ഫെയ്സ്ബുക്കിൽ നിലവിളി: ‘എനിക്കും കമന്റ് തരണേ...’, പൊലീസിന് പറയാനുള്ളത്...
Mail This Article
കഴിഞ്ഞ കുറച്ച് ദിവസങ്ങളായി ഫെയ്സ്ബുക്കിൽ ഒരു വ്യാജ ക്യാംപെയിൻ നടക്കുന്നുണ്ട്. കമന്റും ലൈക്കും കൊടുത്താൽ ഫെയ്സ്ബുക്കിന്റെ പുതിയ അൽഗോരിതം സംവിധാനത്തെ മറികടന്ന് പോസ്റ്റുകൾ കൂടുതൽ പേരിലെത്തിക്കാൻ കഴിയുമെന്നതാണ് ക്യാംപെയിൻ. എന്നാൽ ഈ വ്യാജ ക്യാംപെയ്ൻ മലയാളികൾക്കിടയിലാണ് കാര്യമായി നടക്കുന്നത്. ഇത് സംബന്ധിച്ച് കേരളാ പൊലീസിന് എന്താണ് പറയാനുളളത്.
പൊലീസിന്റെ ഫെയ്സ്ബുക് പോസ്റ്റ്
ഫെയ്സ്ബുക്കിലെ ഇന്നത്തെ പ്രധാന വിശേഷം ശ്രദ്ധിച്ചിട്ടുണ്ടാവും. പുതിയ ‘ഫെയ്സ്ബുക് അൽഗോരിതം.’ കോപ്പി പേസ്റ്റ്... പേസ്റ്റോടു പേസ്റ്റ്. പോസ്റ്റ്മാൻമാരിൽ അതിനിപുണന്മാരെന്നു കരുതുന്ന ട്രോളന്മാരും അല്ലാത്തവരും വരെ പെടുന്നു. കേശുമാമൻ സിൻഡ്രോം എന്നൊക്കെ സോഷ്യൽ മീഡിയ ഓമനപ്പേരിൽ അറിയപ്പെടുന്ന മണ്ടത്തരങ്ങളുടെ ലേറ്റസ്റ്റ് വേർഷൻ. ഒരാൾ പോസ്റ്റിടുകയേ വേണ്ടൂ... പിന്നെ കോപ്പി പേസ്റ്റ് ആണ്... ‘എനിക്കൊരു ഹായ് തരൂ, ലൈക് തരൂ, കോമായെങ്കിലും തരൂ...’ എന്നൊക്കെ പറഞ്ഞുള്ള പോസ്റ്റുകൾ കണ്ടില്ലേ ? ഉള്ള സുഹൃത്തുക്കൾ കൊഴിഞ്ഞു പോകാതിരിക്കാനുള്ള നെട്ടോട്ടത്തിലാണ് പലരും. ഫെയ്സ്ബുക് അൽഗോരിതം മാറ്റിയത്രേ... ഇനി 25 സുഹൃത്തുക്കളുടെ പോസ്റ്റ് മാത്രമേ കാണാൻ കഴിയൂ എന്നും.
പ്രധാനപ്പെട്ട പോസ്റ്റുകൾ അടങ്ങിയ ന്യൂസ് ഫീഡുകൾ മാത്രമാണ് അല്ലെങ്കിലും കാണാൻ കഴിയുക. എല്ലാ സുഹൃത്തുക്കളുടെയും എല്ലാ പോസ്റ്റുകളും കാണണമെന്ന് പറഞ്ഞാൽ ഫെയ്സ്ബുക് മുതലാളിയും ബുദ്ധിമുട്ടിലാകും. നമുക്ക് കേൾക്കാനും കാണാനും കൂടുതൽ താല്പര്യമുള്ളവരെ ഫിൽറ്റർ ചെയ്താണ് ഫെയ്സ്ബുക് കാണിക്കുക. കൂടുതൽ സംവദിക്കാൻ ഇഷ്ടപ്പെടുന്നവരുടെ പോസ്റ്റുകൾ സ്വാഭാവികമായും ഫീഡുകളിൽ മുന്നിട്ട് നിൽക്കുന്നു.
"Facebook Algorithm Hoax" എന്ന് സെർച്ച് ചെയ്താൽ കൂടുതൽ വിശദാംശങ്ങൾ അറിയാൻ കഴിയും.
അതിനാൽ ഇത്തരം കോപ്പി പേസ്റ്റ് ഇടുന്നതിന് മുൻപ് ശ്രദ്ധിക്കൂ...
#keralapolice
#facebookalgorithm