വിനോദസഞ്ചാരികളുടെ ബോട്ട് ചാലിയാറിൽ കുടുങ്ങി

വാഴക്കാട്∙ ചാലിയാറിൽ ഉല്ലാസയാത്ര നടത്തുകയായിരുന്ന വിനോദസഞ്ചാര  ബോട്ട് പുഴയിലെ       പാറയിൽ തട്ടിനിന്നത് യാത്രക്കാരെ ഭീതിയിലാക്കി. ഇന്നലെ വൈകുന്നേരം 5 മണിയോടെ ഊർക്കടവ് പാലത്തിന് സമീപമാണ് സംഭവം.13 യാത്രക്കാരുമായി ഫറോക്കിൽനിന്ന് പുറപ്പെട്ട ബോട്ടാണ് കവണക്കല്ല് പാലത്തിനടുത്ത് തിരിക്കുന്നതിനിടെ കൂറ്റൻപാറയിൽ തട്ടിനിന്നത്. ഉടനെ ബോട്ടിന്റെ എൻജിൻ ഓഫായി. യാത്രക്കാർ ബഹളംവച്ചതിനെ തുടർന്ന് നാട്ടുകാർ തോണിയുമായെത്തി രക്ഷപ്പെടുത്തി. സംഭവത്തിൽ   ആർക്കും പരുക്കില്ല. പുഴയിൽ വെള്ളം ഉയരുന്നതോടെ ബോട്ട് പാറയിൽനിന്ന് മാറ്റാനാകും.