കുട്ടികളെ ലൈംഗികമായി ചൂഷണം ചെയ്തതിനും സമ്മതമില്ലാതെ മറ്റുള്ളവരുടെ നഗ്നത കാണിച്ചതിന്റെയും പേരിൽ ഒക്‌ടോബർ 26 മുതൽ നവംബർ 25 വരെ ഇന്ത്യയിൽ 45,589 അക്കൗണ്ടുകൾ ഇലോൺ മസ്‌കിന്റെ നേതൃത്വത്തിലുള്ള ട്വിറ്റർ നിരോധിച്ചു. തീവ്രവാദം പ്രോത്സാഹിപ്പിച്ചതിന്റെ പേരിൽ 3,035 അക്കൗണ്ടുകളും നീക്കം ചെയ്തു. ഇക്കാലയളവിൽ ഇന്ത്യയിൽ ആകെ നീക്കം ചെയ്തത് 48,624 ട്വിറ്റർ അക്കൗണ്ടുകളാണ്.

2021 ലെ പുതിയ ഐടി നിയമങ്ങൾ പ്രകാരം പ്രതിമാസ റിപ്പോർട്ട് പ്രസിദ്ധീകരിക്കേണ്ടതുണ്ട്. പരാതി പരിഹാര സംവിധാനങ്ങൾ വഴി ഈ സമയപരിധിക്കുള്ളിൽ ഇന്ത്യയിലെ ഉപയോക്താക്കളിൽ നിന്ന് 755 പരാതികൾ ലഭിച്ചതായും ആ ട്വീറ്റുകളിൽ 121 എണ്ണത്തിലും നടപടി സ്വീകരിച്ചതായും റിപ്പോർട്ടിൽ പറയുന്നു. കോടതി ഉത്തരവുകൾക്കൊപ്പം വ്യക്തിഗത ഉപയോക്താക്കളിൽ നിന്ന് ലഭിച്ച പരാതികളും ഇതിൽ ഉൾപ്പെടുന്നു.

ഇന്ത്യയിൽ നിന്നുള്ള മിക്ക പരാതികളും ദുരുപയോഗം/പീഡനം (681), ഐപിയുമായി ബന്ധപ്പെട്ട ലംഘനം (35), വിദ്വേഷകരമായ പെരുമാറ്റം (20), സ്വകാര്യത ലംഘനം (15) എന്നിവയെക്കുറിച്ചായിരുന്നു. അക്കൗണ്ട് സസ്പെൻഷനെതിരെ അപ്പീൽ നൽകിയ 22 പരാതികളും പരിഗണിച്ചതായി ട്വിറ്റർ പുതിയ റിപ്പോർട്ടിൽ അറിയിച്ചു.

പുതിയ ഐടി നിയമങ്ങൾ 2021 പ്രകാരം‍ 5 ദശലക്ഷത്തിലധികം ഉപയോക്താക്കളുള്ള വലിയ ഡിജിറ്റൽ, സോഷ്യൽ മീഡിയ പ്ലാറ്റ്‌ഫോമുകൾ പ്രതിമാസ പാലിക്കൽ റിപ്പോർട്ടുകൾ പ്രസിദ്ധീകരിക്കേണ്ടതുണ്ട്.

English Summary: Twitter bans 48,624 accounts for policy violations in India