വിമാനക്കാഴ്ചകളുടെ വിരുന്നൊരുക്കി എയര്‍ലൈന്‍ മ്യൂസിയങ്ങള്‍

റൈറ്റ് സഹോദരന്മാര്‍ കണ്ടെത്തിയതു മുതല്‍ ഇന്നു വരെ വിമാനങ്ങളുടെ ലോകത്ത് അദ്ഭുതകരമായ പരിവര്‍ത്തനങ്ങളാണ് സംഭവിച്ചു കൊണ്ടിരിക്കുന്നത്. വിമാനങ്ങളുടെ രൂപ പരിണാമങ്ങളും ടെക്നോളജി മാറ്റങ്ങളും ചരിത്രത്തില്‍ അടയാളപ്പെടുത്തപ്പെട്ട മറ്റു കാര്യങ്ങളുമെല്ലാം അന്വേഷിച്ചു നടക്കുന്നവര്‍ക്ക് പോകാന്‍ ലോകത്തെ മികച്ച എയര്‍ലൈന്‍ മ്യൂസിയങ്ങള്‍ പരിചയപ്പെടാം.

1.  ടിഡബ്ല്യുഎ മ്യൂസിയം (TWA Museum, Kansas City, Missouri)

2001 ൽ പ്രവർത്തനം നിർത്തിവച്ച ഈ അമേരിക്കൻ എയർലൈനിന് മിസോറിയിലെ കൻസാസ് സിറ്റിയിൽ സ്വന്തമായി മ്യൂസിയമുണ്ട്. ടി‌ഡബ്ല്യുഎയുടെ ആദ്യ നാളുകളിൽ കന്‍സാസ് നഗരം ഏറെ പ്രധാനപ്പെട്ടതായിരുന്നു. പോസ്റ്ററുകളും യൂണിഫോമുകളും എയര്‍ലൈനുമായി ബന്ധപ്പെട്ട മറ്റ് ഓര്‍മകളും ഇവിടെ കാണാം. മനോഹരമായി പുനര്‍നിര്‍മിച്ച ലോക്ക്ഹീഡ് ഇലക്ട്ര വിമാനമാണ് ഇവിടുത്തെ പ്രധാന ആകർഷണം. 

2. എയര്‍ലൈന്‍ ഹിസ്റ്ററി മ്യൂസിയം (Airline History Museum, Kansas City, Missouri)

ടിഡബ്ല്യുഎ മ്യൂസിയം കാണാന്‍ പോകുന്നവര്‍ക്ക്,  അതിനൊപ്പം എയര്‍ലൈന്‍ ഹിസ്റ്ററി മ്യൂസിയവും കാണാം. ഇവ തമ്മില്‍ 300 മീറ്റര്‍ ദൂരമേയുള്ളൂ. നിരവധി വിമാനങ്ങൾ പ്രദർശിപ്പിക്കുന്ന ഒരു ചെറിയ സ്വകാര്യ മ്യൂസിയമാണിത്. മാർട്ടിൻ സ്കോർസെസെയുടെ 2004-ൽ പുറത്തിറങ്ങിയ ‘ദി ഏവിയേറ്റർ’ ഉൾപ്പെടെ നിരവധി ഹോളിവുഡ് സിനിമകളിൽ കണ്ട ലോക്ക്ഹീഡ് എൽ -1049 കോണ്‍സ്റ്റല്ലേഷന്‍ ആണ് ഇവിടുത്തെ ഹൈലൈറ്റ്.  

3. സിആര്‍ സ്മിത്ത് മ്യൂസിയം (C.R. Smith Museum (American Airlines), Fort Worth, Texas)

34 വർഷത്തോളം അമേരിക്കൻ എയർലൈൻസിന്റെ പ്രസിഡന്റായിരുന്ന സൈറസ് റോലറ്റ് സ്മിത്തിന്റെ പേരാണ് അവരുടെ ഈ മ്യൂസിയത്തിനു നൽകിയിരിക്കുന്നത്. അമേരിക്കന്‍ എയര്‍ലൈന്‍സ് ലോകത്തിലെ ഏറ്റവും വലിയ എയർലൈനുകളിൽ ഒന്നായി മാറിയത് സ്മിത്തിന്റെ നേതൃത്വത്തിലായിരുന്നു.

1993 ൽ തുറന്ന മ്യൂസിയം  2018 ൽ നവീകരിച്ചു. ഡഗ്ലസ് ഡിസി -3 വിമാനമാണ് മ്യൂസിയത്തിന്റെ ഏറ്റവും വലിയ പ്രത്യേകത. യൂണിഫോമുകളുടെ വലിയ ശേഖരം, ഒരു പൂർണ്ണ എംഡി -80 കോക്ക്പിറ്റ്, എയർലൈനിന്റെ കൺട്രോള്‍ സെന്‍ററിന്‍റെ മോക്കപ്പ് എന്നിവയും ഇവിടെ കാണാം. 

4. ഡെല്‍റ്റ ഫ്ലൈറ്റ് മ്യൂസിയം (Delta Flight Museum, Atlanta, Georgia)

ലോകത്തിലെ ഏറ്റവും പഴക്കമേറിയതും വലുതുമായ എയർലൈനുകളിൽ ഒന്നായ ഡെൽറ്റയ്ക്ക് അറ്റ്ലാന്റ-ഹാർട്ട്സ്ഫീൽഡ് ഹബിന് അടുത്തായി സ്വന്തമായി ഒരു മ്യൂസിയമുണ്ട്. 1990 കളിൽ ഡെൽറ്റയുടെ ഒരു ഡിസി -3 അന്വേഷിച്ച് സ്വന്തമാക്കിയ ഒരു കൂട്ടം ആളുകള്‍ ചേര്‍ന്നാണ് ഇത് തുടങ്ങിയത്. ബോയിങ് 767, ഒരു ബോയിങ് 757, ആദ്യത്തെ ബോയിങ് 747-400 എന്നിവയും ചരിത്രത്തിന്റെ ഭാഗമായ മറ്റു നിരവധി വിമാനങ്ങളും ഇവിടെ കാണാം.

5. ബ്രിട്ടിഷ് എയര്‍വേയ്സ്‌ ഹെറിറ്റേജ് കലക്‌ഷന്‍ (British Airways Heritage Collection, Harmondsworth, UK)

ബ്രിട്ടിഷ് എയർവേയ്‌സിന്റെ മ്യൂസിയം അവരുടെ ആസ്ഥാനത്താണ്. സന്ദര്‍ശനത്തിന് മുന്‍കൂട്ടി വിളിച്ച് പാസ് എടുക്കണം. 

ഡിസ്‌പ്ലേ കാബിനറ്റുകൾ, വിവിധ മോഡൽ വിമാനങ്ങൾ, മാനെക്വിനുകൾ, ഫ്രെയിം ചെയ്ത പ്രമാണങ്ങൾ എന്നിവ ഇവിടെ കാണാം. ഒരു മണിക്കൂര്‍  ഇവിടത്തെ സ്റ്റാഫിനൊപ്പം ചുറ്റിക്കറങ്ങി മ്യൂസിയം കാണാന്‍ സാധിക്കും.

6. എമിറേറ്റ്സ് ഏവിയേഷന്‍ എക്സ്പീരിയന്‍സ് (Emirates Aviation Experience, London, UK)

ഒരു പരമ്പരാഗത മ്യൂസിയം എന്നതിലുപരി തീം പാർക്കിന്റെ അനുഭവം നല്‍കുന്ന എമിറേറ്റ്സ് ഏവിയേഷൻ എക്സ്പീരിയൻസ് മ്യൂസിയം പുതു തലമുറ എയർലൈൻ മ്യൂസിയങ്ങളുടെ ഉത്തമ ഉദാഹരണമാണ്. പരീക്ഷണാത്മകമായി സജ്ജീകരിച്ച എമിറേറ്റ്സ് എക്സ്പീരിയൻസ് സെന്റർ ഇന്നത്തെ മാറുന്ന എയര്‍ലൈന്‍ ലോകത്തെക്കുറിച്ച് വ്യക്തമായ കാഴ്ചപ്പാട് നൽകും. തെംസ് നദിയുടെ രണ്ടു തീരങ്ങളെ ബന്ധിപ്പിക്കുന്ന എമിറേറ്റ്സ് കേബിൾ കാറിന് അടുത്തായി സ്ഥിതിചെയ്യുന്ന ഏവിയേഷൻ എക്സ്പീരിയൻസ് സെന്ററിൽ രണ്ട് എയർബസ് എ 380, ബോയിങ് 777 സിമുലേറ്ററുകൾ എന്നിവയുണ്ട്. സന്ദര്‍ശകര്‍ക്ക് വിമാനം പറത്തലില്‍ കഴിവ് പരീക്ഷിക്കാനും ഇവിടെ അവസരമുണ്ട്. 

7. ക്വാന്‍ടസ് ഫൗണ്ടേഴ്സ് മ്യൂസിയം (Qantas Founders Museum, Queensland, Australia)

ബ്രിസ്‌ബെയ്‌നിന് വടക്കുപടിഞ്ഞാറായി ക്യൂൻസ്‌ലൻഡിലെ ക്വാണ്ടാസ് ഫൗണ്ടേഴ്‌സ് മ്യൂസിയം ഓസ്‌ട്രേലിയയിലെ ഏറ്റവും പഴക്കമേറിയതും പ്രശസ്തവുമായ എയർലൈനിന്‍റെ ഓര്‍മകള്‍ കാത്തുസൂക്ഷിക്കുന്നു. ഡഗ്ലസ് ഡിസി -3, ബോയിങ് 747, ബോയിങ് 707 എന്നിവ കൂടാതെ ഫിലിപ്പീൻസിലെ ഒരു സ്ക്രാപ്പ് യാർഡിൽനിന്ന് ഈയിടെ കണ്ടെത്തിയ ലോക്ക്ഹീഡ് സൂപ്പർ കോൺസ്റ്റെലേഷൻ വിമാനവും ഇവിടത്തെ പ്രധാന ആകർഷണമാണ്. 

8. സൗത്ത് ആഫ്രിക്കന്‍ എയര്‍വേയ്സ് മ്യൂസിയം (South African Airways Museum, Rand, South Africa)

ദക്ഷിണാഫ്രിക്കയുടെ വ്യോമയാന പൈതൃകം സംരക്ഷിക്കുന്നതിനായി, 1980 കളുടെ അവസാനം മുതൽ ദക്ഷിണാഫ്രിക്കൻ എയർവേയ്സ് മ്യൂസിയം സൊസൈറ്റി മുന്നോട്ടു വന്നു. ജോഹാനസ്ബർഗിന്റെ പ്രാന്തപ്രദേശത്ത് സ്ഥിതിചെയ്യുന്ന ഈ മ്യൂസിയത്തിൽ രണ്ട് കൂറ്റൻ ബോയിങ് 747 വിമാനങ്ങൾ കാണാം. ഇപ്പോഴും പ്രവര്‍ത്തനയോഗ്യമായ രണ്ടു ഡിസി -4 വിമാനങ്ങളും 1940 കളിൽ നിർമിച്ച ഒരു ഡിസി -3 യും ഇവിടെയുണ്ട്.

9. എസ്എഎസ് മ്യുസീറ്റ് (SAS Museet, Oslo, Norway)

ഓസ്‌ലോ എയര്‍പോര്‍ട്ടിനു സമീപമാണ് ഇത്. സ്കാന്‍ഡിനേവിയയുടെ ആകാശയാത്രയുടെ ചരിത്രമാണ് ഇവിടെ പ്രദര്‍ശിപ്പിക്കുന്നത്. ഡെൻ‌മാർക്കിന്റെ ഡി‌ഡി‌എൽ, നോർ‌വേയുടെ ഡി‌എൻ‌എൽ, സ്വീഡന്റെ എ‌ബി‌എ / സില എന്നീ മൂന്ന് മാതൃ കമ്പനികൾ‌ക്കായി സമർപ്പിച്ചിരിക്കുന്ന ഒരു വിഭാഗം ഇവിടെയുണ്ട്. രണ്ടാം ലോക മഹായുദ്ധത്തിനുശേഷം ഇവര്‍ ഒന്നിച്ച് സ്കാൻഡിനേവിയൻ എയർലൈൻസ് സിസ്റ്റം (എസ്‌എ‌എസ്) രൂപീകരിച്ചു. 1946 മുതൽ 2019 വരെയുള്ള എല്ലാ എസ്‌എ‌എസ് യൂണിഫോമുകളും സ്‌കെയിൽ മോഡലുകളും മറ്റും ഇവിടെ കാണാം.