റെഡ്മി കെ20 പ്രോ വണ്പ്ലസ് 7ന് വെല്ലുവിളിയാകുമോ?
Mail This Article
സ്മാര്ട് ഫോണ് നിര്മാണത്തില് പുതു ചരിത്രമെഴുതിയ ഷവോമിയുടെ സബ്-ബ്രാന്ഡ് റെഡ്മിയുടെ പ്രധാന മോഡലായ കെ20 പ്രോ അടുത്തയാഴ്ച അവതരിപ്പിക്കുകയാണ്. ലോകത്തെ ഏറ്റവും മികച്ച പ്രോസസറുകളിലൊന്നായ സ്നാപ്ഡ്രാഗണ് 855നെ കേന്ദ്രമാക്കി നിര്മിക്കുന്ന ഈ മോഡല് വണ്പ്ലസ് 7 മോഡലുകള്ക്ക് കനത്ത വെല്ലുവിളി ഉയര്ത്തിയേക്കാമെന്നാണ് റിപ്പോര്ട്ടുകള് പറയുന്നത്.
മൂന്നു പിന് ക്യാമറകളടങ്ങുന്ന സെറ്റ്-അപ് ആണ് പിന്നില്. ഇവയില് അല്പം അകന്നു നില്ക്കുന്നതാണ് 48 മെഗാപിക്സൽ റെസലൂഷനുള്ള പ്രധാന സെന്സർ. ഇവയ്ക്കൊപ്പം ഒരു എല്ഇഡി ഫ്ലാഷുമുണ്ട്. പിന്നില് ഒരു ഫിംഗര്പ്രിന്റെ സെന്സര് ഇല്ലാ എന്നത് ഇന്-ഡിസ്പ്ലെ സെന്സറാണുള്ളത് എന്നതിന്റെ സൂചനയായി ചിലര് പറയുന്നു. 7-ാം തലമുറയിലെ ഒപ്ടിക്കല് ഇന്-ഡിസ്പ്ലെ ഫിംഗര്പ്രിന്റ് സെന്സറാണ് ഉണ്ടാകുക. കെ20 പ്രോയ്ക്കൊപ്പം കെ20 മോഡലും ഇറക്കുന്നുണ്ട്. രണ്ടാമത്തെ മോഡലിന്റെ പ്രോസസര് സ്നാപ്ഡ്രാഗണ് 700 സീരിസിലെ ചിപ് ആയിരിക്കുമെന്നാണ് അറിയുന്നത്.
പ്രധാന ഫീച്ചറുകൾ നോക്കാം
6.39-ഇഞ്ച് വലുപ്പമുള്ള സൂപ്പര് അമോലെഡ് ഡിസ്പ്ലെയായിരിക്കും ഫോണിനുണ്ടാകുക. സ്ക്രീന് റെസലൂഷന് 1080 x 2340പി ആയിരിക്കും. ഫോണിന്റെ സ്ക്രീന്-ബോഡി അനുപാതം 91.2 ആയിരിക്കും. സ്ക്രീനിനു പ്രതിരോധം കോര്ണിങ് ഗോറില ഗ്ലാസ് 5 ഉപയോഗിച്ചായിരിക്കും.
ക്യാമറ
ക്യാമറയുടെ കാര്യത്തില് 48 മെഗാപിക്സൽ പ്രധാന സെന്സറും, 13 മെഗാപിക്സല് അള്ട്രാവൈഡ് ലെന്സും 8 മെഗാപിക്സൽ ടെലി ലെന്സുമായിരിക്കും ഉണ്ടാകുക. സെല്ഫിയുടെ കാര്യത്തില് 20 മെഗാപിക്സല് പോപ്-അപ് ക്യാമറായണ് പ്രതീക്ഷിക്കുന്നത്.
ബാറ്ററി
4,000എംഎഎച് ബാറ്ററിയും 27 വോട്സ് വരെ ക്വിക് ചാര്ജിങ് സപ്പോര്ട്ടും ഉണ്ടായിരിക്കും.
ഓപ്പറേറ്റിങ് സിസ്റ്റം
ആന്ഡ്രോയിഡ് 9 പൈ കേന്ദ്രമാക്കി നിര്മ്മിച്ച എംഐയൂഐ 10 ആയിരിക്കും ഒഎസ്.
ഇരു മോഡലുകളും 6ജിബി+64ജിബി, 6ജിബി+128ജിബി എന്നീ രണ്ടു വേരിയന്റുകളിലായിരിക്കും എത്തുക. യുഎസ്ബി ടൈപ്-സി പോര്ട്ട്, 3.5 എംഎം ജാക്ക് തുടങ്ങിയവയും ഉണ്ടായിരിക്കും. ഈ മോഡല് മേയ് 28ന് ചൈനയില് ഔദ്യോഗികമായി അവതരിപ്പിക്കുമെന്നാണ് പറയുന്നത്. ഷവോമി ഇന്ത്യയുടെ മാനേജിങ് ഡയറക്ടര് മനു ജെയ്ന് പറയുന്നത് അധികം താമസിയാതെ ഈ മോഡല് ഇന്ത്യയിലും വില്പനയ്ക്കെത്തുമെന്നാണ്.
അല്പം ചരിത്രം
കഴിഞ്ഞ വര്ഷം കമ്പനി തങ്ങളുടെ പോക്കോ ബ്രാന്ഡ് നെയ്മില് F1 മോഡലും അന്നത്തെ ഏറ്റവും മികച്ച പ്രോസസര് ഉപയോഗിച്ചു നിര്മിച്ചു വിറ്റിരുന്നു. സ്നാപ്ഡ്രാഗണ് 545 നിയന്ത്രിച്ച ആ മോഡലായിരുന്നു ഏറ്റവും വിലക്കുറവില് മികച്ച പ്രോസസറിന്റെ ശക്തി അനുഭവിപ്പിച്ചത്. തുടക്ക മോഡലിന് ഏകദേശം 21,000 രൂപയായിരുന്നു വില. പിന്നീടിത് 20,000 രൂപയ്ക്കു പോലും ഓണ്ലൈന് വെബ്സൈറ്റുകള് വിറ്റിരുന്നു. പോക്കോ F2 ഈ വര്ഷം അവതരിപ്പിക്കുമോ എന്നൊരു ചോദ്യം ഉയരുന്നു. അതോ, കുറഞ്ഞ വിലയ്ക്ക് മികച്ച പ്രോസസറിന്റെ സുഖം അനുഭവിപ്പിക്കാന് എത്തുന്നത് റെഡ്മി കെ20 പ്രോ ആയിരിക്കുമോ എന്നാണ് ഉയരുന്ന ചോദ്യം. എന്തായാലും മുന്തിയ പ്രോസസര് ഉപയോഗിച്ചു നിര്മിക്കുന്ന ഫോണുകളായ വണ്പ്ലസ് 7 തുടങ്ങിയവയ്ക്ക് വെല്ലുവിളി ഉയര്ത്താന് തന്നെയാണ് കെ20 പ്രോ എത്തുക എന്നാണ് ലഭിക്കുന്ന ആദ്യ സൂചനകള്.