വാവെയുടെ പോപ്പ്–അപ്പ് ക്യാമറ ഫോൺ ഇന്ത്യയിലേക്ക്, വില 20,000 രൂപ
Mail This Article
ചൈനീസ് കമ്പനിയായ വാവെയുടെ പോപ്പ്-അപ്പ് ക്യാമറ ഫോൺ ഇന്ത്യയിൽ ഈ മാസം അവതരിപ്പിക്കുമെന്ന് റിപ്പോർട്ട്. വാവെയ് പോപ്പ്–അപ്പ് ക്യാമറ ഫോണിന്റെ വില 20,000 രൂപയായിരിക്കുമെന്നാണ് കരുതുന്നത്. എന്നാൽ സ്മാർട് ഫോണിന്റെ പേര് വെളിപ്പെടുത്തിയിട്ടില്ല.
വിവോ, ഷോമി, ഒപ്പോ എന്നിവയുൾപ്പെടെ നിരവധി ബ്രാൻഡുകൾ ഇപ്പോൾ പോപ്പ്-അപ്പ് ക്യാമറ ഫോണുകൾ മിതമായ നിരക്കിൽ അവതരിപ്പിക്കുന്നുണ്ട്. എന്നാൽ വാവെയ് ഫോണിനെക്കുറിച്ചുള്ള വിശദാംശങ്ങൾ ഇതുവരെ പുറത്തുവന്നിട്ടില്ല. ഈ ഫോൺ ജൂലൈ അവസാനത്തോടെ വിപണിയിലെത്തും.
നിലവിൽ വാവെയ്ക്ക് പി സ്മാർട് ഇസഡ് എന്ന പേരിലുള്ള ഒരു പോപ്പ്-അപ്പ് സെൽഫി ക്യാമറ ഫോൺ മാത്രമേ ഉള്ളൂ. ഇന്ത്യയിൽ ആദ്യമായി ലോഞ്ച് ചെയ്യാൻ ഉദ്ദേശിക്കുന്ന പുതിയ ഫോൺ പി സ്മാർട് ഇസഡ് ആണെന്നും സൂചനകളുണ്ട്.
പി സ്മാർട് ഇസഡ് പോപ്പ്–അപ്പ് ക്യാമറ ഫോണിൽ 6.59 ഇഞ്ച് എഫ്എച്ച്ഡി + എൽസിഡി ഡിസ്പ്ലേയാണുള്ളത്. 4 ജിബി റാമും 64 ജിബി ഇന്റേണൽ സ്റ്റോറേജുമായി ഇറങ്ങിയ ഫോണിൽ കിരിൻ 710 എഫ് ചിപ്സെറ്റാണ് ഉൾപ്പെടുത്തിയിരിക്കുന്നത്.
16 എംപി പ്രൈമറി ക്യാമറയും 2 എംപി ഡെപ്ത് ക്യാമറയും അടങ്ങുന്ന ഡ്യുവൽ റിയർ ക്യാമറ സജ്ജീകരണമാണ് വാവെയ് പി സ്മാർട് ഇസഡിലുള്ളത്. മുന്നിലും പിന്നിലും എഐ സവിശേഷതകളുള്ള 16 എംപി സെൽഫി ക്യാമറയാണ് പോപ്പ്-അപ്പ് സംവിധാനത്തിലുള്ളത്. ആൻഡ്രോയിഡ് പൈ അടിസ്ഥാനമാക്കിയുള്ള EMUI 9.0 ഒഎസാണ് വാവെയ് പി സ്മാർട് ഇസഡിലുളളത്. 4,000 എംഎഎച്ച് ബാറ്ററി ശേഷിയുണ്ട്. ടൈപ്പ്-സി പോർട്ടിനെ പിന്തുണയ്ക്കുകയും ചെയ്യുന്നുണ്ട്.