ഒരുകാലത്ത് മലയാളിയുടെ ‘ദേശീയഭക്ഷണ’മായിരുന്നു കഞ്ഞി. പ്രാതലിനും അത്താഴത്തിനും കഞ്ഞി കഴിച്ച് പകലന്തിയോളം പാടത്തും പറമ്പിലും പണിയെടുത്തു കഴിഞ്ഞവരായിരുന്നു നമ്മുടെ പൂർവികർ. കഞ്ഞി എങ്ങനെയാണ് കേരളത്തിന്റെ പ്രധാന ഭക്ഷണമായത്?

ഉത്തരം കഞ്ഞിപോലെ ലളിതമാണ്. നമ്മുടെ പ്രധാന ധാന്യവിളയാണ് നെല്ല്. നെല്ല് ഉമി കളഞ്ഞെടുത്ത അരിയൊന്ന് ചെറുതായി പൊടിച്ച് എട്ടിരട്ടി വെള്ളത്തിൽ വേവിച്ചാണ് കഞ്ഞിയുണ്ടാക്കിയിരുന്നത്

വെയിലും ചൂടും കൂടിയ ഉഷ്ണമേഖലാപ്രദേശമായ നമ്മുടെ നാടിന് ഏറ്റവും യോജിച്ച ഭക്ഷണമാണ് കഞ്ഞിയെന്ന് നമ്മുടെ പൂർവികർ തിരിച്ചറിഞ്ഞിരുന്നു

ദ്രാവകരൂപത്തിലുള്ള ഈ ഭക്ഷണം എളുപ്പത്തിൽ ദഹിക്കുന്നതും ശരീരത്തിന് ഏറെ സുഖകരവുമാണ്

ചെറുപയറും പുഴുക്കും തേങ്ങയും ചമ്മന്തിയുമൊക്കെ കൂട്ടിനെത്തുന്നതോടെ കഞ്ഞിയ്ക്ക് പോഷകഗുണമേറും. ചോറിനേക്കാൾ പോഷകസമൃദ്ധമാണ് കഞ്ഞിയും കഞ്ഞിവെള്ളവും

കർക്കിടകമാസത്തിൽ നവരയരിയും നാടൻ ഔഷധസസ്യങ്ങളും മറ്റും ചേർത്ത് തയാറാക്കുന്ന ഔഷധക്കഞ്ഞി ആരോഗ്യകരമായ ഭക്ഷണമാണ്