വരൻ മാലയിട്ടു, മുഖത്തടിച്ച് വധു ഇറങ്ങിപ്പോയി; സംഭവം ഇങ്ങനെ: വിഡിയോ

വിവാഹവേദിയിൽ‌ വധു വരനെ തല്ലുന്ന വിഡിയോ സമൂഹമാധ്യമങ്ങളിൽ വൈറൽ. ഉത്തർപ്രദേശിലെ ഹമിർപുരിൽ ആണ് സംഭവം. വരൻ വരണമാല്യം അണിയിച്ചതിനു പിന്നാലെ പ്രകോപിതയായ വധു പല തവണ വരന്റെ കവിളില്‍ അടിച്ചു. എന്താണു സംഭവിച്ചതെന്നു മനസ്സിലാകാതെ വരനും അതിഥികളും ഞെട്ടി. ഇതിനു പിന്നാലെ വധു വേദിവിട്ട് ഇറങ്ങുന്നതും വിഡിയോയിലുണ്ട്. 

ഇതിനുശേഷം ഇവരുടെ കുടുംബക്കാർ തമ്മിലടിച്ചതായും സംഭവത്തിൽ പൊലീസ് ഇടപെട്ടതായും പ്രാദേശിക മാധ്യമങ്ങൾ റിപ്പോർട്ട് ചെയ്യുന്നു. എന്നാൽ ചർച്ചകൾക്കൊടുവിൽ പ്രശ്നം ഒത്തുതീർപ്പിലെത്തുകയും ഇവർ വിവാഹിതരാകുകയും ചെയ്തു. പെൺകുട്ടിക്ക് വരനെ ഇഷ്ടപ്പെടാത്തതു കൊണ്ടാണ് ഇങ്ങനെ സംഭവിച്ചതെന്ന് ബന്ധുക്കളെ ഉദ്ധരിച്ച് മാധ്യമങ്ങള്‍ റിപ്പോർട്ട് ചെയ്യുന്നു. 

സമൂഹമാധ്യമങ്ങളിൽ നിരവധി ചർച്ചകൾക്ക് ഈ വിഡിയോ വഴിവച്ചു. നിർബന്ധിച്ച് വിവാഹത്തിന് സമ്മതിപ്പിക്കുന്നതാണ് പ്രശ്നങ്ങൾക്കു കാരണമെന്നാണു കമന്റുകൾ. ഇത്തരമൊരു സംഘർഷം ഉണ്ടായിട്ടും ഈ വിവാഹം നടത്തിയതിനെതിരെ വിമർശനം ഉയരുന്നുണ്ട്. 

English Summary : Bride Beats Groom in Wedding Venue Video goes Viral