sections
MORE

ജിയോഫോൺ നെക്സ്റ്റ്: ലോകത്തെ ഏറ്റവും വിലകുറഞ്ഞ ആൻഡ്രോയിഡ് ഫോണായേക്കാം – മുകേഷ് അംബാനി

jiophone-next
SHARE

ഏറെ നാളത്തെ കാത്തിരിപ്പിനു ശേഷം റിലയൻസ് ജിയോയുടെ പുതിയ സ്മാർട് ഫോൺ അവതരിപ്പിച്ചു. കമ്പനിയുടെ 44-ാമത് വാർഷിക പൊതുയോഗത്തിലാണ് ചെയർമാൻ മുകേഷ് അംബാനി പുതിയ ആൻഡ്രോയിഡ് ഫോൺ പുറത്തിറക്കിയത്. ഗൂഗിളുമായി സഹകരിച്ചാണ് ജിയോഫോൺ നെക്സ്റ്റ് എന്ന സ്മാർട് ഫോൺ നിർമിച്ചിരിക്കുന്നത്. ആൻഡ്രോയിഡിന്റെ പ്രത്യേക പതിപ്പിലാണ് ജിയോയുടെ പുതിയ ഹാൻഡ്സെറ്റ് പ്രവർത്തിക്കുക. ഇത് ലോകത്തിലെ തന്നെ ഏറ്റവും വില കുറഞ്ഞ ആൻഡ്രോയിഡ് ഫോൺ ആകുമെന്നാണ് മുകേഷ് അംബാനി അവകാശപ്പെട്ടത്.

ജിയോഫോൺ, ജിയോഫോൺ 2 എന്നിവയ്ക്ക് ശേഷമാണ് ജിയോഫോൺ നെക്സ്റ്റ് വരുന്നത്. ജിയോഫോൺ 1, ജിയോഫോൺ 2 എന്നിവ പ്രധാനമായും ചില സ്മാർട് സവിശേഷതകളുള്ള ഫീച്ചർ ഫോണുകളായിരുന്നു. എന്നാൽ, ജിയോഫോൺ നെക്സ്റ്റ് ആൻഡ്രോയിഡ് ഫീച്ചറുകളുള്ള ഒരു പൂർണ സ്മാർട് ഫോണാണ്. ഈ ഫോണിൽ ഗൂഗിൾ പ്ലേ സ്റ്റോറിലെ ആപ്പുകളും പ്രവർത്തിക്കും.

ഗൂഗിൾ, ജിയോ ടീമുകൾ സംയുക്തമായി മികച്ച സ്മാർട് ഫോണായ ജിയോഫോൺ നെക്സ്റ്റ് വികസിപ്പിച്ചെടുത്തുവെന്ന് അറിയിക്കുന്നതിൽ സന്തുഷ്ടനാണ്. ഗൂഗിൾ, ജിയോയിൽ നിന്നുള്ള മുഴുവൻ ആപ്ലിക്കേഷനുകളെയും പിന്തുണയ്ക്കുന്ന ഒരു പൂർണ ഫീച്ചറുകളുള്ള സ്മാർട് ഫോണാണിതെന്നും ചെയർമാനും മാനേജിങ് ഡയറക്ടറുമായ മുകേഷ് അംബാനി പറഞ്ഞു.

ഞങ്ങളുടെ ടീമുകൾ ഈ ഫോണിനായി മാത്രം ആൻഡ്രോയിഡിന്റെ ഒരു പ്രത്യേക പതിപ്പ് ഒപ്റ്റിമൈസ് ചെയ്തു. ഇത് ഇന്ത്യയ്‌ക്കും ആദ്യമായി ഒരു സ്മാർട് ഫോൺ ഉപയോഗിക്കുന്നവർക്കുമായി നിർമിച്ചതാണെന്ന് ഗൂഗിൾ സിഇഒ സുന്ദർ പിച്ചൈ പറഞ്ഞു. റിലയൻസ് ജിയോയും ഗൂഗിളും സംയുക്തമായി വികസിപ്പിച്ചെടുത്ത ആൻഡ്രോയിഡിന്റെ ഒപ്റ്റിമൈസ് ചെയ്ത പതിപ്പാണ് ജിയോ ഫോൺ നെക്സ്റ്റ് നൽകുന്നത്.

കുറഞ്ഞ വിലയ്ക്ക് ലഭിക്കുന്നതും അത്യാധുനിക ഫീച്ചറുകളുള്ള മികച്ച ഹാൻഡ്സെറ്റാണ് ജിയോഫോൺ നെക്സ്റ്റ് എന്നും അംബാനി കൂട്ടിച്ചേർത്തു. ജിയോ ഫോൺ നെക്സ്റ്റ് സെപ്റ്റംബർ 10 മുതൽ ഇന്ത്യയിൽ ലഭ്യമാകും. സെപ്റ്റംബർ 10 ന് ഗണേഷ് ചതുർത്ഥിക്ക് ഇത് വിപണിയിൽ ലഭ്യമാകുമെന്നും അംബാനി പ്രഖ്യാപിച്ചു. എന്നാൽ വില സംബന്ധിച്ചുള്ള വിവരങ്ങൾ വെളിപ്പെടുത്തിയിട്ടില്ല.

2 ജിയിൽ നിന്ന് 4 ജി കണക്റ്റിവിറ്റിയിലേക്ക് അപ്‌ഗ്രേഡുചെയ്യാൻ ആഗ്രഹിക്കുന്നവർക്കായാണ് ജിയോഫോൺ നെക്സ്റ്റ് രൂപകൽപന ചെയ്‌തിരിക്കുന്നത്. ജിയോയ്‌ക്കായി ഗൂഗിൾ പ്രത്യേകമായി രൂപകൽപന ചെയ്‌തിരിക്കുന്ന ആൻഡ്രോയിഡ് ഓപ്പറേറ്റിങ് സിസ്റ്റത്തെ അടിസ്ഥാനമാക്കിയുള്ളതാണ്. വോയ്‌സ് അസിസ്റ്റന്റ്, ഓട്ടോമാറ്റിക് റീഡ് ലൗഡ്, ഭാഷാ വിവർത്തനം, വികസിപ്പിച്ച റിയാലിറ്റി ഫിൽട്ടറുകളുള്ള ക്യാമറ എന്നിവ ഉൾപ്പെടെയുള്ള സവിശേഷതകൾ വാഗ്ദാനം ചെയ്യുന്നു. പതിവ് ആൻഡ്രോയിഡ് അപ്‌ഡേറ്റുകൾക്കുള്ള പിന്തുണയും ഇതിലുണ്ട്. ജിയോഫോൺ നെക്സ്റ്റിൽ മികച്ച ക്യാമറകളാണ് ലഭിക്കുക. മുന്നിലും പിന്നിലുമായി ഓരോ ക്യാമറകൾ വീതമാണുള്ളത്. ഫിംഗർപ്രിന്റ് സെൻസറിന്റെ സേവനം ലഭ്യമല്ല. വില വിവരങ്ങൾ ഈ മാസം അവസാനത്തോടെ പുറത്തുവിടുമെന്നാണ് അറിയുന്നത്.

വിവരങ്ങൾക്ക് കടപ്പാട്: ഐഎഎൻഎസ്

English Summary: JioPhone Next smartphone launched, Google says it runs special version of Android

തൽസമയ വാർത്തകൾക്ക് മലയാള മനോരമ മൊബൈൽ ആപ് ഡൗൺലോഡ് ചെയ്യൂ
MORE IN MOBILES
SHOW MORE
ഇവിടെ പോസ്റ്റു ചെയ്യുന്ന അഭിപ്രായങ്ങൾ മലയാള മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.
Video

അതിരപ്പിള്ളിയുടെ മനോഹാരിതയിൽ നിത്യ മേനോൻ: ഫോട്ടോഷൂട്ട് മേക്കിങ് വിഡിയോ

MORE VIDEOS
FROM ONMANORAMA