കൊറോണവൈറസ്: വീട്ടിലിരുന്ന് ജോലി ചെയ്യുന്നവരും സൂക്ഷിക്കുക, ഓൺലൈൻ ആക്രമണത്തിന് സാധ്യത
Mail This Article
ലോകാരോഗ്യ സംഘടന കോവിഡ്-19 നെ മഹാമാരിയായി പ്രഖ്യാപിച്ചതിനെ തുടർന്ന് നിരവധി IT കമ്പനികൾ ജീവനക്കാർക്ക് വീട്ടിൽ നിന്നും ജോലി ചെയ്യാനുള്ള സംവിധാനങ്ങൾ നൽകി വരികയാണ്. വീട്ടിൽ നിന്നും ദൂരസ്ഥലങ്ങളിൽ നിന്നുമൊക്കെ ജോലി ചെയ്യാനുള്ള സംവിധാനവും ടെലികമ്മ്യൂട്ടിങ് മാർഗ്ഗമൊക്കെ ജീവനക്കാർക്ക് നൽകുന്നതിലൂടെ കമ്പനികൾ ബിസിനസ്സ് തുടർച്ച ഉറപ്പാക്കുകയും അതുവഴി ഉണ്ടാകാൻ സാധ്യതയുള്ള സാമ്പത്തിക വിപത്തിനെ മറികടക്കുകയും ചെയ്യുകയാണ്.
‘ഓഫീസ് പരിസരത്ത്, ഐടി നെറ്റ്വർക്കിനെ ഡി മിലിറ്ററൈസ്ഡ് സോൺ, ട്രസ്റ്റഡ് സോണുകൾ എന്നിങ്ങനെ തിരിച്ചിരിക്കുന്നു. സുരക്ഷിതമായ എഡ്ജ് ഉപകരണങ്ങളോടൊപ്പം ശക്തമായ ഒരു പ്രതിരോധ വലയം ഉണ്ടാവുകയും ചെയ്യും. എന്നാൽ, ഹോം നെറ്റ്വർക്ക് ഇൻഫ്രാസ്ട്രക്ചറിന് സൈബർ അക്രമണങ്ങൾ തടയാനുള്ള ശേഷി കുറവാണ്. സുരക്ഷിതമല്ലാത്ത ഹോം വൈഫൈ, മോശമായി വിന്യസിപ്പിച്ച മോഡങ്ങൾ എന്നിവ നെറ്റ്വർക്കിനെ സൈബർ ആക്രമണത്തിന് തുറന്ന് കൊടുക്കുകയും അതുവഴി റാൻസംവെയർ ആക്രമണത്തിന് വഴിയൊരുക്കുകയും ചെയ്യും. ഇതിലൂടെ കമ്പനികളുടെ സുപ്രധാനമായ അസ്സറ്റുകൾക്കും ഡേറ്റയ്ക്കും അപകടങ്ങൾ ഉണ്ടാകാമെന്നാണ് യുഎൽ ടെക്നോളജി സൊല്യൂഷൻസിലെ സൈബർ സെക്യൂരിറ്റി വിഭാഗം മേധാവി ടി. വിനോദ് പറഞ്ഞു.
COVID-19 ന്റെ വ്യാപനം ഭയന്ന്, ഇപ്പോൾ വീട്ടിൽ നിന്നോ ടെലികമ്മ്യൂട്ട് ഓപ്ഷനുകളിൽ നിന്നോ ജോലി ചെയ്യാനുള്ള ഓപ്ഷനുകൾ നൽകുന്നത് വഴി നെറ്റ്വർക്ക് പരിധികൾ വീടുകളിലേക്കും മറ്റ് സുരക്ഷിതമല്ലാത്ത സ്ഥലങ്ങളിലേക്കും കൂടുതൽ വ്യാപിക്കുന്നു. ഇതിലൂടെ സൈബർ കുറ്റവാളികൾക്ക് കമ്പനിയുടെ നെറ്റ്വർക്കും സെർവറുകളും എൻഡ്പോയിന്റ് ഉപകരണങ്ങൾ ( ലാപ്ടോപ്പ് / ഡെസ്ക്ടോപ്പ് / ടാബുകൾ / സ്മാർട് ഫോണുകൾ ) വഴി എളുപ്പത്തിൽ കയ്യടക്കാം.
വീടുകളിൽ നിന്ന് ജോലി ചെയ്യുവാനുള്ള സംവിധാനം നൽകുന്ന കമ്പനികൾ താഴെ പറയുന്ന സൈബർ സുരക്ഷാ ക്രമീകരണങ്ങൾ ഉറപ്പുവരുത്തുക.
∙ ശക്തവും സുരക്ഷിതവുമായ പാസ്വേഡ് സെറ്റ് ചെയ്യുക ഒപ്പം ടു ഫാക്ടർ ഓതെന്റിക്കേഷൻ (Two-factor authentication) ഉപയോഗവും ഉറപ്പു വരുത്തുക.
∙ ഏറ്റവും പുതിയ ഫേംവെയർ പാച്ചുകൾ (Firmware patches) ഉപയോഗിച്ച് മോഡം, റൂട്ടറുകൾ, മറ്റ് ഉപകരണങ്ങൾ എന്നിവ അപ്ഡേറ്റ് ചെയ്യുക.
∙ WPA യും UPnPയും ഓഫ് ചെയ്യുക പകരം WPA 2 ഉപയോഗിക്കുക.
∙ റൂട്ടർ / മോഡം ഫയർവാൾ അല്ലെങ്കിൽ ഒരു ഹോം മോഡൽ ഫയർവാൾ കോൺഫിഗർ ചെയ്യുക.
∙ ഓഫിസുകൾ അടച്ചതിനാൽ, ലോക്കൽ കഫേകളിൽ നിന്നോ മറ്റോ വൈഫൈ നെറ്റ്വർക്കുകൾ ഉപയോഗിച്ച് ജോലി ചെയ്യാൻ ജീവനക്കാരെ പ്രേരിപ്പിച്ചേക്കാം. ആയതിനാൽ, ഔദ്യോഗിക ആവശ്യങ്ങൾക്കായി പൊതു Wi-Fi കൾ ഒരു കാരണവശാലും ഉപയോഗിക്കാതിരിക്കുക.
∙ ഫിഷിങും മറ്റ് സോഷ്യൽ എൻജിനീയറിങ് ആക്രമണങ്ങളും എങ്ങനെ കണ്ടെത്താമെന്നും കൈകാര്യം ചെയ്യാമെന്നും ജീവനക്കാരെ പരിശീലിപ്പിക്കുക.
∙ ലാപ്ടോപ്പ് / ഡെസ്ക്ടോപ്പിൽ സൂക്ഷിച്ചിരിക്കുന്ന സെൻസിറ്റീവ് വിവരങ്ങൾ എൻക്രിപ്റ്റ് ചെയ്യുക. ഇതിനായി, MDMS (മൊബൈൽ ഉപകരണ മാനേജുമെന്റ് സിസ്റ്റം) പോലുള്ള സംവിധാനങ്ങൾ ഉപയോഗിക്കാവുന്നതാണ്.
∙ വെർച്വൽ പ്രൈവറ്റ് നെറ്റ്വർക്കുകൾ (വിപിഎൻ) ഓഫിസ് നെറ്റ്വർക്കിനും റിമോട്ട് മെഷീനിനുമിടയിൽ ഇന്റർനെറ്റ് ട്രാഫിക് എൻക്രിപ്റ്റുചെയ്തിട്ടുണ്ടെന്നും സുരക്ഷിതമാണെന്നും ഉറപ്പാക്കുന്നു. അതുകൊണ്ടുതന്നെ, ജീവനക്കാർക്ക് പ്രധാനപെട്ട കാര്യങ്ങൾ ചെയ്യാൻ കമ്പനി നൽകുന്ന VPN ഉപയോഗിക്കാൻ നിർബന്ധിക്കുക.
∙ ജീവനക്കാരുടെ കംപ്യൂട്ടറിലെ ആന്റിവൈറസ് അല്ലെങ്കിൽ ആന്റി-മാൽവെയർ പതിവായി അപ്ഡേറ്റുചെയ്യുന്നുവെന്ന് ഉറപ്പാക്കുക.