ഗോസിപ് മേക്കേഴ്സിന്റെ പിടിയിൽ നിന്ന് ഒഴിഞ്ഞു മാറാനും ഓഫിസ് ഗോസിപ്പിന്റെ ഭാഗമാകാതിരിക്കാനും ശ്രദ്ധിക്കണം.
ഒരു സ്ഥാപനത്തിൽ ജോലി ചെയ്യുമ്പോൾ അറിഞ്ഞോ അറിയാതെയോ ഗോസിപ് ശൃംഖലയിലെ കണ്ണിയാകാനുള്ള സാധ്യത വളരെ കൂടുതലാണ്.
കേട്ടകാര്യങ്ങളെല്ലാം തൊണ്ട തൊടാതെ വിഴുങ്ങി, അതു മാത്രമാണ് ശരിയെന്നു വിശ്വസിച്ച് മറ്റുള്ളവരോടു പറയുന്ന ശീലം ചിലർക്കെങ്കിലുമുണ്ട്. അത്തരക്കാർ ഗോസിപ് ശൃംഖലയിൽപ്പെടാനുള്ള സാധ്യത കൂടുതലാണ്.
എന്തെങ്കിലും നെഗറ്റീവായി കേട്ടാൽ അത് അപ്പാടെ വിശ്വസിക്കാതെ കേട്ടതൊക്കെ ശരിയാണോയെന്ന് അന്വേഷിക്കാം.
നല്ല വാർത്തകളേക്കാൾ വേഗത്തിൽ ചീത്ത വാർത്തകൾ പരക്കാറുണ്ട്.
പലപ്പോഴും അപവാദപ്രചാരണം തുടങ്ങി വയ്ക്കുന്നത് ആരെങ്കിലും ഒരാളായിരിക്കും. അതിന്റെ തിക്ത ഫലം അനുഭവിക്കുന്നത് മറ്റൊരാളുമാകും.
ഒരു ഓഫിസിൽ ജോലി ചെയ്യുമ്പോൾ സഹപ്രവർത്തകരുമായി ആശയവിനിമയം നടത്താതിരിക്കാൻ സാധിക്കില്ല. ആശയവിനിമയങ്ങൾ വഴിമാറി ഗോസിപ്പിലേക്ക് പോകാതിരിക്കാൻ മനപ്പൂർവം കരുതലെടുക്കുക എന്നതാണ് ഏക പോം വഴി.