കൊറോണ വന്നത് കാരണം യുവാൻ രക്ഷപ്പെട്ടു, ഇന്നത്തെ ആസ്തി 3.16 ലക്ഷം കോടി

സൂമിനെക്കുറിച്ച് നിങ്ങൾ കേട്ടിട്ടുണ്ടോ? ലോകം ഒന്നടങ്കം കൊറോണ വൈറസ് വ്യാപിച്ചപ്പോൾ രക്ഷപ്പെട്ട ഒരു കമ്പനിയാണ് സൂം. കൊറോണ വൈറസിനെതിരെ പോരാടാനും വീട്ടിൽ നിന്ന് ജോലി ചെയ്യാനും സഹായിക്കുന്നതാണ് സൂമിന്റെ സർവീസുകൾ. വിഡിയോ കോൺഫറൻസിങ് ആപ്ലിക്കേഷനായ സൂമിന്റെ ഉപയോഗം കഴിഞ്ഞ ദിവസങ്ങളിൽ കുത്തനെ വർധിച്ചു. സൂം ഉപയോഗിക്കുന്ന ആളുകളുടെ എണ്ണവും വർധിച്ചതോടെ ഓഹരി വിപണിയിലെ ഷെയറുകളുടെ ഡിമാൻഡും കൂടി.

ഈ വർഷത്തിന്റെ തുടക്കത്തിൽ ഏകദേശം 64 ഡോളർ വിലയുണ്ടായിരുന്ന സൂമിന്റെ ഓഹരി വില ഇപ്പോൾ 150 ഡോളര്‍ കടന്നിരിക്കുന്നു. കഴിഞ്ഞ ഒരു മാസത്തിനിടയിലാണ് ഏറ്റവും ശ്രദ്ധേയമായ ഈ നേട്ടം കൈവരിച്ചത്. ഇതോടെ കമ്പനിയുടെ വിപണി മൂലധനം 42 കോടി ഡോളറായി (ഏകദേശം 3.16 ലക്ഷം കോടി രൂപ) ഉയർന്നു.

സൂം സ്ഥാപകൻ എറിക് യുവാന്റെ വ്യക്തിഗത ആസ്തിയും ഗണ്യമായ വർധിച്ചു. തന്റെ കമ്പനിയുടെ നിലവിലെ മാർക്കറ്റ് കാപ് ഉയര്‍ന്നതോടെ യുവാന് ഇപ്പോൾ 700 കോടി ഡോളറിന്റെ വ്യക്തിഗത ആസ്തി ഉണ്ട്. വ്യക്തിഗത ആസ്തിയിൽ ഈ വർഷം തന്നെ 400 കോടി ഡോളറിന്റെ വർധനവാണ് രേഖപ്പെടുത്തിയത്.

കൊറോണ വൈറസ് കാരണം ഗൂഗിൾ പ്ലേ സ്റ്റോറിൽ ഡൗൺ‌ലോഡ് ചാർ‌ട്ടുകളിൽ‌ സൂം ആദ്യത്തെ പത്തിൽ ഇടം നേടിയിട്ടുണ്ട്. 1997 ൽ ചൈനയിൽ നിന്ന് യുഎസിലെത്തിയ യുവാൻ, 2011ൽ സൂം വിഡിയോ കമ്മ്യൂണിക്കേഷൻസ് ആരംഭിച്ചു. ഇതിന് മുന്‍പ് സിസ്കോയ്‌ക്കൊപ്പമാണ് പ്രവർത്തിച്ചിരുന്നത്. എന്റർപ്രൈസ് ആശയവിനിമയങ്ങളിൽ പൂർണ്ണമായും ശ്രദ്ധ കേന്ദ്രീകരിച്ച് 2013 ൽ ആപ്ലിക്കേഷനും വിഡിയോ സര്‍വീസും തുടങ്ങി. വിദൂര ജോലികൾക്കായി കമ്പനികളും ഓർഗനൈസേഷനുകളും ഉപയോഗിക്കാൻ ആഗ്രഹിക്കുന്ന ഒരു ആപ്ലിക്കേഷനായി സൂം പെട്ടെന്നാണ് മാറിയത്. 2013 ൽ 10 ലക്ഷം ഉപയോക്താക്കളുണ്ടായിരുന്നു. 2014 ൽ, തങ്ങളുടെ കമ്പനികൾക്കും ഓർഗനൈസേഷനുകൾക്കുമിടയിൽ ആശയവിനിമയം നടത്താൻ സൂം ഉപയോഗിക്കുന്ന ഉപയോക്താക്കളുടെ എണ്ണം ഒരു കോടിയായി ഉയർന്നു. 2015 ൽ ഇത് നാലു കോടിയായി.

2017 ൽ കമ്പനിയുടെ മൂല്യം 100 കോടി ഡോളറായി കണക്കാക്കി. 2019ൽ സൂം കമ്മ്യൂണിക്കേഷൻസ് മൂല്യം 1,600 കോടി ഡോളറുമായി. ഇപ്പോൾ, സൂമിന് പിന്നിലുള്ള കമ്പനിയുടെ വിപണി മൂലധനം 4,200 കോടി ഡോളറാണ്. കാരണം കോർപ്പറേഷനുകൾ മാത്രമല്ല, വ്യക്തികൾ പോലും അവരുടെ ഓഫിസ് ജീവനക്കാരുമായോ മാനേജർമാരുമായോ ബന്ധപ്പെടാൻ ആഗ്രഹിക്കുന്നത് സൂം ആപ്പ് വഴിയാണ്.

സൂം ആപ്ലിക്കേഷൻ ഡൗൺലോഡുകൾ നിരീക്ഷിക്കുന്ന ആപ്‌ടോപിയ എന്ന സ്ഥാപനം പറയുന്നതനുസരിച്ച്, സൂമിനായുള്ള പ്രതിദിന ഡൗൺലോഡുകൾ ഫെബ്രുവരി മധ്യത്തിൽ 1,70,000 ൽ നിന്ന് മാർച്ച് അവസാനത്തോടെ 2.5 കോടിയായി ഉയർന്നു എന്നാണ്. ആപ്ലിക്കേഷൻ ഡൗൺലോഡുകളുടെ വർധനവ് ഗൂഗിൾ, ആപ്പിൾ സ്റ്റോറുകളിലെ മികച്ച ആപ്ലിക്കേഷൻ ചാർട്ടുകളിൽ പ്രതിഫലിക്കുന്നുണ്ട്.