ഥാറിന്റെ ‘റോക്കിങ്’ എൻട്രി

മഹീന്ദ്ര. ഥാര്‍ റോക്‌സിന്റെ എന്‍ട്രി ലെവല്‍ പെട്രോള്‍ വകഭേദത്തിന് 12.99 ലക്ഷം രൂപയാണ് വിലയിട്ടിരിക്കുന്നത്.

എന്‍ട്രി ലെവല്‍ ഡീസല്‍ വകഭേദത്തിന് 13.99 ലക്ഷം രൂപയുമാണ് വിലയിട്ടിരിക്കുന്നത്.

മൂന്നു ഡോര്‍ ഥാറിനെ അപേക്ഷിച്ച് 1.64 ലക്ഷം രൂപ കൂടുതലാണ് 5 ഡോര്‍ ഥാര്‍ റോക്‌സിന്.

ഒക്ടോബര്‍ രണ്ടു മുതല്‍ ബുക്കിങ് സ്വീകരിക്കുമെന്ന് അറിയിച്ചിട്ടുള്ള മഹീന്ദ്ര ടെസ്റ്റ് ഡ്രൈവ് സെപ്തംബര്‍ 14 മുതല്‍ ആരംഭിക്കുമെന്നും ഒക്ടോബര്‍ 12 മുതല്‍ ഥാര്‍ റോക്‌സ് ഉടമകളുടെ കൈവശം എത്തുമെന്നും വ്യക്തമാക്കുന്നു.

പുറംമോടിയില്‍ ഫ്രണ്ട് ഗ്രില്‍ മുതല്‍ തന്നെ മാറ്റങ്ങള്‍ തുടങ്ങുന്നു. ആറായി തരം തിരിച്ചിരിക്കുന്ന ഗ്രില്ലാണ് 5 ഡോര്‍ ഥാറിലുള്ളത്.

3 ഡോര്‍ ഥാറില്‍ ഇത് ഏഴാക്കിയാണ് തിരിച്ചിരുന്നത്. ഹെഡ്‌ലാംപ് സി രൂപത്തില്‍ തന്നെയാണ് വരുന്നത്.

എല്‍ഇഡി പ്രൊജക്ടറും സി രൂപത്തിലുള്ള ഡിആര്‍എല്ലും വരുന്നു.

വീതിയേറിയ മുന്നിലെ ബംപര്‍ 5 ഡോര്‍ ഥാറിനെ 3 ഡോര്‍ ഥാറില്‍ നിന്നും വേറിട്ടു നിര്‍ത്തുന്നുണ്ട്.

19 ഇഞ്ച് ഡയമണ്ട് കട്ട് അലോയ് വീലുകളാണ് റോക്‌സിന്റെ ഉയര്‍ന്ന വകഭേദങ്ങള്‍ക്ക്. മിഡ് വേരിയന്റുകളില്‍ 18 ഇഞ്ച് അലോയ് വീലുകള്‍. 3 ഡോര്‍ ഥാറിന്റേതിനു സമാനമാണ് മുന്നിലെ ഡോറുകള്‍.

പിന്‍ ഡോറുകളിലെ ഹാന്‍ഡില്‍ മുകളിലേക്കു കയറ്റിയിരിക്കുന്നു. ഇവി കണ്‍സെപ്റ്റിലേതു പോലെ പിന്നിലെ ക്വാര്‍ട്ടര്‍ ഗ്ലാസ് ത്രികോണാകൃതിയിലാണ് നല്‍കിയത്.

കറുപ്പ് റൂഫുള്ള ഡ്യുവല്‍ ടോണ്‍ പെയിന്റാണ് ഭൂരിഭാഗം വകഭേദങ്ങള്‍ക്കും. പിന്നില്‍ ഒറ്റനോട്ടത്തില്‍ 3 ഡോര്‍ ഥാറിനോട് സാദൃശ്യമുണ്ടെങ്കിലും ടെയില്‍ ലാംപിലും സി രൂപത്തിലുള്ള എല്‍ഇഡിയിലും ടെയില്‍ ഗേറ്റ് ഡിസൈനിലും മാറ്റങ്ങള്‍ കാണാനാവും.

റിയര്‍ വൈപ്പറും വാഷറും ഉള്‍പ്പെടുത്തിയിട്ടുണ്ട്. ബൂട്ട് സ്‌പേസിലും വര്‍ധനവുണ്ട്.