സുവർണക്ഷേത്രം പോറൽപോലും ഏൽക്കാതെ കാത്ത പുലിക്കുട്ടികൾ, ആകാശും എൽ70യും ഉപയോഗിച്ച പാന്തർ ഡിവിഷൻ; വിഡിയോ

മെയ് 8ന് പാക്കിസ്ഥാൻ സൈന്യം ഡ്രോണുകൾ, ദീർഘദൂര മിസൈലുകൾ എന്നിവ ഉപയോഗിച്ച് അമൃത്സറിലെ സുവർണക്ഷേത്രം ഉൾപ്പെടെ ഇന്ത്യയിലെ വിവിധ നഗരങ്ങളിലേക്കും ആരാധനാലയങ്ങളിലേക്കും ഡ്രോൺ, ദീർഘദൂര മിസൈൽ ആക്രമണങ്ങൾ നടത്താൻ ശ്രമിച്ചു. ഇന്ത്യൻ സൈന്യത്തിന്റെ ജാഗ്രതയും സാങ്കേതിക ശേഷിയും മൂലം ഈ ആക്രമണങ്ങൾ വിജയകരമായി തടയപ്പെട്ടു. തീവ്രവാദികളുടെ കേന്ദ്രങ്ങൾ മാത്രം ലക്ഷ്യം വച്ചുള്ള ഓപറേഷൻ സിന്ദൂറിന് പകരമായി പാക്ക് സൈന്യം ലക്ഷ്യം വച്ചത് ഇന്ത്യയിലെ സാധാരണ ജനങ്ങളെയും ഒപ്പം ആരാധനാലയങ്ങളുമായിരുന്നു.  ഇന്ത്യൻ സൈന്യം ഈ ആക്രമണങ്ങൾ മുൻകൂട്ടി കണക്കാക്കിയിരുന്നു.

തദ്ദേശീയമായി നിർമ്മിച്ച ആകാശ് മിസൈൽ സംവിധാനവും എൽ-70 എയർ ഡിഫൻസ് ഗണ്ണുകളും ഉൾപ്പെടെയുള്ള വ്യോമ പ്രതിരോധ വ്യോമ സംവിധാനം പാകിസ്ഥാൻ മിസൈൽ, ഡ്രോൺ ആക്രമണങ്ങളിൽനിന്നും സംരക്ഷിക്കുന്ന കുടയായി മാറി പഞ്ചാബിലെ നിരവധി നഗരങ്ങളെ, പ്രത്യേകിച്ച് സുവർണ ക്ഷേത്രത്തെ നാശത്തിൽ നിന്ന് രക്ഷിച്ചു. രക്ഷാകവചം തീർത്തതിനെക്കുറിച്ച് വിശദീകരിക്കുന്ന വിഡിയോ കാണാം.

ഏപ്രിൽ 22 ന് 26 നിരപരാധികളുടെ ജീവൻ അപഹരിച്ച പഹൽഗാം ഭീകരാക്രമണത്തെ തുടർന്നാണ് സംഘർഷം ആരംഭിച്ചത്. മെയ് 7 ന് പാകിസ്ഥാൻ, പാക് അധിനിവേശ കശ്മീര്‍ (പിഒകെ) എന്നിവിടങ്ങളിലെ പ്രധാന തീവ്രവാദ കേന്ദ്രങ്ങൾ ലക്ഷ്യമിട്ട് ഓപ്പറേഷൻ സിന്ദൂർ എന്ന പേരിൽ ഇന്ത്യ തിരിച്ചടിച്ചു. ഇതിനെത്തുടർന്ന്, ജമ്മു കശ്മീർ, പഞ്ചാബ്, രാജസ്ഥാൻ, ഹരിയാന എന്നിവിടങ്ങളിലെ അതിർത്തി പ്രദേശങ്ങൾ ലക്ഷ്യമിട്ട് പാക്കിസ്ഥാൻ നിരവധി മിസൈൽ, ഡ്രോൺ ആക്രമണങ്ങൾ നടത്തി, സായുധ സേന ഇത് പരാജയപ്പെടുത്തി.

നമ്മുടെ ധീരരും ജാഗ്രതയുള്ളവരുമായ സൈന്യത്തിന്റെ വ്യോമ പ്രതിരോധ ഗണ്ണർമാർ പാക്കിസ്ഥാൻ സൈന്യത്തിന്റെ ദുഷ്ട പദ്ധതികളെ പരാജയപ്പെടുത്തി, സുവർണ ക്ഷേത്രം ലക്ഷ്യമിട്ടുള്ള എല്ലാ ഡ്രോണുകളും മിസൈലുകളും വെടിവച്ചു. ഒരു പോറൽ പോലും ഏൽക്കാൻ അനുവദിച്ചില്ലെന്ന് 15 ഇൻഫൻട്രി ഡിവിഷനിലെ(പാന്തർ ഡിവിഷൻ) ജിഒസി മേജർ ജനറൽ കാർത്തിക് സി ശേഷാദ്രി പറഞ്ഞു.

1965 ലെ ഇന്ത്യാ-പാക് യുദ്ധത്തിലും 1971 ലെ ഇന്ത്യാ-പാക് യുദ്ധത്തിലും ഈ ഡിവിഷൻ നിർണായക പങ്കുവഹിച്ചു. 1971 ലെ യുദ്ധത്തിൽ പടിഞ്ഞാറൻ പാക്കിസ്ഥാനിൽ ആദ്യമായി ഇന്ത്യൻ പതാക ഉയർത്തിയത് ഈ ഡിവിഷനാണ്.നിലവിൽ ഈ ഡിവിഷന്റെ ആസ്ഥാനം അമൃത്സറിലാണ്. ഇത് ഇന്ത്യൻ ആർമിയുടെ വെസ്റ്റേൺ കമാൻഡിന്റെ കീഴിലാണ് പ്രവർത്തിക്കുന്നത്.

റോഡിലൂടെ എത്തിക്കാം, ഒരേ സമയം 4 ലക്ഷ്യം തകർക്കും; ഇന്ത്യയുടെ ആകാശ് മിസൈൽ

വ്യോമാക്രമണത്തിൽ നിന്ന് ദുർബലമായ പ്രദേശങ്ങളും പോയിന്റുകളും സംരക്ഷിക്കുന്നതിനായി ഭാരത് ഡൈനാമിക്സ് ലിമിറ്റഡ് (ബിഡിഎൽ) നിർമിച്ച ഒരു ഹ്രസ്വ-ദൂര സർഫേസ്-ടു-എയർ (എസ്എഎം) സംവിധാനമാണ് ആകാശ്. ആകാശത്തിലെ 4 ലക്ഷ്യങ്ങളെ ഒരേസമയം തകർത്ത് മികവു തെളിയിച്ചത്  അസ്ത്രശക്തി 2023 എന്ന വ്യോമ ശക്തി പരീക്ഷണത്തിലാണ്.

ആകാശ് വെപ്പൺ സിസ്റ്റംആകാശ് വെപ്പൺ സിസ്റ്റത്തിന് (AWS ഒരേസമയം ഒന്നിലധികം ടാർഗെറ്റുകൾ ഗ്രൂപ്പ് മോഡിലോ ഓട്ടോണമസ് മോഡിലോ ഇടപഴകാൻ കഴിയും. മുഴുവൻ ആയുധ സംവിധാനവും മൊബൈൽ പ്ലാറ്റ്‌ഫോമുകളിൽ ക്രമീകരിച്ചിരിക്കുന്നു.

എൽ-70 വിമാനവേധ തോക്കുകൾ

എൽ-70 വിമാനവേധ തോക്കുകൾ എന്നത് സ്വീഡിഷ് ആയുധ നിർമാതാക്കളായ ബോഫോഴ്സ് 1940കളുടെ അവസാനത്തിൽ വികസിപ്പിച്ചെടുത്ത ഒരു ഓട്ടമാറ്റിക് പീരങ്കിയാണ്. രണ്ടാം ലോക മഹായുദ്ധകാലത്തെ അവരുടെ തന്നെ L/60 എന്ന വിമാനവേധ തോക്കിന് പകരമായിട്ടാണ് ഇത് രൂപകൽപ്പന ചെയ്തത്. L/70 വളരെക്കാലമായി ലോകമെമ്പാടുമുള്ള പല രാജ്യങ്ങളുടെയും സൈന്യത്തിൽ ഒരു പ്രധാന ആയുധമായി ഉപയോഗിക്കപ്പെടുന്നു