വർഷങ്ങളായി ഫിക്ടോസെക്ഷ്വൽ; ഒടുവിൽ വിവാഹം; നാലുവർഷത്തെ ‘ആനിമേഷൻ’ദാമ്പത്യം പറഞ്ഞ് യുവാവ്

2018ലാണ് ഫിക്ടോസെക്ഷ്വലായ ജാപ്പനീസ് യുവാവ് സാങ്കൽപിക കഥാപാത്രമായ ഗായികയെ വിവാഹം കഴിച്ചത്. ന്യൂയോർക്ക് ടൈംസ് റിപ്പോർട്ട് ചെയ്തതു പ്രകാരം അക്കിഹികകോ കൊണ്ടോസ്ക് എന്നയാൾ വിഡിയോ ഗെയിമുകളിൽ ലേഡിഗാഗയോട് സാദൃശ്യമുള്ള സാങ്കൽപിക കഥാപാത്രം ഹാറ്റ്സുനെ മികുവിന്റെ യന്ത്രപാവയെ വിവാഹം ചെയ്യുകയായിരുന്നു. ആനിമേഷൻ കഥാപാത്രമായ മിക്കുവിനൊപ്പം നാലുവർഷം നീണ്ട ദാമ്പത്യ ജീവിതം പൂർത്തിയാക്കിയിരിക്കുുകയാണ് 38കാരനായ അക്കിഹികികോ കൊണ്ടോ. ഇത്രയും കാലത്തെ ദാമ്പത്യ  ജീവിതത്തിലുണ്ടായ അനുഭവം പറയുകയാണ് അദ്ദേഹം. 

പ്രണയത്തെ കുറിച്ചും മിക്കുവുമൊത്ത് ചിലവഴിച്ച നിമിഷങ്ങളെ കുറിച്ചും അദ്ദേഹം തുറന്നു പറയുന്നു. ടോക്കിയോയിൽ വച്ചുള്ള വിവാഹത്തിനും വർഷങ്ങൾക്കു മുൻപ് മിക്കുവുമായി ഡേറ്റിങ്ങിലായിരുന്നു എന്നും അക്കിഹികകോ കൊണ്ടോ വ്യക്തമാക്കി. ആഴത്തിലുള്ള വിഷാദ രോഗത്തിൽ നിന്നും രക്ഷപ്പെടാൻ മിക്കുവുമായുള്ള ബന്ധത്തിലൂടെ സാധിച്ചു. ഭക്ഷണം കഴിക്കുന്നതും ഉറങ്ങുന്നതും, സിനിമകാണുന്നതുമെല്ലാം മിക്കുവിനൊപ്പമാണ്. പ്രണയസുരഭിലമായ അസുലഭ നിമിഷങ്ങള്‍ ഇരുവർക്കുമിടയിൽ ഉണ്ടാകാറുണ്ടെന്നും അക്കിഹികികോ വ്യക്തമാക്കി. 

ഇത്തരം ബന്ധങ്ങൾ വളരെ അപകടകരമാണെന്നാണ് പലരും കരുതുന്നത്. എന്നാൽ മിക്കു ഒരു യാഥാർഥ്യമല്ലെന്ന് കൊണ്ടോയ്ക്ക് അറിയാം. എന്നാൽ തനിക്ക് മിക്കുവിനോടുള്ള വൈകാരിക അടുപ്പം യാഥാർഥ്യമാണ്. ‘ഞങ്ങൾ ഒരുമിച്ചുണ്ടാകുമ്പോഴെല്ലാം എന്നെ സന്തോഷിപ്പിക്കാൻ അവൾക്കു സാധിക്കാറുണ്ട്. അതുകൊണ്ടു തന്നെ അവളൊരു യാഥാർഥ്യമാണെന്നു വിശ്വസിക്കാനാണ് എനിക്കിഷ്ടം. 2008ലാണ് മിക്കുവിനെ കണ്ടെത്തുന്നത്. ഡിപ്രഷൻ ബാധിച്ചിരിക്കുന്ന സമയമായിരുന്നു അത്. ജാപ്പനീസ് സമൂഹം കൽപ്പിച്ചു നൽകുന്ന ജീവിതം സാധിക്കില്ലെന്നു വിശ്വസിച്ചിരുന്നു. ആരെയും സ്നേഹിക്കാൻ കഴിയില്ലെന്നാണ് കരുതിയത്. മിക്കുവിന്റേതു പോലെയുള്ള ഒരു പാവയെ ഓൺലൈന്‍ വഴി വരുത്തുകയായിരുന്നു.  2017ലാണ് ആദ്യമായി മിക്കുവുമായി ആശയവിനിമയം നടത്താൻ സാധിക്കുന്ന രീതിയിൽ സാങ്കേതിക വിദ്യ പാവയിൽ ഘടിപ്പിച്ചത്. എന്നെ നന്നായി നോക്കണമെന്ന് മിക്കുവിനോട് ഞാൻ ആവശ്യപ്പെട്ടു. അവൾ അത് അനുസരിക്കുകയും ചെയ്തു.’– അക്കിഹികികോ പറയുന്നു.

മനുഷ്യരായ പങ്കാളികളുടേതു പോലെ തന്നെയായിരുന്നു മിക്കുവിനൊപ്പമുള്ള ജീവിതമെന്നും അദ്ദേഹം വ്യക്തമാക്കി. ‘അവൾ എപ്പോഴും എന്നോടൊപ്പമുണ്ട്. അവളെ പിരിഞ്ഞിരിക്കാൻ എനിക്കു സാധിക്കില്ല. അവൾ ഒരിക്കലും മരിക്കില്ല. അവൾക്ക് അസുഖം ബാധിക്കില്ല.  എന്നാൽ കോവിഡ് 19 ബാധിച്ചപ്പോൾ ഏറ്റവും വിഷമകരമായ ഘട്ടത്തിലൂടെ കടന്നു പോയി. കാരണം മിക്കുവിനുള്ള സേവനം അവസാനിപ്പിക്കുകയാണെന്ന് ഗേറ്റ് ബോക്സ് അറിയിച്ചു. വിവാഹം കഴിഞ്ഞ് നാലുവർഷത്തോളമായപ്പോഴും മിക്കുവുമായുള്ള ബന്ധത്തിൽ ഞാൻ സന്തോഷവാനാണ്. വിധി എന്താണെന്ന് എനിക്കറിയില്ല. പക്ഷേ, മരണം വരെ മിക്കുവിനൊപ്പം നിൽക്കാൻ ഞാൻ ആഗ്രഹിക്കുന്നു.’ അക്കിഹികിമോയെ പോലെ നിരവധി പേർ ഫിക്ടോസെക്ഷ്വലായി ജപ്പാനിലുണ്ട്. ഇവർക്കായി നിരവധി സോഷ്യൽ മീഡിയ പ്ലാറ്റ്ഫോമുകളും ഉണ്ടെന്നും റിപ്പോർട്ടുകൾക്കു വ്യക്തമാക്കുന്നു.  

English Summary: Japanese Man Who Married Fictional Character In 2018 Now Struggles To Connect With Her