നവംബർ 25, രാവിലെ 9.28, അമേരിക്കയുടെ 13 സാറ്റലൈറ്റുകൾ ഇന്ത്യ വിക്ഷേപിക്കും, കൂടെ കാർട്ടോസാറ്റ് -3

ഇന്ത്യൻ ബഹിരാകാശ ഏജന്‍സി ഐ‌എസ്‌ആര്‍‌ഒയുടെ അടുത്ത വിക്ഷേപണം നവംബർ 25 ന് രാവിലെ 9.28 ന് നടക്കും. ഇന്ത്യയുടെ കാർട്ടോഗ്രഫി സാറ്റലൈറ്റായ കാർട്ടോസാറ്റ് -3, അമേരിക്കയുടെ 13 വാണിജ്യ നാനോ സാറ്റലൈറ്റുകൾ ഉൾപ്പെടുന്നതാണ് വിക്ഷേപണം.

ഇസ്രോയുടെ റിപ്പോർട്ട് പ്രകാരം പോളാർ സാറ്റലൈറ്റ് ലോഞ്ച് വെഹിക്കിൾ-എക്‌സ്എൽ വേരിയന്റ് (പി‌എസ്‌എൽ‌വി-എക്സ്എൽ) ഉപയോഗിച്ചാണ് നവംബർ 25 ന് വിക്ഷേപണം നടക്കുക. ഉയർന്ന റെസല്യൂഷനിൽ ഇമേജിങ് ശേഷിയുള്ള മൂന്നാം തലമുറയിലെ ചടുലമായ നൂതന ഉപഗ്രഹമാണ് കാർട്ടോസാറ്റ് -3 . 97.5 ഡിഗ്രി ചെരിവിൽ 509 കിലോമീറ്റർ ഭ്രമണപഥത്തിൽ ഉപഗ്രഹം വിന്യസിക്കും.

ബഹിരാകാശ വകുപ്പിന് കീഴിൽ അടുത്തിടെ ആരംഭിച്ച പുതിയ കമ്പനിയായ ന്യൂസ്‌പേസ് ഇന്ത്യ ലിമിറ്റഡാണ് (എൻ‌എസ്‌ഐ‌എൽ) അമേരിക്കയിൽ നിന്നുള്ള 13 നാനോ സാറ്റലൈറ്റുകൾ വാണിജ്യ അടിസ്ഥാനത്തിൽ വിക്ഷേപണം നടത്തുന്നത്. കാർട്ടോസ്റ്റാറ്റ് -3 വിക്ഷേപണത്തിന് ശേഷം റിസാറ്റ് -2 ബിആർ 1, റിസാറ്റ് -2 ബിആർ 2 എന്നിവയും വിക്ഷേപിക്കും. ഇവ രണ്ടും നിരീക്ഷണ ഉപഗ്രഹങ്ങളായതിനാൽ ഡിസംബറിലാണ് വിക്ഷേപിക്കുന്നത്. 

മൂന്ന് ഉപഗ്രഹങ്ങളുടെ വിക്ഷേപണം ആകാശത്ത് കൂടുതൽ കണ്ണുകൾ സ്ഥാപിച്ച് രാജ്യത്തിന്റെ സുരക്ഷ വർധിപ്പിക്കുന്നതിനുള്ള ശ്രമങ്ങളുടെ ഭാഗമാണ്. റിസാറ്റ് -2 ബി‌ആർ 1നെ ലക്ഷ്യത്തിലെത്തിക്കുക പി‌എസ്‌എൽ‌വി സി -48 ആണ്. പി‌എസ്‌എൽ‌വി സി -49 ആണ് റിസാറ്റ് -2 ബി‌ആർ 2 നെ ഭ്രമണപഥത്തിലെത്തിക്കുക.

English Summary: India to launch Cartosat-3, 13 nanosatellites from US on November 25