ഭാരത് ജോഡോ യാത്രയുടെ പഞ്ചാബ് പര്യടനത്തിനു മുന്നോടിയായി അമൃത്സറിലെ സുവർണ ക്ഷേത്രം സന്ദർശിച്ച് കോൺഗ്രസ് നേതാവ് രാഹുൽ ഗാന്ധി.
ഓറഞ്ച് നിറത്തിലുള്ള തലപ്പാവ് ധരിച്ചെത്തിയ രാഹുൽ ഗാന്ധി, സുവർണ ക്ഷേത്രത്തിൽ പ്രാർഥന നടത്തി.
പഞ്ചാബ് കോൺഗ്രസ് അധ്യക്ഷൻ അമരീന്ദർ സിങ് രാജ വാറിങ്, പഞ്ചാബ് പ്രതിപക്ഷ നേതാവ് പ്രതാപ് സിങ് ബജ്വ, എംപി ഗുർജിത് സിങ് ഔജ്ല, മറ്റു പാർട്ടി നേതാക്കളും രാഹുൽ ഗാന്ധിക്കൊപ്പം ഉണ്ടായിരുന്നു.
പഞ്ചാബിൽ എട്ട് ദിവസം പര്യടനം നടത്തുന്ന ഭാരത് ജോഡോ യാത്ര, മാണ്ഡി ഗോബിന്ദ്ഗഡ്, ഖന്ന, സഹ്നേവാൾ, ലുധിയാന, ഗോരായ, ഫഗ്വാര, ജലന്ധർ, ദസ്യുവ, മുകേരിയൻ എന്നിവിടങ്ങളിലൂടെ കടന്നുപോകും.
ഭാരത് ജോഡോ യാത്ര ജമ്മു കശ്മീരിലേക്ക് പ്രവേശിക്കുന്നതിന് മുൻപ് ജനുവരി 19ന് പത്താൻകോട്ടിൽ റാലി സംഘടിപ്പിക്കും.
സെപ്റ്റംബർ 7 ന് തമിഴ്നാട്ടിലെ കന്യാകുമാരിയിൽ നിന്ന് ആരംഭിച്ച യാത്ര ജനുവരി 30ന് ശ്രീനഗറിൽ സമാപിക്കും. തമിഴ്നാട്, കേരളം, കർണാടക, ആന്ധ്രാപ്രദേശ്, തെലങ്കാന, മഹാരാഷ്ട്ര, മധ്യപ്രദേശ്, രാജസ്ഥാൻ, ഡൽഹി, ഉത്തർപ്രദേശ്, ഹരിയാന എന്നിവിടങ്ങളിലൂടെയാണ് യാത്ര ഇതുവരെ കടന്നുപോയത്.