പ്രായം ചെല്ലുന്നതുവരെ ഒരാൾ ശീലിച്ച ഭക്ഷണരീതിയും രുചികളുമെല്ലാം പെട്ടെന്നു മാറ്റുന്നത് അവർക്കു ബുദ്ധിമുട്ടുണ്ടാകും. ഇത്തരത്തിലുള്ള അമിത നിയന്ത്രണങ്ങൾ അവരെ വിഷാദത്തിലേക്കും മറ്റു പ്രശ്നങ്ങളിലേക്കും നയിക്കും

ഡോക്ടർമാരുടെ നിർദേശമുണ്ടെങ്കിൽ മാത്രം ചില ഭക്ഷണങ്ങൾക്കു നിയന്ത്രണം ഏർപ്പെടുത്താം. അരി പോലെ കാർബോഹൈഡ്രേറ്റ് കൂടുതലുള്ള ഭക്ഷ്യ പദാർഥങ്ങൾ പ്ലേറ്റിന്റെ 25% മതി. ബാക്കിയുള്ളത് പച്ചക്കറികളോ ഇറച്ചിയോ മീനോ മുട്ടയോ അടങ്ങിയ ഭക്ഷണങ്ങളാകാം.

3 നേരം ഭക്ഷണമെന്നതിനു പകരം ചെറിയ അളവിലുള്ള ഭക്ഷണം 2–3 മണിക്കൂർ ഇടവേളകളിൽ 6 നേരമായി നൽകുന്നതാണു വയോജനങ്ങൾക്കു നല്ലത്. രാത്രിയിലെ ഭക്ഷണം നേരത്തെയാക്കണം.

വെള്ളം കുടിക്കുന്നതു നല്ലതാണ്. എന്നാൽ അമിതമായി വെള്ളം കുടിക്കേണ്ട. അതു നീർക്കെട്ടിലേക്കു നയിക്കും. കൂടുതൽ വെള്ളം കുടിക്കുമ്പോൾ കൂടുതൽ മൂത്രമൊഴിക്കും. അപ്പോൾ ശരീരത്തിലെ സോഡിയം നഷ്ടം കൂടും. വീടിനുള്ളിൽ കഴിയുന്ന ഒരാൾക്കു 2 ലീറ്റർ വെള്ളം തന്നെ ധാരാളമാണ്.