അദ്ഭുത കാഴ്ചയ്ക്കായി ഷിംല, മണിക്കൂറിൽ 2,000 ആളുകൾക്ക് കയറാം; ലോകത്തിലെ രണ്ടാമത്തെ വലിയ റോപ് വേ

സഞ്ചാരികള്‍ക്ക് എക്കാലത്തും പ്രിയപ്പെട്ട ഇടങ്ങളില്‍ ഒന്നാണ് ഹിമാചല്‍പ്രദേശിലെ ഷിംല. മഞ്ഞു പുതച്ച ഹിമാലയത്തിന്‍റെ സുന്ദരമായ കാഴ്ചകളും ചരിത്രപരമായ വാസ്തുവിദ്യയും കായികവിനോദങ്ങളുമെല്ലാമായി ഒട്ടേറെ ആകര്‍ഷണങ്ങള്‍ ഇവിടെയുണ്ട്. ഉത്തരേന്ത്യന്‍ സംസ്ഥാനങ്ങളില്‍ നിന്നുള്ളവരുടെ സ്ഥിരം വീക്കെന്‍ഡ് ഡെസ്റ്റിനേഷനായ ഷിംല, ഇപ്പോള്‍ മറ്റൊരു ലോകാദ്ഭുത കാഴ്ചയ്ക്കായി ഒരുങ്ങുകയാണ്. ലോകത്തിലെ ഏറ്റവും വലിയ രണ്ടാമത്തെ റോപ്പ്‌വേയുടെ നിര്‍മ്മാണം അടുത്തവര്‍ഷം ഷിംലയില്‍ തുടങ്ങും.

റോപ്പ് വേ പദ്ധതിയുടെ നിർമ്മാണം 2025 മാർച്ച് 1 ന് ആരംഭിക്കുമെന്ന് ഹിമാചൽ പ്രദേശ് ഉപമുഖ്യമന്ത്രി മുകേഷ് അഗ്നിഹോത്രി പ്രഖ്യാപിച്ചു. ഫോറസ്റ്റ് ക്ലിയറൻസ് ആക്‌ട് പ്രകാരം വനം വൃത്തിയാക്കുന്നതിന് ആവശ്യമായ എല്ലാ രേഖകളും സമര്‍പ്പിച്ചു കഴിഞ്ഞു. പദ്ധതിക്ക് 80 ശതമാനം വായ്പ നൽകുന്ന ന്യൂ ഡെവലപ്‌മെന്റ് ബാങ്ക് ജൂണില്‍ നടത്തിയ വസ്തുതാന്വേഷണ പ്രകാരം, ജൂലൈ 12 ന് പദ്ധതിക്കു സമ്മതം ലഭിച്ചു. ബാങ്കിന്റെ, 2024 ഡിസംബറിൽ ചേരുന്ന ഡയറക്ടർ ബോർഡ് യോഗത്തിൽ പദ്ധതിക്ക് ഔപചാരികമായ അനുമതി പ്രതീക്ഷിക്കുന്നതായി മന്ത്രി പറഞ്ഞു. പദ്ധതിയുടെ 20 ശതമാനം സർക്കാർ ധനസഹായമായി നല്‍കും. ആകെ 1,734.40 കോടി രൂപയാണ് നിര്‍മ്മാണത്തിനായി വകയിരുത്തിയത്.

റോപ്പ് വേയില്‍ മോണൽ ലൈൻ, ദേവദാർ ലൈൻ, ആപ്പിൾ ലൈൻ എന്നീ മൂന്ന് റൂട്ട് ലൈനുകൾ ഉൾപ്പെടുന്നു. താരാദേവി, ജുഡീഷ്യൽ കോംപ്ലക്സ്, ചക്കർ, തൂത്തിക്കണ്ടി, പുതിയ ഐഎസ്ബിടി, റെയിൽവേ സ്റ്റേഷൻ, പഴയ ഐഎസ്ബിടി, ലിഫ്റ്റ്, ഛോട്ടാ ഷിംല, നവബഹാർ, സഞ്ജൗലി, ഐജിഎംസി, ലക്കർ ബസാർ, 103 ടണൽ എന്നിങ്ങനെ റൂട്ടിൽ 13 ബോർഡിങ് സ്റ്റേഷനുകൾ ഉണ്ടാകും. പദ്ധതിയിലൂടെ 250 പേർക്ക് നേരിട്ടും 20,000 പേർക്ക് പരോക്ഷമായും തൊഴിലവസരം ലഭിക്കുമെന്നാണ് പ്രതീക്ഷിക്കുന്നത്.

ആകെ 13.79 കിലോമീറ്റർ ദൂരമായിരിക്കും ഈ റോപ്പ്‌വേ ഉൾക്കൊള്ളുക. തുടക്കത്തിൽ, റോപ്പ്‌വേക്ക് മണിക്കൂറിൽ 2,000 ആളുകളെ കൊണ്ടുപോകാനുള്ള ശേഷിയുണ്ടാകും ഇത് 2059 ൽ 6,000 ആയി വർദ്ധിക്കും. ഷിംലയിലെയും പരിസരപ്രദേശങ്ങളിലെയും തിരക്കു കുറയ്ക്കാന്‍ ഇതുവഴി സാധിക്കും. പ്രദേശവാസികൾക്കും വിനോദസഞ്ചാരികൾക്കും റോപ്‌വേയുടെ യാത്രാനിരക്കു വ്യത്യസ്തമായിരിക്കുമെന്നും അത് സംസ്ഥാന സർക്കാരാണ് നിശ്ചയിക്കുകയെന്നും അഗ്നിഹോത്രി പരാമർശിച്ചു.

ലോകത്താകെ 25,000 റോപ്‌വേകള്‍ ഉള്ളതായാണ് കണക്കാക്കുന്നത്. ഇവയില്‍ 20 എണ്ണം മാത്രമാണ് ഇന്ത്യയില്‍ ഉള്ളത്. ബഗ്ലാമുഖി ക്ഷേത്ര റോപ്പ് വേയുടെ നിർമ്മാണം ആരംഭിക്കുകയും ബാബ ബാലക്‌നാഥ് ക്ഷേത്ര റോപ്‌വേയ്ക്ക് മന്ത്രിസഭയുടെ അംഗീകാരം ലഭിക്കുകയും ചെയ്തതോടെ, ഹിമാചൽ പ്രദേശാണ് റോപ്‌വേകളുടെ എണ്ണത്തില്‍ മുന്നില്‍. നാർക്കണ്ട-ഹാതു പീക്ക് റോപ്പ്‌വേ, സോളൻ ജില്ലയിലെ ജബ്ലി-കസൗലി പാസഞ്ചർ റോപ്പ് വേ, സിർമൗർ ജില്ലയിലെ ഷിർഗുൽ മഹാദേവ് ക്ഷേത്രം പാസഞ്ചർ റോപ്പ് വേ, മാണ്ഡി ജില്ലയിലെ പുണ്ഡ്രിക് ഋഷി ക്ഷേത്രം പാസഞ്ചർ റോപ്പ് വേ എന്നിവ വളരെ ജനപ്രിയമാണ്.

ലോകത്തിലെ ഏറ്റവും വലിയ ഹനുമാൻ പ്രതിമ സ്ഥിതിചെയ്യുന്ന ജാഖൂ ക്ഷേത്രത്തിലേക്കുള്ള റോപ്പ്‌ വേ വളരെ പ്രസിദ്ധമാണ്. ഷിംലയിലെ ഏറ്റവും ഉയരം കൂടിയ സ്ഥലമായ ശിവാലിക് മലനിരകളുടെ പച്ചപ്പ് നിറഞ്ഞ പശ്ചാത്തലത്തിൽ സ്ഥിതി ചെയ്യുന്ന ജഖു ക്ഷേത്രം, ഷിംലയുടെ മിക്ക ഭാഗങ്ങളിൽ നിന്നും ദൃശ്യമാണ്. സമുദ്രനിരപ്പിൽ നിന്ന് 8,054 അടി വരെ ഉയരത്തിലുള്ള ഈ റോപ്പ്‌ വേ, ഇന്ത്യയിലെ ഏറ്റവും സുരക്ഷിതമായ റോപ്പ്‌ വേകളിൽ ഒന്നാണ്.

ലോകത്ത് ഏറ്റവും നീളമേറിയ റോപ്പ് വേ ഉള്ളത് തെക്കേ അമേരിക്കയിലെ ബൊളീവിയയിലാണ്, 32 കിലോമീറ്റര്‍ ആണ് ഇതിന്‍റെ ദൈര്‍ഘ്യം. 

ഹിമാചൽ പ്രദേശിന്റെ തലസ്ഥാനമായ ഷിംല, പ്രശസ്തമായ ഒരു ഹിൽ സ്റ്റേഷനാണ്. 2200 മീറ്റർ ഉയരത്തിൽ സ്ഥിതി ചെയ്യുന്ന ഇത് ബ്രിട്ടീഷ് ഇന്ത്യയുടെ വേനൽക്കാല തലസ്ഥാനമായിരുന്നു. ദി റിഡ്ജ് ഓഫ് ഷിംല, കുഫ്രി, ഗ്രീൻ വാലി, ജാഖൂ ഹിൽ, ചൈൽ, കിയാല ഫോറസ്റ്റ്, മാൾ റോഡ്, ഷിംല സ്റ്റേറ്റ് മ്യൂസിയം, ക്രൈസ്റ്റ് ചർച്ച്, കാളി ബാരി ടെമ്പിൾ, ഹിമാലയൻ ബേർഡ് പാർക്ക്, വൈസ്റെഗൽ ലോഡ്ജ്, കുത്താർ ഫോർട്ട്, സമ്മർ ഹിൽ തുടങ്ങിയവയും ടോയ് ട്രെയിൻ ചാഡ്‌വിക്കിലെ യാത്രയുമെല്ലാം ഹിമാചല്‍ പ്രദേശിലെ പ്രധാന ആകര്‍ഷണങ്ങളില്‍ പെടുന്നു. 

സന്ദർശനത്തിന് ഏറ്റവും മികച്ച സമയം

ഷിംല സന്ദർശിക്കാൻ ഏറ്റവും അനുയോജ്യമായ സമയം മാർച്ച് മുതൽ ജൂൺ വരെയുള്ള സമയമാണ്. നവംബർ മുതൽ ജനുവരി വരെയുള്ള ശൈത്യകാലമാണ് ഷിംലയിൽ മഞ്ഞുവീഴ്ച അനുഭവിക്കാൻ ഏറ്റവും നല്ല സമയം. സ്കീയിങ് പോലുള്ള മഞ്ഞുകാല വിനോദങ്ങള്‍ ഈ സമയത്തു സജീവമാകും. ജൂലൈയിൽ ആരംഭിച്ച് സെപ്റ്റംബർ വരെ നീണ്ടുനിൽക്കുന്ന മൺസൂൺ ഒഴികെയുള്ള എല്ലാ സീസണുകളിലും ഷിംലയിൽ ടൂറിസ്റ്റുകള്‍ ഒഴുകിയെത്തുന്നു.