ആപ്പിൾ ഐഫോൺ 7 ഇന്ത്യയിൽ നിർമിക്കും, ലക്ഷ്യം വില കുറച്ചു വിൽക്കൽ

ലോകത്തെ ഏറ്റവും വിലിയ സ്മാർട് ഫോൺ നിർമാണ കമ്പനിയായ ആപ്പിളിന്റെ ഐഫോൺ 7 ഇന്ത്യയിൽ നിർമിച്ചു വിതരണം ചെയ്യും. ഐഫോൺ എസ്ഇ, ഐഫോൺ 6 എന്നിവ കൂടാതെ ഐഫോൺ 7 നും നിർമാണം തുടങ്ങി കഴിഞ്ഞു. ചൈനയിൽ വൻ പ്രതിസന്ധിയിലായ ഐഫോൺ വിപണി ഇന്ത്യയിലൂടെ തിരിച്ചുപിടിക്കാൻ ലക്ഷ്യമിട്ടുള്ളതാണ് ആപ്പിളിന്റെ പുതിയ നീക്കമെന്നാണ് വിദഗ്ധർ പറയുന്നത്.

ഐഫോൺ 7 ന്റെ നിർമാണം തുടങ്ങിയതായി ആപ്പിൾ ഔദ്യോഗികമായി അറിയിച്ചിട്ടുണ്ട്. ഐഫോൺ 7 മെയ്ക്ക് ഇൻ ഇന്ത്യക്ക് കീഴിൽ വരുന്നതോടെ ചെലവ് കുറയും. നിലവിൽ ഐഫോണുകൾ വിദേശത്തു നിന്നു ഇറക്കുമതി ചെയ്യാൻ വലിയ നികുതി നൽകേണ്ടതുണ്ട്. ഇന്ത്യയിൽ നിർമിക്കുമ്പോൾ ഇതൊഴിവാക്കാം. ഉപഭോക്താക്കൾക്ക് കുറഞ്ഞ നിരക്കിൽ ഐഫോൺ 7 വാങ്ങാനും സാധിക്കും.

ബെംഗളുരുവിലെ പ്ലാന്റിലാണ് ഐഫോൺ 7 നിർമിക്കുന്നത്. ആപ്പിളിന്റെ തായ്‌വാനിലെ നിർമാണ കമ്പനി വിസ്റ്റോൺ ആണ് ഇന്ത്യയിലെ പ്ലാന്റിലും ഐഫോണുകൾ നിർമിക്കുന്നത്. ഇന്ത്യയിലെ നിർമാണ യൂണിറ്റ് വികസിപ്പിക്കുന്നതിനായി ആപ്പിളിന്റെ 5000 കോടിയുടെ പദ്ധതിക്ക് കേന്ദ്ര സർക്കാർ അനുമതി നൽകിയിരുന്നു.