കേന്ദ്ര സർക്കാരിനെതിരെ കോൺഗ്രസ് നേതാവ് രാഹുൽ ഗാന്ധി നയിക്കുന്ന ‘ഭാരത് ജോഡോ’ (ഇന്ത്യയെ ഒന്നിപ്പിക്കൂ) പദയാത്ര 100 ദിവസം പിന്നിടുന്നു.

സെപ്റ്റംബർ ഏഴിന് കന്യാകുമാരിയിൽ തുടക്കമിട്ട യാത്ര, 2,600 കിലോമീറ്റർ ഇതിനോകം പിന്നിട്ടു.

ശ്രീപെരുംപുത്തൂരിൽ പിതാവ് രാജീവ് ഗാന്ധിയുടെ സ്മാരകത്തിലെത്തി അനുഗ്രഹം തേടിയ ശേഷമാണ് രാഹുൽ യാത്ര തുടങ്ങിയത്.

തമിഴ്‌നാട്, കേരളം, ആന്ധ്രാപ്രദേശ്, കർണാടക, തെലങ്കാന, മഹാരാഷ്ട്ര, മധ്യപ്രദേശ് എന്നിവിടങ്ങളിൽ സഞ്ചരിച്ച യാത്ര, നിലവിൽ രാജസ്ഥാനിലാണ്. ഡിസംബർ 21ന് യാത്ര ഹരിയാനയിൽ പ്രവേശിക്കും.

150 ദിവസം നീളുന്ന പദയാത്ര 12 സംസ്ഥാനങ്ങളിലും 2 കേന്ദ്രഭരണ പ്രദേശങ്ങളിലൂടെയുമാണ് കടന്നുപോവുന്നത്.

രാവിലെ 7 മുതൽ 10 വരെയും വൈകിട്ട് 4 മുതൽ രാത്രി 7 വരെയും ദിവസവും 25 കിലോമീറ്ററാണ് പദയാത്ര.

3,750 കിലോമീറ്റർ പിന്നിട്ട് 2023 ജനുവരി 30 ന് ശ്രീനഗറിൽ യാത്ര സമാപിക്കും.

സെപ്റ്റംബർ 11നു പാറശാല വഴി കേരളത്തിൽ കടന്ന യാത്ര തിരുവനന്തപുരം, കൊല്ലം, ആലപ്പുഴ, എറണാകുളം, തൃശൂർ, പാലക്കാട്, മലപ്പുറം ജില്ലകളിലായി സംസ്ഥാനത്ത് 19 ദിവസം ദിവസം പര്യടനം നടത്തി.