യാത്ര പോകുമ്പോൾ മറക്കാതിരിക്കാം മരുന്നുകൾ
സ്ഥിരം കഴിക്കുന്ന മരുന്നുകൾ ഒരു കാരണവശാലും യാത്രകളില് മറന്നു പോകരുത്. ആരോഗ്യപ്രശ്നങ്ങളുള്ളവർ മെഡിക്കൽ റിപ്പോർട്ടിന്റെ കോപ്പി കയ്യിൽ കരുതണം.
ഹൃദ്രോഗം, പ്രമേഹം പോലുള്ളവയ്ക്ക് സ്ഥിരമായി ഗുളിക കഴിക്കുന്നുണ്ടെങ്കിൽ അതു സൂചിപ്പിക്കുന്ന ബാന്ഡ്, ടാഗ് ഇവ ധരിക്കുന്നത് നല്ലതായിരിക്കും. പെട്ടെന്നു ബോധക്ഷയം വന്നാലോ മറ്റോ കൂടെയുള്ളവർക്ക് കൃത്യമായ ശുശ്രൂഷ നൽകാൻ അത് സഹായിക്കും.
വേദനയ്ക്കുള്ള ബാം, പനി, ചുമ, തലവേദന, വയറിളക്കം, ഛര്ദി എന്നിവയ്ക്കുള്ള മരുന്നുകളും ഒആർഎസ് പായ്ക്കും ഫസ്റ്റ് എയ്ഡ് ബോക്സിൽ കരുതാം.
ആര്ത്തവ സമയത്ത് യാത്ര ചെയ്യുമ്പോൾ മെൻസ്ട്രുവൽ കപ്പുകൾ നല്ലതാണ്. സ്റ്റെറിലൈസർ കൂടെ കരുതണം എന്നുമാത്രം. സാനിറ്ററി പാഡ് കളയാൻ ബുദ്ധിമുട്ടാണെന്നു മാത്രമല്ല. ബാഗിലെ കുറേ സ്ഥലം അപഹരിക്കുകയും ചെയ്യും.
കാഴ്ചകൾ കാണുന്നതിനിടയിൽ പൂക്കൾ മണക്കാനും പഴങ്ങൾ പൊട്ടിച്ചെടുത്ത് കഴിക്കാനും ശ്രമിക്കരുത്. ചിലത് അലർജിക്ക് കാരണമാകും.