sections
MORE

വിലക്കുറവ് ‘മാജിക്’മായി വീണ്ടും ഷവോമി; റെഡ്മി നോട്ട് 6 പ്രോ ഇന്ത്യയിലെത്തി

note-6-pro
SHARE

ഏറെ കാത്തിരിപ്പിനു ശേഷം ചൈനീസ് സ്മാർട് ഫോൺ കമ്പനിയായ ഷവോമിയുടെ പുതിയ ഹാൻഡ്സെറ്റ് റെഡ്മി നോട്ട് 6 പ്രോ ഇന്ത്യയിലെത്തി. ഈ ഫോണ്‍ ദുബായിലും തായ്‌ലന്‍ണ്ടിലും നേരത്തെ അവതരിപ്പിച്ചതാണ്. ഫ്ലിപ്കാർട്ട് എംഐ സ്റ്റോർ വഴി വെള്ളിയാഴ്ച മുതൽ വിൽപ്പന തുടങ്ങും. റെഡ്മി നോട്ട് 6 പ്രോയുടെ 4/64 ജിബി, 6/64 ജിബി വേരിയന്റുകളുടെ വില യഥാക്രമം 13,999, 15,999 രൂപയാണ്. ബ്ലാക്ക് ഫ്രൈഡെ സെയിൽ പ്രമാണിച്ച് 1000 രൂപയുടെ അധിക ഇളവ് ലഭിക്കും. എച്ച്ഡിഎഫ്സി കാർഡ് ഉപയോഗിച്ച് വാങ്ങുന്നവർക്ക് 500 രൂപയുടെ ക്യാഷ്ബാക്ക് ഓഫറുമുണ്ട്.

റെഡ്മി നോട്ട് 6 പ്രോ ഫീച്ചറുകൾ

പിന്നില്‍ നിന്നു നോക്കിയാല്‍ തൊട്ടു മുന്‍പുള്ള മോഡലായ റെഡ്മി നോട്ട് 5 പ്രോയെ അനുസ്മരിപ്പിക്കുന്ന രീതിയിലാണ് നിര്‍മിതി. അതു സ്വാഭാവികം. നാടകീയമായ ഡിസൈന്‍ മാറ്റം റെഡ്മി നോട്ട് സീരിസിന് ഈ വര്‍ഷവും വരുത്താന്‍ ഷവോമി ശ്രമിച്ചിട്ടില്ല. പക്ഷേ, 6000 സീരിസ് അലൂമിനിയം ഉപയോഗിച്ചാണ് നിര്‍മിച്ചിരിക്കുന്നത് എന്നതിനാല്‍ മുന്‍ മോഡലിനെക്കാള്‍ കൂടുതല്‍ ഉറപ്പുള്ള ബോഡിയായരിക്കും 6 പ്രോയ്ക്ക്.

റെഡ്മി നോട്ട് 6 പ്രോയുടെ ഡിസ്‌പ്ലെയ്ക്ക് മുന്‍ മോഡലിനെക്കാള്‍ അല്‍പ്പം വലിപ്പക്കൂടുതലുണ്ട്. സ്ക്രീനിന് 6.26 ഇഞ്ചുണ്ട്‍. സെല്‍ഫിയെടുക്കാന്‍ 20MP+2MP ഇരട്ട ക്യാമറകളെ നിയോഗിച്ചിരിക്കുന്നതാണ് മറ്റൊരു മാറ്റം. നോച്ചുളള സ്‌ക്രീനിന്റെ അനുപാതം 19:9 ആണ്. മുകളിലും താഴെയുമുള്ള ബെസല്‍ എടുത്തു നില്‍ക്കുകയും ചെയ്യുന്നു.

പിന്നില്‍ 12MP+5MP ഇരട്ട ക്യാമറ സിസ്റ്റം തന്നെയാണ് പിടിപ്പിച്ചിരിക്കുന്നത്. പക്ഷേ, റെഡ്മി നോട്ട് 5 പ്രോയുടെ സെന്‍സറുകളല്ല പിടിപ്പിച്ചിരിക്കുന്നത്. മുന്‍ മോഡലിന് ഫെയ്‌സ് (phase) ഡിറ്റക്‌ഷന്‍ ഓട്ടോഫോക്കസ് സിസ്റ്റം ആയിരുന്നുവെങ്കില്‍ പുതിയ ഫോണിന് ഡ്യൂവന്‍ പിക്‌സല്‍ ഓട്ടോഫോക്കസാണ്. ക്യാനന്റെ ഡിഎസ്എല്‍ആര്‍ ക്യാമറകളില്‍ കാണുന്ന ഈ സിസ്റ്റം കൂടുതല്‍ മെച്ചപ്പെട്ട ഓട്ടോഫോക്കസ് പ്രകടനം നടത്തുമെന്നു കമ്പനി കരുതുന്നു. പ്രധാന സെന്‍സറിന് 1.4um വലിപ്പമുള്ള പിക്‌സലുകളുമുണ്ട്. അപേര്‍ചര്‍ f/1.9 ആണ്. ഇതെല്ലാമാണെങ്കിലും, പ്രകടനത്തില്‍ എന്തു വ്യത്യാസം വരുമെന്ന് കണ്ടറിയേണ്ടിവരും. മുന്‍-പിന്‍ ക്യാമറകള്‍ക്ക് പോര്‍ട്രെയ്റ്റ് മോഡുമുണ്ട്.

ആന്‍ഡ്രോയിഡ് ഒറിയോ കേന്ദ്രമാക്കി നിര്‍മിച്ച MIUI 10 Global ROM ആണ് ഓപ്പറേറ്റിങ് സിസ്റ്റം. എന്നാല്‍, ആന്‍ഡ്രോയിഡ് പൈ ഉപയോഗിച്ചുള്ള എംഐയുഐ ഉടനെ ഈ ഫോണിനു ലഭ്യമാക്കുമെന്ന് കമ്പനി അറിയിച്ചു. യൂസര്‍ ഇന്റര്‍ഫെയ്‌സ് കൂടുല്‍ മെച്ചപ്പെട്ടിട്ടുണ്ട്. ഫുള്‍ സ്‌ക്രീന്‍ ജെസ്ചര്‍ ഓണ്‍ ചെയ്യുമ്പോള്‍ ഉപയോഗിക്കേണ്ട വിധം പറഞ്ഞു തരും. ഇത് പല ഉപയോക്താക്കള്‍ക്കും പ്രയോജനപ്പെടും. തുറന്നിരിക്കുന്ന ആപ്പില്‍ നിന്ന് ഹോം സ്‌ക്രീനിലെത്താന്‍ സ്‌ക്രീനിന്റെ താഴെ നിന്ന് മുകളിലേക്കു സ്വൈപ് ചെയ്താല്‍ മതിയാകും. താഴെ നിന്നു സ്വൈപ് ചെയ്ത് ഹോള്‍ഡ് ചെയ്താല്‍ തുറന്നിരിക്കുന്ന ആപ്പുകളിലെത്താം. തുറന്നിരിക്കുന്ന ഒരാപ്പില്‍ നിന്ന് ഇടത്തോട്ടോ വലത്തോട്ടോ സ്വൈപ് ചെയ്താല്‍ മുൻപ് തുറന്നിരുന്ന ആപ്പുകളിലുമെത്താം. ഈ രീതികള്‍ പൊതുവെ സങ്കീര്‍ണ്ണമല്ലെന്നു പറയേണ്ടി വരും.

redmi-note-6-pro

മാറ്റം വരാത്തത് എവിടെയൊക്കെ?  

റെഡ്മി നോട്ട് 5 പ്രോയെപ്പോലെ തന്നെ സ്‌നാപ്ഡ്രാഗണ്‍ 636 പ്രൊസസറാണ് ഫോണിനെ നിയന്ത്രിക്കുന്നത്. അതുകൊണ്ടുതന്നെ പ്രകടനത്തില്‍ മുന്‍ മോഡലിനെ അപേക്ഷിച്ച് നാടകീയമായ വ്യത്യാസമൊന്നും പ്രതീക്ഷിക്കേണ്ട. എന്നാല്‍, റെഡ്മി നോട്ട് 5 പ്രോ ഒരു സ്ഥരിതയുള്ള ഫോണായാണ് പൊതുവെ വിലയിരുത്തപ്പെടുന്നത്. അതുകൊണ്ടു തന്നെ പുതിയ ഫോണും മോശം വരാനും വഴിയില്ല. 6GB RAM + 64GB/4GB RAM+64GB എന്നീ രണ്ടു വേരിയന്റുകളാണ് എത്താന്‍ വഴി. ബാറ്ററി 4000 mAh ആണ്. മൈക്രോ യുഎസ്ബി ചാര്‍ജിങ് പോര്‍ട്ട്, ക്വാല്‍കമിന്റെ ക്വിക് ചാര്‍ജ് 3.0, ഡ്യുവല്‍  ഹൈബ്രിഡ് സിം ട്രെ തുടങ്ങിയവയുമുണ്ട്.

തൽസമയ വാർത്തകൾക്ക് മലയാള മനോരമ മൊബൈൽ ആപ് ഡൗൺലോഡ് ചെയ്യൂ
MORE IN MOBILES
SHOW MORE
FROM ONMANORAMA