വിദേശത്ത് മാത്രമല്ല ചെറി വസന്തം ഇന്ത്യയിലുമുണ്ട്

പിങ്ക് നിറത്തിലെ ചെറി പുഷ്പങ്ങൾ പൂത്തുനിൽക്കുന്ന തെരുവോരങ്ങളും വഴിത്താരകളും ഓർമയിൽ വരുമ്പോൾ ജപ്പാൻ എന്ന രാജ്യത്തെ ആയിരിക്കും മനസ്സിൽ കാണുക.എന്നാൽ ഈ കൊറോണക്കാലത്ത് ജപ്പാൻ വരെ പോയി ചെറി പുഷ്പങ്ങൾ കാണാൻ പോകണ്ട. മേഘാലയ വിനോദ സഞ്ചാരികൾക്കായി പിങ്ക് നിറത്തിലാറാടി നിൽക്കുകയാണിപ്പോൾ. 

കൊവിഡ്-19 മനുഷ്യരെ അവരുടെ വീടുകളിലേക്ക് പരിമിതപ്പെടുത്തിയിരിക്കാം, പ്രകൃതിയെ നിയന്ത്രിക്കാൻ കഴിയില്ല എന്നതിന്റെ ഏറ്റവും വലിയ തെളിവാണിപ്പോൾ മേഘാലയിലെ ഹിൽസ്റ്റേഷനുകൾ.എല്ലാം സാധാരണ നിലയിലായിരുന്നുവെങ്കിൽ ഈ വർഷത്തെ പ്രശസ്തമായ ചെറി ബ്ലോസം ഉത്സവത്തിന്റെ ഭാഗമായി വിനോദസഞ്ചാരികളെക്കൊണ്ട് നിറയുമായിരുന്നു ഇവിടം.നിർഭാഗ്യവശാൽ, ഇത്തവണ വലിയ തിരക്കില്ല. എല്ലാ വർഷവും നടക്കുന്ന രാജ്യാന്തര ചെറി ബ്ലോസം ഫെസ്റ്റിവൽ,കൊവിഡ്-19 കാരണം ഈ വർഷം റദ്ദാക്കി. എന്നാൽ മേഘാലയുടെ തെരുവോരങ്ങളും ചെറി മരങ്ങളും പിങ്ക് പൂക്കളാൽ നിറഞ്ഞിരിക്കുകയാണ്. ആ കാഴ്ച കാണാൻ ഒന്ന് മേഘാലയ വരെ പോകാം.

ഹിമാലയത്തിൽ നിന്നുള്ള സമ്മാനമാണ് പ്രൂണസ് സെറാസോയിഡ്സ് എന്നും അറിയപ്പെടുന്ന ചെറി പുഷ്പം. കിഴക്ക്, പടിഞ്ഞാറ് ഖാസി കുന്നുകൾ ഈ പൂക്കളാൽ മുഴുവൻ മൂടപ്പെടും. ഭംഗിയുള്ളതും ഊർജ്ജസ്വലവുമായ ഈ പുഷ്പങ്ങൾ കാട്ടിൽ വളരുന്നുവെങ്കിലും വർഷത്തിൽ ഈ സമയത്ത് സംസ്ഥാനത്തുടനീളം കാണാൻ കഴിയും.

ഷില്ലോങ്ങിന് പുറമേ, ജപ്പാനും ചെറി പുഷ്പമേളകൾക്ക് പേരുകേട്ടതാണ്. വർഷത്തിലെ ഈ സമയത്ത്, രാജ്യം ചെറി പുഷ്പങ്ങളുടെ വണ്ടർലാൻഡായി മാറുകയും ആയിരക്കണക്കിന് വിനോദസഞ്ചാരികൾ എത്തുന്ന തിരക്കേറിയ സീസണായി തീരുകയും ചെയ്യാറുണ്ട്. അതുപോലെ, പാരീസിലും ചെറി പുഷ്പിക്കുന്ന ദിവസങ്ങളുണ്ട്, ആ സമയം നഗരം മുഴുവൻ കൂടുതൽ റൊമാന്റിക്കായി മാറുന്നു.

English Summary: Shillong turns all shades of pink with cherry blossoms in full bloom