sections
MORE

അത്തരം സംശയങ്ങൾ മകൾ എന്നോടാണ് ചോദിക്കുക, അജയ്‌യോടല്ല: കജോൾ

Kajol With Family
കജോൾ കുടുംബത്തോടൊപ്പം
SHARE

ആൺസുഹൃത്തുക്കൾ, പ്രണയം ഇവയെക്കുറിച്ചൊക്കെ മകൾ മനസ്സു തുറന്നു സംസാരിക്കുന്നത് തന്നോടാണെന്ന് ബോളിവുഡ് താരം കജോൾ. കരീന കപൂറിന്റെ റേഡിയോ ഷോ ആയ വാട്ട് വുമൺ വാണ്ട് എന്ന പരിപാടിയിൽ പങ്കെടുത്തപ്പോഴാണ് മകളെക്കുറിച്ചും തന്റെ പാരന്റിങ് ശൈലിയെക്കുറിച്ചും കജോൾ മനസ്സു തുറന്നത്. 

മകൾ നൈസയും മകൻ യുഗും പ്രണയസംബന്ധിയായ വിഷയങ്ങളിൽ ആരോടാണ് അഭിപ്രായം ചോദിക്കുന്നതെന്ന കരീനയുടെ ചോദ്യത്തിന് മറുപടി പറയുമ്പോഴാണ് കജോൾ മക്കളെക്കുറിച്ചും കുടുംബത്തെക്കുറിച്ചും വാചാലയായത്. പ്രണയ സംബന്ധമായ വിഷയങ്ങൾ മകൾ നൈസ തന്നോടാണ് ചർച്ച ചെയ്യാറുള്ളതെന്നും കാരണം ഒരു തോക്ക് കൈയിൽ പിടിച്ചു നിൽക്കുന്ന ആളുടെ മട്ടാണ് ചിലപ്പോഴൊക്കെ അജയ്‌ക്കെന്നും ആയിരുന്നു കജോളിന്റെ മറുപടി.

'' നൈസ തീർച്ചയായും എന്റെ അരികിലേ വരൂ. യുഗ് അവന്റെ അച്ഛന്റെ അരികിലേക്കും. കാരണം അച്ഛൻ കൂളാണ് എന്ന മനോഭാവമാണ് അവന്. ഇത്തരം ആൺകാര്യങ്ങൾ അവർ തമ്മിലാകും ചർച്ച ചെയ്യുക. അജയ് ഒരു പ്രൊട്ടക്റ്റീവ് ഫാദറാണ്. റിലേഷൻഷിപ് പ്രശ്നങ്ങളുമായി നൈസ ഒരിക്കലും അവളുടെ അച്ഛന്റെയടുത്തു പോവില്ല, ബോയ്ഫ്രണ്ട്സിനെപ്പറ്റി സംസാരിക്കുകയുമില്ല. കൈയിൽ ഒരു തോക്കുംപിടിച്ചു നിൽക്കുന്ന ആളുടെ ഭാവത്തോടെ എവിടെ അവൻ?, എവിടെ അവൻ? എന്നൊക്കെ ചോദിച്ചുകൊണ്ടിരിക്കും''.

താനൊരിക്കലും ഒരു ഒബ്സസ്ഡ് പേരന്റ് അല്ല എന്നാണ് കജോൾ പറയുന്നത്. '' കുഞ്ഞുങ്ങളെ അമിതമായി നിയന്ത്രിക്കുന്ന ഒരു രക്ഷകർത്താവല്ല ഞാൻ. ആരോഗ്യകരമായ ബന്ധത്തിനു യോജിച്ച ഒരു കാര്യമല്ല അതെന്നാണ് എന്റെ വിശ്വാസം. പക്ഷേ എന്റെ അമ്മ ഇതിനു നേർവിപരീതമായിരുന്നു. എന്നെ വളർത്തിയ രീതിയിലും ഏറെ വ്യത്യസ്തതയുണ്ടായിരുന്നു. അതുകൊണ്ടു തന്നെ കുട്ടികളെ വല്ലാതെ നിയന്ത്രിക്കുന്നതിനോട് എനിക്ക് യോജിക്കാനാവില്ല''.- കജോൾ പറയുന്നു.

'കുഞ്ഞുങ്ങളോട് ഒരുപാട് വാൽസല്യമുണ്ടെങ്കിലും അവരുടെ ജീവിതത്തിൽ അനാവശ്യമായി കൈകടത്താറില്ല.

അവർക്ക് നന്നായി വളരാനുള്ള സാഹചര്യമൊരുക്കിക്കൊടുക്കയാണ് ചെയ്യുന്നത്. അവരുടെ വളർച്ചയ്ക്ക് തടസ്സമാകുന്നതൊന്നും ചെയ്യാറില്ല. അജയ് കുഞ്ഞുങ്ങളെ നന്നായി താലോലിക്കുന്ന അച്ഛനാണ്. അദ്ദേഹത്തിന് അദ്ദേഹത്തിന്റേതായ രീതിയുണ്ട്. കുഞ്ഞുങ്ങളുടെ കാര്യം വരുമ്പോൾ അജയ്‌യുടെ ശാന്തസ്വഭാവമൊക്കെ എവിടെയോ പോയിമറയും. കുഞ്ഞുങ്ങളെക്കുറിച്ചുള്ള എല്ലാക്കാര്യങ്ങളും എപ്പോഴും അറിയണമെന്നു നിർബന്ധമുള്ള അച്ഛനാണ് അജയ്‌''.- കജോൾ പറയുന്നു.

നീണ്ട ഇടവേളയ്ക്കു ശേഷം അജയ് ദേവ്‌ഗണും കജോളും ഒരുമിച്ചഭിനയിക്കുന്ന ചിത്രം 2020 ജനുവരി 10 ന് റിലീസ് ചെയ്യും.

English Summary : Kajol revealed that her daughter Nysa is likely to come to her for love advice 

തൽസമയ വാർത്തകൾക്ക് മലയാള മനോരമ മൊബൈൽ ആപ് ഡൗൺലോഡ് ചെയ്യൂ
MORE IN FAMILY CORNER
SHOW MORE
FROM ONMANORAMA