ഇന്ത്യൻ പ്രീമിയർ ലീഗിൽ എട്ടാം വിജയവുമായി സണ്റൈസേഴ്സ് ഹൈദരാബാദ്
സീസണിലെ അവസാന മത്സരത്തിൽ പഞ്ചാബ് കിങ്സിനെതിരെ നാലു വിക്കറ്റ് വിജയമാണ് ഹൈദരാബാദ് നേടിയത്.
പഞ്ചാബ് ഉയർത്തിയ 215 റൺസ് വിജയലക്ഷ്യത്തിലേക്ക് ആറു വിക്കറ്റ് നഷ്ടത്തിൽ 19.1 ഓവറിൽ സൺറൈസേഴ്സ് എത്തി.
നേരത്തേ പ്ലേഓഫ് ഉറപ്പിച്ച ഹൈദരാബാദിന് ഇതോടെ 17 പോയിന്റായി.28 പന്തിൽ 66 റൺസെടുത്ത അഭിഷേക് ശർമയാണ് ഹൈദരാബാദിന്റെ ടോപ് സ്കോറർ.
ഹെൻറിച് ക്ലാസൻ (26 പന്തിൽ 42), നിതിഷ് കുമാര് റെഡ്ഡി (25 പന്തിൽ 37), രാഹുൽ ത്രിപാഠി (18 പന്തിൽ 33) എന്നിവരും തിളങ്ങി.
മറുപടി ബാറ്റിങ്ങിലെ ആദ്യ പന്തിൽ തന്നെ ഹൈദരാബാദിന് ട്രാവിസ് ഹെഡിനെ നഷ്ടമായി. അഭിഷേക് ശർമയും രാഹുൽ ത്രിപാഠിയും കൈകോർത്തതോടെ ഹൈദരാബാദ് സ്കോർ കുതിച്ചുകയറി.
4 ഓവറുകളിൽ 50 പിന്നിട്ട സൺറൈസേഴ്സ്, പവർപ്ലേയിൽ അടിച്ചത് 84 റൺസ്. 33 റൺസെടുത്ത രാഹുൽ ത്രിപാഠിയെ ഹർഷൽ പട്ടേലിന്റെ പന്തിൽ അര്ഷ്ദീപ് സിങ് ക്യാച്ചെടുത്തു പുറത്താക്കി
ഹൈദരാബാദ് സ്കോർ 200 കടന്നതിനു പിന്നാലെ ക്ലാസൻ, ഹർപ്രീത് ബ്രാറിന്റെ പന്തിൽ ബോൾഡായി.
അവസാന ഓവറിൽ ഹൈദരാബാദിന് നാലു റൺസ് മാത്രമായിരുന്നു ജയിക്കാൻ വേണ്ടിയിരുന്നത്. അഥർവ ടൈഡെ എറിഞ്ഞ ആദ്യ പന്തു തന്നെ ബൗണ്ടറി കടത്തി സൻവിര് സിങ് വിജയ റൺസ് കുറിച്ചു.