കേരളീയസദ്യയോളം സമൃദ്ധമായൊരുഭക്ഷണം നമുക്ക് വേറെയില്ല. ബന്ധുക്കളും സുഹൃദ്ജനങ്ങളോടുമൊത്തുള്ള ഭോജനം എന്നർഥമുള്ള ‘സഗ്ധിഃ’ എന്ന സംസ്കൃത വാക്കിൽനിന്നാണ് ‘സദ്യ’ എന്ന വാക്കുണ്ടായത്

മധുരം, കയ്പ്പ്, പുളി, ഉപ്പ്, എരിവ്, ചവർപ്പ് എന്നീ ആറു രസങ്ങള്‍ അടങ്ങിയ ഭക്ഷണശീലം ഉത്തമമാണെന്ന് ആയുർവേദം പറയുന്നുണ്ട്. ഇതിനനുസരിച്ചാണ് നാം സദ്യ ചിട്ടപ്പെടുത്തിയത്

അത്താഴൂട്ട്, ആണ്ടിയൂട്ട്, ക്ഷേത്രസദ്യ,വിവാഹസദ്യ, വിഷുസദ്യ, പിറന്നാൾസദ്യ തുടങ്ങി ആചാരാനുഷ്ഠാനങ്ങളുമായി ബന്ധപ്പെട്ടും അല്ലാതെയും വിവിധതരം സദ്യകൾ നമുക്കുണ്ടെങ്കിലും അവയിൽ കേമൻ ഓണസദ്യയാണ്. സദ്യയിലൂടെ മാത്രമേ നമുക്ക് ഓണം പൂർണമായിരുന്നുള്ളൂ

സദ്യയൊരുക്കുന്ന പതിവ് പണ്ടുമുതലേ നമ്മുടെ നാട്ടിലുണ്ടായിരുന്നു. സദ്യ വിളമ്പുന്നതിനും കഴിക്കേണ്ടതിനുമൊക്കെ കൃത്യമായ ചിട്ടകളുണ്ട്

ഉണ്ണാനിരിക്കുന്ന ആളിന്റെ ഇടതുവശത്തേക്ക് കൊടിഭാഗം അഥവാ അറ്റം വരുന്ന രീതിയിൽ വാഴയിലയിട്ട് അതിലാണ് സദ്യ വിളമ്പുക. ഇടത്തു നിന്നും വലത്തോട്ടുവേണം വിളമ്പാൻ. ഇലയുടെ ആദ്യപകുതിയിൽ തൊടുകറികളും രണ്ടാംപകുതിയിൽ ചോറും വിളമ്പും