Manoramaonline.com no longer supports Internet Explorer 8 or earlier. Please upgrade your browser.  Learn more »

തികച്ചും ആത്മഹത്യാപരം, തിരിച്ചുവരാത്ത ചൊവ്വാ യാത്രയ്ക്ക് ഇനി 100 പേര്‍!

marsmission

മടക്കയാത്രയില്ലാത്ത ചൊവ്വാ ദൗത്യത്തിന് തയ്യാറായെത്തിയവരില്‍ ഇനിയുള്ളത് 100 പേര്‍ മാത്രം. ചൊവ്വയില്‍ ആദ്യത്തെ മനുഷ്യ കോളനി സ്ഥാപിക്കുകയെന്ന ലക്ഷ്യത്തിലാണ് മാര്‍സ് വണ്‍ പ്രൊജക്ട് ആരംഭിച്ചത്. ഇന്ത്യ അടക്കമുള്ള 140 രാജ്യങ്ങളില്‍ നിന്നുള്ള രണ്ട് ലക്ഷത്തോളം പേരാണ് മടക്കയാത്രയില്ലാത്ത ചൊവ്വാ യാത്രക്ക് ടിക്കറ്റെടുക്കാന്‍ പണം മുടക്കിയത്. ഇവരില്‍ നിന്നാണ് 100 പേരുടെ പട്ടിക തയ്യാറാക്കിയിരിക്കുന്നത്.

അഞ്ച് ദിവസം നീണ്ടു നില്‍ക്കുന്ന വിവിധ പരീക്ഷണങ്ങള്‍ക്കൊടുവില്‍ ഈ 100 പേരില്‍ നിന്നും 40 പേരെ തെരഞ്ഞെടുക്കും. ഇവരില്‍ നിന്നുള്ള 24 പേര്‍ക്കാണ് 2026ല്‍ ചൊവ്വയിലേക്ക് പോകാന്‍ അവസരം ലഭിക്കുക. ഇവര്‍ നീണ്ട ബഹിരാകാശ യാത്രക്ക് യോഗ്യരാണോ എന്നതാണ് പ്രധാനമായും പരീക്ഷിക്കുന്നത്. ഇത്തരം പരീക്ഷണങ്ങളില്‍ 90 ശതമാനവും നാസ തന്നെ നേരിട്ടാണ് നടത്തുന്നത്.

mars-one1

അഞ്ച് ദിവസങ്ങളില്‍ വ്യത്യസ്തമായ വെല്ലുവിളികളാണ് ഇവര്‍ക്ക് നേരിടേണ്ടി വരിക. വ്യക്തിപരമായും സംഘമായും ഇവര്‍ക്ക് എങ്ങനെ പ്രതിസന്ധികളെ അതിജീവിക്കാനാകുമെന്നത് പരീക്ഷിക്കപ്പെടും. ഇതുവരെ സ്വപ്‌നം പോലും കാണാത്ത പരീക്ഷണങ്ങള്‍ക്കാവും ഇവര്‍ വിധേയരാവുക. തീരുമാനങ്ങളെടുക്കാനുള്ള ശേഷിയും പ്രധാനമായി പരീക്ഷിക്കപ്പെടും. ഒടുവില്‍ തെരഞ്ഞെടുത്ത 100 പേരില്‍ കൂടുതല്‍ യോജിച്ച് പോകാനാകുമെന്ന് കരുതുന്നവരുടെ സംഘങ്ങളാകാനാണ് ഇപ്പോള്‍ ഇവര്‍ക്ക് നല്‍കിയിരിക്കുന്ന നിര്‍ദ്ദേശം.

ഭൂമിയിലേക്കുള്ള തിരിച്ചുവരവ് ലക്ഷ്യമല്ലാത്തതിനാല്‍ തന്നെ ജീവന്‍ നിലനിര്‍ത്തുന്നതിനാവശ്യമായ അവശ്യവസ്തുക്കള്‍ കണ്ടെത്തുന്നതും ഇവയുടെ ബുദ്ധിപൂര്‍വ്വമായ ഉപയോഗവുമെല്ലാം പരീക്ഷണത്തിന്റെ ഭാഗമാകും. വെള്ളം കണ്ടെത്തുന്നതും ഓക്‌സിജന്‍ ഉപയോഗിക്കുന്നതും സ്വന്തമായി ഭക്ഷണം കണ്ടെത്തുന്നതുമെല്ലാം പരീക്ഷിക്കപ്പെടും. അമേരിക്കന്‍ ബഹിരാകാശ ഏജന്‍സിയായ നാസ മൂന്ന് ചൊവ്വാ ദൗത്യങ്ങളാണ് ഇപ്പോള്‍ ഏറ്റെടുത്തിരിക്കുന്നത്. എന്നാല്‍ 2030ന് ശേഷം മാത്രമേ ചൊവ്വയിലേക്കുള്ള മനുഷ്യദൗത്യത്തെക്കുറിച്ച് നാസ ചിന്തിക്കുന്നുള്ളൂ.

human-colony-mars

തികച്ചും ആത്മഹത്യാപരമായ നീക്കമാണ് ഈ ചൊവ്വാദൗത്യമെന്ന് നേരത്തെ തന്നെ വിമര്‍ശനം ഉയര്‍ന്നിരുന്നു. നാസ പോലും മടിച്ചു നില്‍ക്കുന്ന ചൊവ്വയിലേക്കുള്ള മനുഷ്യദൗത്യത്തിന് മുന്‍കയ്യെടുക്കുന്നത് പ്രശസ്തി മാത്രം മുന്നില്‍ കണ്ടാണെന്നാണ് വിമര്‍ശനം. മാര്‍സ് വണ്‍ ചൊവ്വാ ദൗത്യത്തിനെതിരെ യുഎഇയിലെ മുസ്ലിം പുരോഹിതര്‍ ഫത്‌വ പുറത്തിറക്കിയിരുന്നു. സ്വയം ജീവനെടുക്കുകയോ അന്യന്റെ ജീവനെടുക്കുയോ ചെയ്യരുതെന്ന ഖുറാന്‍ വചനം ഉദ്ധരിച്ചാണ് ഫത്‌വ പുറപ്പെടുവിച്ചത്.

mars-one

അതേസമയം, തങ്ങളുടെ പദ്ധതിയെ ന്യായീകരിച്ച് മാര്‍സ് വണ്‍ രംഗത്തെത്തിയിട്ടുണ്ട്. ആവശ്യത്തിന് മുന്‍കരുതലുകള്‍ക്ക് ശേഷമാണ് തങ്ങളുടെ ദൗത്യമെന്നാണ് ഇവരുടെ വാദം. ആദ്യഘട്ടത്തില്‍ റോബോട്ടുകളാണ് ചൊവ്വയിലെത്തുക. അന്തിമ ദൗത്യത്തിന് രണ്ട് വര്‍ഷം മുമ്പ് ചൊവ്വയില്‍ വെള്ളവും വായുവും ഉറപ്പുവരുത്തും. അവസാന റൗണ്ടിലെത്തുന്നവര്‍ക്ക് ഏഴ് വര്‍ഷം നീളുന്ന പരിശീലനം നല്‍കുമെന്നും ഹോളണ്ട് ആസ്ഥാനമായ സംഘടന പറയുന്നു. 

Your Rating: