ഐഎസ്എലിലെ ആവേശ മത്സരത്തിൽ ഒഡിഷ എഫ്സിക്കെതിരെ സീസണിലെ നാലാം തോൽവി വഴങ്ങി കേരള ബ്ലാസ്റ്റേഴ്സ്
ആദ്യ പകുതിയിൽ ഒരു ഗോളിന് മുന്നിട്ടുനിന്ന ബ്ലാസ്റ്റേഴ്സിനെ രണ്ടാം പകുതിയിൽ റോയ് കൃഷ്ണയുടെ ഇരട്ട ഗോൾ മികവിലാണ് ഒഡിഷ കീഴടക്കിയത്.
11-ാം മിനിറ്റില്‍ ദിമിത്രിയോസ് ഡയമന്റക്കോസിന്റെ ഗോളിലൂടെയാണ് കേരളം മുന്നിലെത്തിയത്. എന്നാൽ രണ്ടാം പകുതിയിൽ 53, 57 മിനിറ്റുകളിൽ റോയ് കൃഷ്ണ ഗോൾ വല കുലുക്കിയതോടെ ഒഡീഷ മുന്നിലെത്തുകയായിരുന്നു.
ജയത്തോടെ ഒഡീഷ പോയിന്റ് പട്ടികയിൽ രണ്ടാമതായി. ബ്ലാസ്റ്റേഴ്സ് മൂന്നാം സ്ഥാനത്താണ്.
നിഹാലിന്റെ അസിസ്റ്റോടെയാണ് ഡയമന്റക്കോസ് ബ്ലാസ്റ്റേഴ്സിനായി ഗോള്‍ കണ്ടെത്തിയത്. വലതു വിങ്ങില്‍നിന്ന് കൈവശപ്പെടുത്തിയ പന്തുമായി നിഹാല്‍ ഒഡിഷ ബോക്‌സിനകത്തേക്ക് ഓടി. പന്ത് പിഴവുകളില്ലാതെ ഡയമന്റക്കോസിന് കൈമാറി. പന്ത് പോസ്റ്റിലേക്ക് പായിക്കേണ്ട ചുമതലയേ ഡയമന്റക്കോസിന് ഉണ്ടായിരുന്നുള്ളൂ.
രണ്ടാം പകുതിയിൽ 53, 57 മിനിറ്റുകളിൽ റോയ് കൃഷ്ണ ഗോൾ നേടി. 53-ാം മിനിറ്റില്‍ കോര്‍ണറില്‍നിന്ന് ജാവോയുടെ ക്രോസ് റോയ് കൃഷ്ണ വലയിലേക്ക് തിരിച്ചുവിടുകയായിരുന്നു.
നാലു മിനിറ്റിനു ശേഷം ഹെഡ്ഡറിലൂടെയാണ് രണ്ടാം ഗോൾ നേടിയത്.
തിരിച്ചടിക്കാൻ ബ്ലാസ്റ്റേഴ്സ് താരങ്ങൾ ശ്രമിച്ചെങ്കിലും ഒഡീഷയുടെ പ്രതിരോധത്തെ മറികടക്കാനായില്ല. ഇരട്ട ഗോളോടെ സീസണിലെ ഗോൾ നേട്ടക്കാരുടെ പട്ടികയിൽ ഒന്നാമതെത്താനും റോയ് കൃഷ്ണയ്ക്കായി.