കേരളത്തിലെ പ്രതിപക്ഷ നേതാവ്. തുടർച്ചയായി അ‍ഞ്ചു തവണം പറവൂരിൽനിന്ന് നിയമസഭയിലേക്ക് വിജയിച്ചു.

എറണാകുളം ജില്ലയിലെ നെട്ടൂരിൽ വടശ്ശേരി ദാമോദര മേനോന്റെയും വി.വിലാസിനിയമ്മയുടെയും മകനായി ജനനം. നെട്ടൂർ എസ്‌വി യുപി സ്കൂളിൽ പ്രൈമറി വിദ്യാഭ്യാസം, ഹൈസ്കൂൾ പനങ്ങാടിൽ ഹൈസ്കൂൾ വിദ്യാഭ്യാസം. നിയമ ബിരുദധാരിയാണ്. വിദ്യാർഥി പ്രസ്ഥാനത്തിലൂടെയാണ് സതീശന്റെ രാഷ്ട്രീയപ്രവേശം. തേവര സേക്രഡ് ഹാർട്ട് കോളജിലെ ആർട്സ് ക്ലബ് സെക്രട്ടറിയായിരുന്നു. എംജി, കേരള സർവകലാശാലകളിൽ യൂണിയൻ കൗൺസിലറായിരുന്ന സതീശൻ, 1986-87 കാലത്ത് എംജി സർവകലാശാലാ യൂണിയൻ ചെയർമാനായിരുന്നു. എൻഎസ്‌യു ദേശീയ കമ്മറ്റി സെക്രട്ടറി സ്ഥാനംവഹിച്ചിട്ടുണ്ട്.

2001ലെ നിയമസഭാ തിരഞ്ഞെടുപ്പിൽ ഇടതുമുന്നണി സ്ഥാനാർഥി കെ.എം. ദിനകരനെ 7792 വോട്ടിന് തോൽപ്പിച്ച് ആദ്യമായി നിയമസഭയിലെത്തി. 2006, 2011, 2016, 2021 വർഷങ്ങളിലും ഇതേ മണ്ഡലത്തിൽ വിജയം ആവർത്തിച്ചു. പന്ത്രണ്ടാം നിയമസഭയിൽ കോൺഗ്രസ് വിപ് സ്ഥാനം വഹിച്ചിരുന്ന സതീശൻ, അന്യസംസ്ഥാന ലോട്ടറിക്കെതിരായ രാഷ്ട്രീയ സംവാദങ്ങളിലൂടെ കൂടുതൽ മാധ്യമശ്രദ്ധ നേടി.