sections
MORE

ഇറാൻ ആണവനിലയത്തെ സ്തംഭിപ്പിച്ച സ്റ്റക്‌സ്‌നെറ്റ്- ഇസ്രയേലിന്റെ ബ്രഹ്‌മാസ്ത്രം ?

Irans-natanz
SHARE

ഇറാനിലെ നടാൻസിലെ ആണവനിലയത്തിൽ കഴിഞ്ഞദിവസം വൈദ്യുതി നിലയ്ക്കുകയും നിലയം പൂർണമായി പ്രവർത്തനരഹിതമാകുകയും ചെയ്തു. ഇതിനു പിന്നാലെ ഇസ്രയേൽ സൈബർ ആക്രമണം നടത്തിയതാണെന്ന അഭ്യൂഹം പ്രചരിച്ചു. ഇതിനിടയിൽ ഉയർന്നു കേട്ട ഒരു പേരാണ് സ്റ്റക്‌സ്‌നെറ്റ്. ഇറാന്റെ  ആണവകേന്ദ്രങ്ങളിൽ വീണ്ടുമൊരു സ്റ്റക്‌സ്‌നെറ്റ് ആക്രമണമുണ്ടായോ എന്നായിരുന്നു പ്രധാനമായും ഉയർന്ന ചോദ്യം.

എന്നാൽ, ഇതിനു സ്ഥിരീകരണമൊന്നും ഉണ്ടായിട്ടില്ല. നടാൻസിൽ കഴിഞ്ഞദിവസം നടന്നത് സൈബർ ആക്രമണമാണെന്നു പോലും ഇതു വരെ ഉറപ്പാക്കിയിട്ടില്ല. ഇപ്പോൾ എന്നാൽ ഇതേ  നടാൻസ് ആണവനിലയത്തിൽ 2010ൽ നടന്ന വൻ സൈബർ ആക്രമണം നടത്തിയത് സ്റ്റക്‌സ്‌നെറ്റ് എന്ന വൈറസാണ്. ലോകശ്രദ്ധ നേടിയ ആ ആക്രമണം സൈബർ സുരക്ഷാ രംഗത്തു വലിയ ചർച്ചകൾക്കും പഠനങ്ങൾക്കും വഴിവച്ചു.

∙ എന്തായിരുന്നു സ്റ്റക്‌സ്‌നെറ്റ്? ഏറെക്കാലം ഇറാന്റെ സാങ്കേതികമേഖലയെ ആശയക്കുഴപ്പത്തിലും ആശങ്കയിലും നിലനിർത്തിയ ഇസ്രയേലിന്റെ ബ്രഹ്‌മാസ്ത്രം?

ഇസ്രയേൽ, യുഎസ് സഹകരണത്തിലാണ് സ്റ്റക്‌സ്‌നെറ്റ് വികസിപ്പിച്ചതെന്ന് കരുതപ്പെടുന്നു.ഇറാന്റെ ആണവപദ്ധതികളെ യുഎസ് നയിക്കുന്ന പാശ്ചാത്യ ചേരി എന്നും ഭയത്തോടെയും സംശയത്തോടെയുമാണ് നോക്കികാണുന്നത്. ഇസ്രയേൽ മൂന്നു പതിറ്റാണ്ടുകളായി ഇറാനുമായി ശീതയുദ്ധ സമാനമായ ഉരസലുകളിലുമാണ്.

രണ്ടു വർഷം മുൻപ് ലോകത്തെ ആശങ്കയിലാക്കിയ  വാനാക്രൈ പോലെ ഒരു വൈറസല്ല സ്റ്റക്‌സ്‌നെറ്റ്. വാനാക്രൈ ഒരു ശൃംഖലയിലെ എല്ലാ കംപ്യൂട്ടറുകളെയും ലക്ഷ്യം വയ്ക്കുമ്പോൾ സ്റ്റക്‌സ്‌നെറ്റിന് ആ ചിന്തയില്ലായിരുന്നു. യുറേനിയം സമ്പൂഷ്ടീകരണവുമായി ബന്ധപ്പെട്ടുള്ള സംവിധാനങ്ങളെ നിയന്ത്രിക്കുന്ന കംപ്യൂട്ടറുകളെ മാത്രമാണ് സ്റ്റക്‌സ്‌നെറ്റ് ലക്ഷ്യം വച്ചത്. ഇതു കൊണ്ട് തന്നെയാണ് യുഎസും ഇസ്രയേലും സംശയനിഴലിൽ വന്നെത്തിയതും. ഏതായാലും ലോകത്തിലെ ആദ്യ സൈബർ യുദ്ധ ആയുധമായാണു സ്‌കൈനെറ്റ് വിശേഷിപ്പിക്കപ്പെടുന്നത്.

natanz-iran
Photo: Shutterstock

വിവരങ്ങൾ ചോർത്തുകയോ അല്ലെങ്കിൽ കംപ്യൂട്ടർ ശൃംഖലയെ സ്തംഭിപ്പിക്കുകയോ ചെയ്യുന്ന പതിവ് വൈറസ് ശൈലിക്കപ്പുറം ഒരു കംപ്യൂട്ടറുമായി ബന്ധപ്പെട്ടുള്ള യന്ത്രവത്കൃതഭാഗങ്ങളെ നിയന്ത്രിക്കുക എന്ന ആശ്ചര്യജനകമായ രീതിയായിരുന്നു ഈ നിഗൂഢ ആയുധത്തിനുള്ളത്.

നടാൻസ് ആണവനിലയത്തിന് 2010ൽ ഇന്റർനെറ്റുമായി യാതൊരു ബന്ധവുമില്ലായിരുന്നു. നിലയത്തിലെ കംപ്യൂട്ടറുകളെല്ലാം ഒരു സ്വകാര്യ നെറ്റ്വർക്ക് വഴി കണക്ടഡായിരുന്നെങ്കിലും അട്ടിമറികൾ ഭയന്ന് ഇവയെ ഒന്നും സൈബർ ലോകവുമായി ബന്ധിപ്പിച്ചിരുന്നില്ല. എന്നാൽ ഇസ്രയേലി ചാരസംഘടനയായ മൊസാദിന്റെ തന്ത്രപരമായ പദ്ധതിയിൽ ഒരു ചാരൻ നിലയത്തിനുള്ളിൽ കടന്ന് തന്റെ കൈയിലുള്ള പെൻഡ്രൈവിൽ നിന്ന് നിലയത്തിലെ കംപ്യൂട്ടർ സംവിധാനത്തിലേക്കു വൈറസിനെ കടത്തുകയായിരുന്നെന്നു കരുതപ്പെടുന്നു.

അകത്തു കയറിയ വൈറസ് ദീർഘനാൾ ഉറങ്ങിക്കിടന്നു, തന്റെ നിയോഗം വന്നെത്തുന്നതും കാത്ത്. ഒടുവിൽ അതു സംഭവിച്ചു.ഒരു ദിവസം വൈറസുകൾ ഉണർന്നെണീറ്റു. നിലയത്തിന്റെ സംവിധാനങ്ങളെല്ലാം സുഗമമായ രീതിയിൽ തന്നെ പ്രവർത്തിക്കുന്നുണ്ടെന്ന് ഇറാനിയൻ അധികൃതരെ വൈറസ് തെറ്റിദ്ധരിപ്പിച്ചു. അതിനൊപ്പം തന്നെ തങ്ങളുടെ ഉടമസ്ഥർക്ക് നിലയത്തിന്റെ നിയന്ത്രണം നേടിക്കൊടുക്കുകയും ചെയ്തു അവർ.

പിന്നീട് ലോകം ഞെട്ടിയ സംഗതികളാണ് നടാൻസ് നിലയത്തിൽ നടന്നത്. യുറേനിയം സമ്പുഷ്ടീകരണത്തിൽ പ്രധാന പങ്കു വഹിക്കുന്ന, നിലയത്തിലെ ഏഴായിരത്തോളം സെൻട്രിഫ്യൂജുകൾ അധികരിച്ച വേഗത്തിൽ കറങ്ങി. ഈ കറക്കത്തിലും തുടർന്നുടലെടുത്ത തകരാറിലും നിലയത്തിന്റെ കാതലായ സംവിധാനങ്ങൾക്കു തകർച്ചയും കേടുപാടുകളും പറ്റി. നടാൻസ് പൂർണമായും നിയന്ത്രണത്തിലല്ലാതെയായി. ഇറാന്റെ ആണവമേഖലയ്ക്ക് വലിയ ആഘാതമാണ് ഇതു മൂലം സംഭവിച്ചത്.കഴിഞ്ഞ ജൂലൈയിലും നടാൻസ് നിലയത്തിൽ ഒരു സെൻട്രിഫ്യൂജ് പൊട്ടിത്തെറിച്ചിരുന്നു. ഇതും സൈബർ ആക്രമണമാണെന്നായിരുന്നു ഇറാനിയൻ അധികൃതർ പറഞ്ഞത്.

stuxnet
Photo : Shutterstock

സ്റ്റക്‌സ്‌നെറ്റ് ആരാണ് നിർമിച്ചതെന്ന് ഇന്നും ഒരു ചുരുളഴിയാ രഹസ്യമാണ്. എന്നാൽ യുഎസ്, ഇസ്രയേൽ ഇന്റലിജൻസ് ഏജൻസികളുമായി എപ്പോഴും സാങ്കേതിക ലോകം സ്റ്റക്‌സ്‌നെറ്റിനെ ബന്ധപ്പെടുത്തുന്നുണ്ട്.യുഎസിന്റെ കുപ്രസിദ്ധമായ ഓപ്പറേഷൻ ഒളിംപിക് ഗെയിംസുമായി ബന്ധപ്പെട്ടാണ് സ്റ്റക്‌സ്‌നെറ്റ് വികസിപ്പിച്ചതെന്നു പരക്കെ അഭ്യൂഹമുണ്ട്. 2011ൽ ഇസ്രയേൽ സൈന്യാധിപനായ ഗാബി അഷ്‌കെനാസി, അതീവ സ്വകാര്യമായി നടത്തിയ വിരമിക്കൽ ചടങ്ങിന്റെ വിഡിയോ ലീക്കായി. ഇതിൽ പ്രസംഗത്തിനിടെ സ്റ്റക്‌സ്‌നെറ്റ് തന്റെ കരിയറിലെ ഏറ്റവും വലിയ വിജയമാണെന്നു പറഞ്ഞത് ഇസ്രയേലിന്റെ പങ്കും വെളിവാക്കി.സിഐഎ മുൻ ഡയറക്ടർ മൈക്കൽ ഹെയ്ഡൻ സ്റ്റക്‌സ്‌നെറ്റിനെ, അണുബോംബു പോലെ സവിശേഷമായ ഒരു വമ്പൻ ആയുധം എന്നാണു വിശേഷിപ്പിച്ചത്.

English Summary: Iran nuclear attack: Mystery surrounds nuclear sabotage at Natanz

തൽസമയ വാർത്തകൾക്ക് മലയാള മനോരമ മൊബൈൽ ആപ് ഡൗൺലോഡ് ചെയ്യൂ
MORE IN DEFENCE
SHOW MORE
ഇവിടെ പോസ്റ്റു ചെയ്യുന്ന അഭിപ്രായങ്ങൾ മലയാള മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.
FROM ONMANORAMA