ഇന്ത്യൻ വനിതാ ക്രിക്കറ്റ് ടീം ക്യാപ്റ്റൻ മിതാലി രാജ് രാജ്യാന്തര ക്രിക്കറ്റിൽ നിന്നു വിരമിച്ചു. ജൂൺ എട്ടിനു സമൂഹമാധ്യമായ ട്വിറ്ററിലൂടെയാണു മുപ്പത്തിയൊൻപതുകാരിയായ മിതാലി 23 വർഷം നീണ്ട കരിയറിൽ നിന്നുള്ള വിടവാങ്ങൽ പ്രഖ്യാപിച്ചത്
വനിതാ ക്രിക്കറ്റിലെ സച്ചിൻ തെൻഡുൽക്കർ എന്ന വിശേഷണമുള്ള മിതാലി വനിതാ ഏകദിന ക്രിക്കറ്റിൽ ഏറ്റവും അധികം റൺസ് (7805) നേടിയ താരമാണ്
വനിതാ ഏകദിനത്തിൽ ഏറ്റവുമധികം മത്സരം കളിച്ച താരം (232), സെഞ്ചറി നേടിയ ഏറ്റവും പ്രായം കുറഞ്ഞ താരം എന്നീ റെക്കോർഡുകളും മിതാലിയുടെ പേരിലുണ്ട്
89 രാജ്യാന്തര ട്വന്റി20 മത്സരങ്ങളിൽ 2,364 റൺസും 12 ടെസ്റ്റിൽ 699 റൺസും നേടിയിട്ടുള്ള മിതാലി 1999 ലാണു രാജ്യാന്തര ക്രിക്കറ്റിൽ അരങ്ങേറ്റം കുറിച്ചത്
ഏകദിനത്തിൽ 7 സെഞ്ചറിയും 64 അർധ സെഞ്ചറിയും ട്വന്റി20 യിൽ 17 അർധ സെഞ്ചറിയും കുറിച്ച മിതാലി ഇന്ത്യയുടെ എക്കാലത്തെയും മികച്ച ക്രിക്കറ്റർമാരിൽ ഒരാൾ എന്ന ഖ്യാതിയോടെയാണു മൈതാനത്തോടു വിടപറയുന്നത്