ഈ സ്ഥലങ്ങളിൽ ക്രിസ്മസ് ഡിസംബർ 25 അല്ല ! അതിനു പിന്നിലെ കാരണം?

ലോകമെമ്പാടും ആഘോഷങ്ങളുടെ സമയമാണ് ക്രിസ്മസ് കാലം. ലോകം മുഴുവൻ ഓരോ വ്യത്യസ്ത തരത്തിലാണ് ഡിസംബർ 25ന് ക്രിസ്മസ് ആഘോഷിക്കുന്നതെങ്കിലും ചില രാജ്യങ്ങളിൽ ഈ ദിവസമല്ല ക്രിസ്മസ്. പുതു വര്‍ഷത്തിലെ ആദ്യമാസമായ ജനുവരിയിലാണ് ഇവിടെ ക്രിസ്മസ് ആഘോഷിക്കുന്നത്.

ബെലാറസ്, ഈജിപ്ത്, ജോര്‍ജിയ, എത്യോപ്യ, കസാക്കിസ്ഥാന്‍, സെര്‍ബിയ എന്നിവിടങ്ങളിലാണ് ജനുവരിയില്‍ ക്രിസ്മസ് ആഘോഷിക്കുന്നത്. മധ്യേഷ്യയിലെയും കിഴക്കന്‍ യൂറോപ്പിലെയും ഈ രാജ്യങ്ങള്‍ ഡിസംബര്‍ 25 കഴിഞ്ഞ് 13 ദിവസത്തിന് ശേഷമാണ് ക്രിസ്മസ് ആഘോഷിക്കുന്നത്. അതായത് ജനുവരി 6-7 തിയതികളിലായിരിക്കും ഇൗ രാജ്യങ്ങളിൽ ക്രിസ്മസ്. അവര്‍ പിന്തുടരുന്ന കലണ്ടറാണ് ഇതിനു പിന്നിൽ. ലോകത്തിന്റെ ഭൂരിഭാഗവും ഗ്രിഗോറിയന്‍ കലണ്ടറിനെ പിന്തുടരുമ്പോള്‍, ഈ രാജ്യങ്ങള്‍ ജൂലിയന്‍ കലണ്ടറാണ് പിന്തുടരുന്നത്. ഗ്രിഗോറിയന്‍ കലണ്ടറിന്റെ മുമ്പുണ്ടായിരുന്നതാണ് ജൂലിയന്‍ കലണ്ടര്‍.

റഷ്യയുടെ പല ഭാഗങ്ങളിലും ജനുവരി 7 ന് ക്രിസ്മസ് ആഘോഷിക്കുന്നുണ്ട്. ഇറ്റലിയില്‍, ക്രിസ്മസ് ആഘോഷിക്കുന്നത് ജനുവരി ആറിന് എപ്പിഫാനി എന്ന പെരുന്നാള്‍ ദിനമാണ്. യേശു ജനിച്ച് 12-ാം ദിവസം, മൂന്നു ജ്ഞാനികള്‍ അനുഗ്രഹങ്ങളും സമ്മാനങ്ങളും നല്‍കാനായി അദ്ദേഹത്തെ സന്ദര്‍ശിച്ചുവെന്ന് വിശ്വസിക്കപ്പെടുന്നു. ഈ കാരണത്താലാണ് ജനുവരി ആറിന് ഇറ്റലി ക്രിസ്മസ് ആഘോഷിക്കുന്നത്.

ലോകവിനോദസഞ്ചാരമേഖലയിൽ ഏറ്റവും അധികം യാത്രകള്‍ നടക്കുന്നത് ക്രിസ്മസ്-പുതുവത്സരത്തോടനുബന്ധിച്ചാണ്. മിക്കവരും പ്രധാന വിനോദസഞ്ചാരകേന്ദ്രങ്ങളിലേക്ക് ആഘോഷങ്ങള്‍ക്കായി ചേക്കേറും. വ്യത്യസ്ത ദിവസങ്ങളില്‍ ക്രിസ്മസ് ആഘോഷിക്കുന്നത് പോലെ ക്രിസ്മസ് എന്ന ആഘോഷം ഇല്ലാത്ത രാജ്യങ്ങളുമുണ്ട് നമ്മുടെ ഈ ഭൂമിയില്‍. ചൈനയിലും ഭൂട്ടാനിലുമൊന്നും ഈ ആഘോഷം ഇല്ല. ഏതായാലും ക്രിസ്മസ് ആഘോഷങ്ങള്‍ കാണാനായി യാത്ര പ്ലാന്‍ ചെയ്യുമ്പോള്‍ ഡിസംബറില്‍ തന്നെ വേണ്ട ജനുവരിയിലും ആകാം.

English Summary: Countries that celebrate Christmas in January