നെത്തുകയായിരുന്നു.

രവി പൂജാറിനെ അറസ്റ്റ് ചെയ്ത പൊലീസ്, ഇയാളുടെ യഥാർഥ ചിത്രം നിഷ ജിൻഡൽ എന്ന പേജിൽ പോസ്റ്റ് ചെയ്യിപ്പിച്ചു. ഒപ്പം താനാണ് ഈ പേജിന്റെ ഉടമയെന്നും പൊലീസ് അറസ്റ്റ് ചെയ്തെന്നും അറിയിക്കാൻ ആവശ്യപ്പെട്ടു.

ഐപി വിലാസം ഉപയോഗിച്ചാണ് പൊലീസ് ഇയാളെ കണ്ടെത്തിയത്. മൊബൈൽ ഫോണുകളും ലാപ്ടോപും വീട്ടിൽ നിന്നു പിടിച്ചെടുത്തിട്ടുണ്ട്. മതങ്ങളെ അവഹേളിച്ചതിനും വിദ്വേഷം പ്രചരിപ്പിച്ചതിനുമാണ് കേസ്. രവി എൻജിനീയറിങ് വിദ്യാര്‍ഥിയാണെന്നും 11 വർഷമായി ശ്രമിച്ചിട്ടും പരീക്ഷകൾ ജയിക്കാനായിട്ടില്ലെന്നുമാണ് റിപ്പോര്‍ട്ടുകൾ.

എന്തായാലും യഥാർഥ ‘നിഷ ജിന്‍ഡലി’നെ കണ്ട് ഞെട്ടിയിരിക്കുകയാണ് പേജിൽ പിന്തുടർന്നവർ.

English Summary : Raipur police arrested man for running controversial facebook page