പ്ലാസ്റ്റിക് മാലിന്യങ്ങളില്ലാത്ത ഗ്രാമങ്ങൾ. വൈദ്യുതിയുണ്ടെങ്കിലും സോളറിൽ പ്രവർത്തിക്കുന്ന വീടുകൾ. പൂച്ചെടികളാൽ അലങ്കരിച്ച ഗ്രാമ വഴികൾ. വടക്കുകിഴക്കൻ സംസ്ഥാനങ്ങളിലെ ‘ക്ലീൻ ആൻഡ് ഗ്രീൻ വില്ലേജുകൾ’ പുതിയ മാതൃക സൃഷ്ടിക്കുകയാണ്. സംസ്ഥാന സർക്കാരുകളും ഓട്ടണമസ് കൗൺസിലുകളും നിർലോഭം പ്രോൽസാഹനം നൽകിയതോടെ ഒട്ടേറെ ക്ലീൻ ആൻഡ് ഗ്രീൻ വില്ലേജുകളാണ് അസമിലും മേഘാലയയിലുമായി ഉയർന്നിരിക്കുന്നത്. ഗോത്രവിഭാഗക്കാർ താമസിക്കുന്ന പ്രദേശങ്ങളിലാണ് ഈ ശുദ്ധഗ്രാമങ്ങൾ. ടൂറിസം സാധ്യതകൾക്കൊപ്പം ഗ്രാമങ്ങളുടെ മുഖഛായ മാറാനും ഇവ സഹായിക്കുന്നു.
