വാവെയ് പി30 പ്രോ മുതൽ അഞ്ചു ക്യാമറയുള്ള നോക്കിയ വരെ ഈ മാസം ഇന്ത്യയിലെത്തുന്ന ചില ഫോണുകള്
Mail This Article
ടെക്നോളജി മുറ്റിയ സ്മാര്ട്ഫോണുകള് ഒന്നൊന്നായി അനാവരണം ചെയ്യപ്പെടുകയാണ്. ഈ വര്ഷം ഇറങ്ങിയ ഏറ്റവും മികച്ച ക്യാമറാ ഫോണായ വാവെയ് പി30 പ്രോ അടക്കം ഏതാനും ഹൈ-എന്ഡ് ഫോണുകള് ഈ മാസം ഇന്ത്യയിലെത്തുന്നുണ്ട്. പ്രതീക്ഷിക്കുന്ന മോഡലുകള്:
വാവെയ് പി30 പ്രോ
സ്മാര്ട്ഫോണ് ഫോട്ടോഗ്രാഫിയില് വിപ്ലവകരമായ മാറ്റം സൃഷ്ടിച്ചാണ് വാവെയ് പി30 പ്രോ എത്തിയിരിക്കുന്നത്. പാരിസില് അനാവരണം ചെയ്ത ഈ ഫോണ് ആമസോണ് എക്സ്ക്ലൂസിവ് ആയിരിക്കുമെന്നാണ് വാര്ത്തകള് പറയുന്നത്. ഇന്ത്യയിലെ വില ഏപ്രില് 9ന് വെളിപ്പെടുത്തും എന്നും കമ്പനി പറയുന്നു. എന്നാല്, പി30 പ്രോ മോഡലിന് ഒപ്പം അവതരിപ്പിച്ച പി30 ഫോണ് ഇന്ത്യയില് വില്പ്പനയ്ക്കെത്തില്ല എന്നും കരുതുന്നു. ആപ്പിളിനും സാംസങിനും അപ്പുറം ക്യാമറാ ടെക്നോളജിയെ കൊണ്ടുചെന്ന ഫോണാണിത്. നാളിതുവരെ ഇറങ്ങിയ സ്മാര്ട്ഫോണുകളില് ക്യാമറാ ടെക്നോളജിയില് പി30 പ്രോയ്്ക്കൊപ്പം വരുന്ന ഒന്നുമില്ല എന്ന് റിവ്യൂ ചെയ്തവര് ആണയിടുന്നു. ലെന്സ് നിര്മാണ മികവും കംപ്യൂട്ടേഷണല് ഫോട്ടോഗ്രാഫിയുടെ മുന്നേറ്റങ്ങളെയും ബുദ്ധിപൂര്വം സമ്മേളിപ്പിച്ച ഈ മോഡല് സ്മാര്ട്ഫോണ് ഫോട്ടോഗ്രാഫി ഗൗരവമായി എടുക്കുന്നവര്ക്ക് പ്രിയങ്കരമാകുമെന്നാണു പ്രതീക്ഷ.
സാംസങ് ഗ്യാലക്സി എ90
ഗ്യാലക്സി എ സീരിസിലും, എം സീരിസിലും ഇപ്പോള് സാംസങ് തുടരെ തുടരെ ഫോണുകള് ഇറക്കിക്കൊണ്ടിരിക്കുകയാണ്. ഇതാകട്ടെ, ഇന്ത്യയിലെ സ്മാര്ട്ഫോണ് വില്പ്പന തങ്ങള്ക്ക് അനുകൂലമാക്കാനുള്ള ശ്രമത്തിന്റെ ഭാഗമായി കൂടെയാണെന്നാണു പറയപ്പെടുന്നത്. ഷവോമിയെപ്പോലെ തന്നെ വില കുറച്ച മോഡലുകള് കൂടുതല് ഫീച്ചറുകളുമായി എത്തിക്കുക എന്ന ദൗത്യമാണ് കമ്പനി ഇപ്പോള് ഏറ്റെടുത്തിരിക്കുന്നത്. എ സീരിസിലെ ഏറ്റവും മുന്തിയ ഫോണായ എ90 ഈ മാസം തന്നെ അവതരിപ്പിക്കുമെന്നും അത് ഇന്ത്യയില് ഏപ്രിലില് തന്നെ വില്പ്പനങ്ങുമെന്നും കരുതുന്നു. ധാരാളം ഫീച്ചറുകള് ഉണ്ടെങ്കിലും ഫ്ലാഗ്ഷിപ് ഫോണുകളുടെ വില ഉണ്ടാവില്ല എന്നാണ് അനുമാനം.
റിയല്മി 3 പ്രോ
റിയല്മി 2 പ്രോയുടെ പിന്ഗാമിയെ തങ്ങള് ഉടന് മാര്ക്കറ്റിലെത്തിക്കും എന്നു കമ്പനി പറഞ്ഞിട്ടുണ്ട്. ഫോണിനെ പറ്റി അധികം കാര്യങ്ങള് വെളിപ്പെടുത്തിയിട്ടില്ല. ക്വാല്കം സ്നാപ്ഡ്രാഗണ് 675 ആയിരിക്കും ഇതിന്റെ പ്രോസസര് എന്നാണ് അറിയുന്നത്.
അഞ്ചു ക്യാമറകളുള്ള നോക്കിയ 9 പ്യൂവര്വ്യൂ
എച്എംഡി ഗ്ലോബല് പുറത്തിറക്കിയ നോക്കിയ 9 പ്യൂവര്വ്യൂ എല്ലാ രാജ്യങ്ങളിലും വില്പ്പനയ്ക്കെത്തില്ല എന്നാണ് പറയുന്നത്. എന്നാല്, നോക്കിയ എന്ന പേരിനോട് പ്രേമത്തിലായ ഇന്ത്യക്കാരെ നിരാശരാക്കാന് കമ്പനി തയാറല്ല. പ്യൂവര്വ്യൂ നാമവുമായി പുനര്ജനിക്കുന്ന ആദ്യ ആന്ഡ്രോയിഡ് മോഡലായ ഇതിന് 5 പിന് ക്യാമറകളുടെ അകമ്പടിയുണ്ട്. ഫോട്ടോഗ്രാഫിയില് വാവെയ് പി30 പ്രോയെ പോലെ ഒരു ഓള്റൗണ്ടര് ആയിരിക്കില്ല എങ്കിലും ഏറ്റവും മികച്ച ഫയലുകള് ലഭ്യമാകാന് സാധ്യതയുള്ള മോഡലുകളിലൊന്നാണിത്. ക്യമറകള് അഞ്ചെണ്ണം ഉണ്ടെങ്കിലും അവയില് ഒന്നു പോലും ടെലീ ലെന്സോ, അള്ട്രാ വൈഡോ അല്ല എന്നതാണ് പ്രധാന വാര്ത്ത.
പിന്നില് വര്ത്തുളാകൃതിയില് ക്രമീകരിച്ചിരിക്കുന്ന അഞ്ചു ലെന്സുകളും സൈസ് (Zeiss) നിര്മിച്ചതാണ്. ഇവയെല്ലാം 28 എംഎം, ള/1.8 അപര്ചര് ഉള്ളവയാണ്. ഇവയില് മൂന്നെണ്ണം മോണോക്രോം ആണ്. രണ്ടെണ്ണം ആര്ജിബിയും. ആറാമതു കാണുന്ന ലെന്സ് ഡെപ്ത് വിവരം പിടിച്ചെടുക്കാനുള്ളതാണ്.
കഴിഞ്ഞ വര്ഷത്തെ പ്രൊസറായ സ്നാപ്ഡ്രാഗണ് 845 ആണ്. ഇതിനൊപ്പം ഫോട്ടോ പ്രൊസസുചെയ്യുന്നതിനു മാത്രമായി ഒരു ചിപ്പും ഉണ്ട്. 6ജിബി റാമും, 128 ജിബി സംഭരണ ശേഷിയുമാണ് ഫോണിന് ഉള്ളത്. 699 ഡോളര് വിലയിട്ടിരിക്കുന്ന ഫോണ് പരീക്ഷിക്കാന് കൈ തരിക്കുന്ന നിരവധി ഫോട്ടോഗ്രാഫി പ്രേമികള് ഉണ്ട്.
ഗൂഗിളും ആപ്പിളും അടക്കമുളള കമ്പനികള് കൂടതലും സോഫ്റ്റ്വെയറിനെ ആശ്രയിക്കുന്നതായി കാണാം. എന്നാല്, നോക്കിയ, സോഫ്റ്റ്വെയറിനൊപ്പം ഹാര്ഡ് വെയറിനും പ്രാധാന്യം നല്കുന്നു. ഇമെജ് ക്വാളിറ്റിയില് നോക്കിയ 9 പ്യൂവര്വ്യൂ ഒരു വഴിത്തിരിവായാല് സ്മാര്ട്ഫോണ് ക്യാമറാ നിര്മാണം പുതിയ ഘട്ടത്തിലേക്കു കടന്നേക്കും. ടെലീ ലെന്സോ അള്ട്രാ വൈഡ് ലെന്സോ വേണമെന്നുള്ളവര്ക്ക് ഈ ഫോണ് കൊള്ളില്ല. എന്നാല്, ഫോട്ടോയുടെ ക്വാളിറ്റി പരമാവധി വേണമെന്നുള്ളവര്ക്ക് ഇതു പരീക്ഷിച്ചു നോക്കാവുന്നതാണ്.