മൂന്നാം ഏകദിനത്തി‍ൽ ഇന്ത്യൻ വനിതാ ടീമിനെതിരെ ഓസ്ട്രേലിയയ്ക്ക് 190 റൺസ് ജയം; പരമ്പര 3–0നു സ്വന്തം.

ടെസ്റ്റിൽ ഓസ്ട്രേലിയയ്ക്കെതിരെ ചരിത്രജയം നേടിയതിനു പിന്നാലെ ഏകദിന പരമ്പരയിൽ ഇന്ത്യൻ വനിതാ ക്രിക്കറ്റ് ടീമിന് വൻതോൽവി.

മൂന്നാം ഏകദിനത്തിൽ 190 റൺസ് പരാജയം ഏറ്റുവാങ്ങിയ ഇന്ത്യ പരമ്പര 3–0ന് അടിയറവു വച്ചു.

ആദ്യം ബാറ്റു ചെയ്ത് ഓസ്ട്രേലിയ ഉയർത്തിയ 338 റൺസ് പിന്തുടർന്ന ഇന്ത്യ 148 റൺസിനു പുറത്തായി.

സെഞ്ചറി നേടിയ ഫീബി ലിച്ച്ഫീൽഡാണ് (125 പന്തിൽ 119) പ്ലെയർ ഓഫ് ദ് മാച്ച്.ഉജ്വലമായ ഒരു ഒറ്റക്കൈ ക്യാച്ചും ലിച്ച്ഫീൽഡ് പേരിലാക്കി.

പരമ്പരയിലാകെ 260 റൺസ് നേടിയ ലിച്ച്ഫീൽഡ് തന്നെയാണ് പ്ലെയർ ഓഫ് ദ് സീരീസും.

സ്കോർ: ഓസ്ട്രേലിയ– 50 ഓവറിൽ 7 വിക്കറ്റ് നഷ്ടത്തിൽ 338. ഇന്ത്യ– 32.4 ഓവറിൽ 148നു പുറത്ത്.