വിവിധ വിനോദങ്ങളിലൂടെ, ഉല്ലാസവേളകളിൽ ആവേശം നിറയ്ക്കാൻ സാധിക്കുന്ന രസകരമായയിടങ്ങളാണ് വാട്ടർ പാർക്കുകൾ. പ്രായഭേദമെന്യേ, എല്ലാവരിലും ആഹ്ളാദം നിറയ്ക്കാൻ ഇവിടുത്തെ വിനോദങ്ങൾക്ക് നിഷ്പ്രയാസം കഴിയും. ലോകത്തിന്റെ മുക്കിലും മൂലയിലും ഇന്നേറെ വാട്ടർ പാർക്കുകളുണ്ട്. അവധിക്കാലം തുടങ്ങുന്നത് വേനൽക്കാലങ്ങളിലായതുകൊണ്ടാകും എല്ലാ വാട്ടർപാർക്കുകളും സജീവമാകുന്നത് ആ സമയത്താണ്. വ്യത്യസ്തമായ കളികളിലൂടെ, അതിഥികൾക്ക് ആനന്ദനിമിഷങ്ങൾ നൽകിയ കുറെയേറെ വാട്ടർപാർക്കുകൾ അകാലങ്ങളിൽ താഴിട്ടുപൂട്ടേണ്ടി വന്നിട്ടുണ്ട്. വളരെ ആഘോഷപൂർവം ആരംഭിച്ചെങ്കിലും അധികം താമസിയാതെ പൂട്ടേണ്ടി വന്ന അത്തരത്തിലുള്ള വാട്ടർപാർക്കുകളെ പരിചയപ്പെടാം.
ലേക്ക് ഡൊളോറസ് വാട്ടർപാർക്ക് ന്യൂസ്ബെറി സ്പ്രിങ്സ്, കാലിഫോർണിയ, യു എസ് എ
1960 ലാണ് തദ്ദേശീയനായ ഒരു ബസിനസ്സുകാരൻ തന്റെ ഭാര്യയുടെ പേരിൽ, കുടുംബത്തിനുവേണ്ടി നിർമിച്ചതാണ് ഈ വാട്ടർപാർക്ക്. തുടർന്നുള്ള വർഷങ്ങളിൽ പലതരത്തിലുള്ള നിരവധി റൈഡുകൾ ഇവിടെ സ്ഥാപിക്കപ്പെട്ടു. 1970 ആയപ്പോഴേക്കും ഈ വാട്ടർപാർക്ക് പൊതുജനത്തിനായി തുറന്നുകൊടുക്കയും അന്നാട്ടിലെ ഏറ്റവും പ്രശസ്തമായ വാട്ടർപാർക്കായി മാറുകയും ചെയ്തു. ആദ്യ കാലത്തെ വൻ സ്വീകാര്യതക്കു ശേഷം പ്രതാപം നഷ്ടപ്പെട്ട വാട്ടർപാർക്ക് 1980 ഓടെ അടച്ചു.
എങ്കിലും 1950 കളിലുണ്ടായിരുന്ന റോക്ക്-എ-ഹൂല വാട്ടർപാർക്കിന്റെ പ്രമേയത്തെ പുനഃസൃഷ്ടിച്ചുകൊണ്ട് 1998 ൽ പാർക്ക് വീണ്ടും തുറന്നു. എങ്കിലും അധികനാളുകൾ അതിജീവിക്കാൻ സാധിച്ചില്ല. കൂടാതെ, ഒരു ജീവനക്കാരനുണ്ടായ അപകടം കൂടിയായപ്പോൾ നാശം പൂർത്തിയായി. 2002-2004 കാലഘട്ടത്തിൽ ഡിസ്കവറി വാട്ടർ പാർക്ക് എന്ന പേരിൽ രക്ഷിക്കാനുള്ള ഒരവസാന ശ്രമം കൂടി നടത്തിനോക്കിയെങ്കിലും അതും പരാജയപ്പെട്ടു. പിന്നീട് 2012 ൽ ഒരു സിനിമയുടെ ലൊക്കേഷനായും 2015 ൽ മിനികൂപ്പറിന്റെ പരസ്യത്തിനായുമെല്ലാം വാട്ടർ പാർക്കുകളുടെ ഈ പഴമക്കാരനെ ഉപയോഗിച്ചുവരുന്നു.
ഹൊയ് തുയ് ടിയെൻ ഇൻ ഹുയ്, വിയറ്റ്നാം
ലോകത്തിലെ ഏറ്റവും പ്രശസ്തമായിരുന്ന വാട്ടർ പാർക്ക് ആണിത്. വിയറ്റ്നാമിലെ ഏറ്റവും പ്രശസ്തമായ, വിനോദ സഞ്ചാരികൾ ഏറ്റവും കൂടുതലെത്തുന്ന പാർക്കുകളിലൊന്ന്. 3 മില്യൺ ഡോളർ ചെലവാക്കി, 2004 ലാണ് മുഴുവൻ നിര്മിതിയും പൂർത്തിയാക്കി ഈ പാർക്ക് സഞ്ചാരികൾക്കായി തുറന്നു കൊടുത്തത്. പക്ഷേ, കുറച്ചു വര്ഷങ്ങൾക്കുശേഷം പൂട്ടേണ്ടിവന്നു.
ഡിസ്നീസ് റിവർ കൺട്രി, ഫ്ലോറിഡ, യു എസ് എ
വാൾട്ട് ഡിസ്നി വേൾഡിലെ ആദ്യത്തെ വാട്ടർ പാർക്കാണ് ഡിസ്നീസ് റിവർ കൺട്രി. 1976 ലാണിത് സഞ്ചാരികൾക്കായി തുറന്നുകൊടുത്തത്. സുരക്ഷാവീഴ്ചകളുടെ ഫലമായി നിരവധി അപകടങ്ങളുണ്ടായതും സെപ്തംബര് 11 ലെ ഭീകരാക്രമണത്തെ തുടർന്ന് സഞ്ചാരികളുടെ വരവ് കുറഞ്ഞത് ഡിസ്നി ദ്വീപിനൊപ്പം തന്നെ ഈ പാർക്കിനും അവസാനം കുറിപ്പിച്ചു.
സഫാരി ലഗൂൺ വാട്ടർ പാർക്ക്, പാൻഡാൻ, സെലൻഗോർ, മലേഷ്യ
ഒരു ഷോപ്പിംഗ് സെന്ററിന്റെ ഏറ്റവും മുകളിലായാണ് ഈ പാർക്കിന്റെ സ്ഥാനം. തെക്കു കിഴക്കനേഷ്യയിലെ ഏറ്റവും വലിയ തീം പാർക്കെന്ന വിശേഷണത്തോടെയാണ് സഞ്ചാരികൾക്കുവേണ്ടി 1998 ൽ ഈ പാർക്ക് തുറക്കപ്പെട്ടത്. എന്നാൽ അധികം താമസിയാതെ 2007 ൽ പൂട്ടേണ്ടി വന്നു. പൂട്ടാനുള്ള കാരണങ്ങൾ രണ്ടായിരുന്നു. അതിൽ ആദ്യത്തേത്, ലൈസെൻസ് ഇല്ലാതെയാണ് എട്ടുവർഷത്തോളം ഇത് പ്രവർത്തിച്ചത് എന്നതായിരുന്നു. രണ്ടാമത്തേത്, ഇവിടുത്തെ ഒരു ജീവനക്കാരൻ വാട്ടർ പമ്പ് കമ്പാർട്മെന്റിൽപ്പെട്ട് അതിദാരുണമായി കൊല്ലപ്പെട്ടതാണ്. ഈ രണ്ടുകാര്യങ്ങളും ഈ വാട്ടർപാർക്കിന് താഴിട്ടു പൂട്ടാൻ കാരണമായി.
വാട്ടർ വണ്ടർലാൻഡ് ഇൻ മിഡ് ലാൻഡ്- ഒഡേസ, ടെക്സാസ്, യു എസ് എ
വേനൽക്കാലങ്ങളിൽ ഒഡേസയിലെ ജനങ്ങളുടെ ആഘോഷങ്ങൾ മുഴുവൻ ഈ പാർക്കിലായിരുന്നു. 1980 ലാണ് ഈ വാട്ടർ പാർക്ക് വിനോദങ്ങളുടെ അത്ഭുത ലോകം തുറന്നത്. എന്നാൽ അധികം താമസിയാതെ തന്നെ സാമ്പത്തിക ബുദ്ധിമുട്ടുകൾ ഈ പാർക്കിനെ ബാധിച്ചു. തുടർന്ന് 1990 ൽ പാർക്ക് ഉടമകൾ പാപ്പരത്വം ഫയൽ ചെയ്തു. ഇതിനിടയിൽ പാർക്കിലെത്തിയ ഒരു കുഞ്ഞിന് അപകടം സംഭവിച്ചതും വണ്ടർലാൻഡിൽ നിന്നും ജനങ്ങളെ അകറ്റി. 2003 ൽ പാർക്ക് പൂട്ടി.