മിസ് അർജന്റീനയും മിസ് പോർട്ടോറിക്കയും വിവാഹിതരായി

മുൻ മിസ് അർജന്റീന മരിയാനോ വരേലയും മിസ് പോർട്ടോറിക്ക ഫാബിയോള വലന്റീനയും വിവാഹിതരായി. ഒക്ടോബർ 28ന് ആയിരുന്നു വിവാഹം. രണ്ടു വർഷമായി പ്രണയത്തിലായിരുന്നു. 

ഒന്നിച്ചുള്ള നിമിഷങ്ങൾ കോർത്തിണക്കിയ വിഡിയോ ഇൻസ്റ്റഗ്രാമിൽ പങ്കുവച്ചാണ് വിവാഹക്കാര്യം വെളിപ്പെടുത്തിയത്. ‘‘ഞങ്ങൾ ഇതുവരെ പ്രണയം രഹസ്യമാക്കി സൂക്ഷിച്ചു. ഈ സുദിനത്തിൽ അത് പരസ്യമാക്കുകയാണ്’’ എന്ന് വിഡിയോയ്ക്കൊപ്പം കുറിച്ചു. 

2020 മിസ് ഗ്രാന്റ് ഇന്റർനാഷനൽ മത്സരത്തിൽ വച്ചാണ് ഇരുവരും കണ്ടുമുട്ടുന്നത്. ഈ സൗഹൃദമാണ് പ്രണയമായി വളർന്നത്. 2019 മിസ് യൂണിവേഴ്സ് മത്സരത്തിൽ പോർട്ടോറിക്കയെ പ്രതിനിധീകരിച്ചത് ഫാബിയോളയാണ്. മരിയാന 2019 ൽ മിസ് അർജന്റീന കിരീടം നേടി. സ്വവർഗ വിവാഹം 2010 മുതൽ  അർജന്റീനയിൽ നിയമവിധേയമാണ്. പോർട്ടോറിക്കയിൽ 2015 ലും നിയമവിധേയമായി.