ആവേശകരമായ വരവേൽപ് ഏറ്റുവാങ്ങി കോൺഗ്രസ് നേതാവ് രാഹുൽ ഗാന്ധി നയിക്കുന്ന ഭാരത് ജോഡോ യാത്ര ജമ്മു കശ്മീരിലേക്കു കടന്നു.

മുതിർന്ന കോൺഗ്രസ് നേതാക്കളും നാഷനൽ കോൺഫറൻസ് മേധാവി ഫാറൂഖ് അബ്ദുല്ലയും ദോഗ്ര സ്വാഭിമാൻ സംഘടനാ തലവൻ ചൗധരി ലാൽ സിങ്ങും ചേർന്ന് കശ്മീരിലെ ലഖൻപൂരിൽ രാഹുൽ ഗാന്ധിയെ സ്വീകരിച്ചു.

ഇതു തനിക്ക് ‘സ്വദേശത്തേക്കുള്ള മടങ്ങിവരവ്’ ആണെന്ന് രാഹുൽ ഗാന്ധി പറഞ്ഞു.

ജമ്മു കശ്മീരിൽ കഠ്‌വ ജില്ലയിലെ ലഖൻപൂരിലായിരുന്നു യാത്രയുടെ ആദ്യദിനം. കശ്മീരിൽ 350 കിലോമീറ്റർ ദൂരം പര്യടനം നടത്തും. പത്ത് ദിവസത്തെ യാത്രയിൽ രാഹുൽ ഗാന്ധി മൂന്ന് പ്രധാന പൊതുയോഗങ്ങളെ അഭിസംബോധന ചെയ്യും.

ഭാരത് ജോഡോ യാത്രയെ തുടർന്ന് കശ്മീരിൽ സുരക്ഷ ശക്തമാക്കിയിട്ടുണ്ട്. യാത്രയ്ക്കിടെ രാഹുൽ ഗാന്ധി സഞ്ചരിക്കുന്ന റൂട്ടുകളിൽ കൂടുതൽ സൈനികരെ വിന്യസിച്ചു.

സെപ്റ്റംബറിൽ കന്യാകുമാരിയിൽ നിന്ന് ആരംഭിച്ച യാത്ര, ജനുവരി 30ന് ശ്രീനഗറിൽ സമാപിക്കും. സമാപന ചടങ്ങളിൽ പങ്കെടുക്കാൻ 21 പ്രതിപക്ഷ പാർട്ടികളെ ക്ഷണിച്ചിട്ടുണ്ട്.