സാധനങ്ങൾ വീട്ടുപടിക്കലെത്തും; ലോക്കൽ സപ്പോർട്ട് ആപ് റെഡി
Mail This Article
നാട്ടിലെ എല്ലാ തരത്തിലുള്ള വ്യാപാര സ്ഥാപനങ്ങളിൽ നിന്നു സാധനങ്ങൾ വീട്ടുപടിക്കലെത്തിക്കാൻ ലോക്കൽ സപ്പോർട്ട് ആപ് റെഡി. ചില്ലർ പേയ്മെന്റ് സൊല്യൂഷൻസ് വ്യാപാരി വ്യവസായി ഏകോപന സമിതിയുടെ പങ്കാളിത്തത്തോടെയാണ് ആപ് എത്തിക്കുന്നത്. കേരളത്തിലെ വ്യാപാരികൾക്കും ഉപഭോക്താക്കൾക്കും ഉപയോഗിക്കാനാവും വിധമാണ് ആപ്പിന്റെ രൂപകൽപന.
കോവിഡ് 19 വ്യാപകമായി പടർന്നു പിടിക്കുന്ന സാഹചര്യത്തിൽ വ്യാപാരികൾക്കും ഉപഭോക്താക്കൾക്കും ഒരുപോലെ സഹായകമാകുംവിധമാണ് ഇത്തരത്തിലൊരു ആപ് തയാറാക്കിയത്. വീട്ടിലേക്കാവശ്യമായുള്ള അവശ്യ സാധനങ്ങൾ വിൽക്കുന്നവർക്ക് മാത്രമല്ല, ഇലക്ട്രിക്കൽസ്, ഇലക്ട്രോണിക്സ് മുതലായ എല്ലാ തരത്തിലുള്ള വ്യാപാര സ്ഥാപനങ്ങൾക്കും ആപ്പിൽ റജിസ്റ്റർ ചെയ്യാം. പുതുതലമുറ സ്ഥാപനങ്ങളിൽ മാത്രം ലഭ്യമായിരുന്ന ഡിജിറ്റൽ ഇടപാടുകൾ കേരളത്തിലെ മുക്കിലും മൂലയിലും വരെ ലഭ്യമാക്കാൻ ഈ ആപ് വഴി കഴിയും.
റെസ്റ്റോറന്റുകൾക്കും ഹോട്ടലുകൾക്കും പ്രത്യേക വിഭാഗം തന്നെ ആപ്പിലുണ്ട്. ലോക്കൽ സപ്പോർട്ട് ആപ് മലയാളത്തിലും ഇംഗ്ലീഷിലും ലഭ്യമാണ്. ഉപഭോക്താക്കൾക്ക് ഡെബിറ്റ്, ക്രഡിറ്റ് കാർഡുകൾ, യുപിഐ, വാലറ്റ് എന്നിവ മുഖേന എളുപ്പത്തിൽ ഇടപാടുകൾ നടത്താം. വ്യാപാരികൾക്ക് ബാങ്ക് അക്കൗണ്ടും ഐഎഫ്എസ് കോഡും ആപ്പിൽ നൽകിയാൽ സുരക്ഷിതമായി ഡിജിറ്റൽ പണമിടപാടുകൾ നടത്താനും സാധിക്കും. വ്യാപാരി വ്യവസായി ഏകോപന സമിതിയുടെ പങ്കാളിത്തത്തോടെ ഡെലിവറി സൗകര്യം ഏർപ്പെടുത്താനുള്ള പദ്ധതിയും ആവിഷ്കരിക്കുന്നുണ്ട്.
കൂടുതൽ വിവരങ്ങൾക്ക്: ലോക്കൽ സപ്പോർട്ട് കസ്റ്റമർ കെയർ നമ്പർ: 99956 99899
English Summary: Local Support by Vyapari Vyavasayi Ekopana Samithi