വിവോയുടെ പുതിയ ഫോൺ വി 20 എസ്ഇ ഇന്ത്യയിലെത്തി, വില 20,990 രൂപ
Mail This Article
രാജ്യത്തെ മുൻനിര സ്മാർട് ഫോൺ വിതരണ കമ്പനിയായ വിവോയുടെ പുതിയ ഹാൻഡ്സെറ്റ് ഇന്ത്യയിലെത്തി. വി 20 സീരീസിലെ ഏറ്റവും പുതിയ ഹാൻഡ്സെറ്റ് വിവോ വി 20 എസ്ഇ 20,990 രൂപയ്ക്കാണ് അവതരിപ്പിച്ചത്. നവംബർ 3 മുതൽ സ്മാർട് ഫോൺ വിൽപ്പനയ്ക്കെത്തും. വിവോ ഇന്ത്യ ഇ-സ്റ്റോർ, പ്രധാന ഇ-കൊമേഴ്സ് പോർട്ടലുകൾ എന്നിവ വഴി വാങ്ങാം.
ക്വാൽകോം സ്നാപ്ഡ്രാഗൺ 665 ചിപ്സെറ്റിനൊപ്പം 8 ജിബി റാമും 128 ജിബി ഇന്റേണൽ സ്റ്റോറേജുമാണ് (1 ടിബി വരെ വികസിപ്പിക്കാവുന്നതാണ്) സ്മാർട് ഫോണിന്റെ കരുത്ത്. 6.44 ഇഞ്ച് അമോലെഡ് ഡിസ്പ്ലേയിൽ വാട്ടർ ഡ്രോപ്പ് നോച്ച് ഉള്ള ഈ ഹാൻഡ്സെറ്റിന്റെ സ്ക്രീൻ-ടു-ബോഡി അനുപാതം 90.12 ശതമാനം ആണ്.
സൂപ്പർ എം നൈറ്റ് സെൽഫി, ഓറ സ്ക്രീൻ ലൈറ്റ് എന്നിവയും അതിലേറെയും ഫീച്ചറുകൾ വാഗ്ദാനം ചെയ്യുന്ന 32 മെഗാപിക്സലിന്റേതാണ് മുൻ ക്യാമറ. എഫ് / 1.8 അപ്പേർച്ചറുള്ള 48 എംപി പ്രൈമറി ഷൂട്ടർ, എഫ് / 2.2 അപ്പേർച്ചറുള്ള 8 എംപി അൾട്രാവൈഡ് സെൻസർ, എഫ് / 2.4 അപ്പേർച്ചറുള്ള 2 എംപി ബോക്കെ ലെൻസ് എന്നിവ ഉൾപ്പെടുന്ന ലംബ ട്രിപ്പിൾ ക്യാമറ സംവിധാനമാണ് ഫോണിന്റെ പിൻവശത്ത്.
4100 എംഎഎച്ച് ആണ് ബാറ്ററി. ഇത് 33W ഫ്ലാഷ്ചാർജ് സാങ്കേതികവിദ്യയെ പിന്തുണയ്ക്കുന്നതാണ്. കണക്റ്റിവിറ്റി ഓപ്ഷനുകളിൽ 4 ജി എൽടിഇ, വൈ-ഫൈ, ബ്ലൂടൂത്ത് 5.0, ജിപിഎസ് / എ-ജിപിഎസ്, എഫ്എം റേഡിയോ, ചാർജ് ചെയ്യുന്നതിനായി യുഎസ്ബി ടൈപ്പ്-സി പോർട്ട് എന്നിവ ഉൾപ്പെടുന്നു.
English Sumamry: Vivo V20 SE with Snapdragon 665 chip launched for Rs 20,990